សារមន្ទីរព្រះនរោត្តម សីហនុ-អង្គរ រៀបចំពិព័រណ៍ ១០ ថ្ងៃ បង្ហាញវត្ថុបុរាណទើបរកឃើញថ្មីៗ

សារមន្ទីរ​ព្រះ​នរោត្តម សីហនុ​-​អង្គរ រៀបចំ​ពិព័រណ៍​មិន​អចិន្ត្រៃយ៍​រយៈពេល​ខ្លី ចំនួន ១០ ថ្ងៃ ចាប់​ពី​ថ្ងៃ​ទី ១៨ រហូតដល់​ថ្ងៃ​ទី ២៨ ខែ​ឧសភា ឆ្នាំ ២០២៣ បង្ហាញ​វត្ថុ​បុរាណ​ដែល​ទើប​រក​ឃើញ​ថ្មីៗ។ នេះ​បើ​តាម​ការ​ជូនដំណឹង​របស់​អាជ្ញាធរ​ជាតិ​អប្សរា។

ពិព័រណ៍​នេះ​នឹង​រៀបចំ​តាំង​បង្ហាញ​នូវ​វត្ថុ​បុរាណ វត្ថុ​សិល្បៈ ឬ​សមុច្ច័យ​មួយ​ចំនួន ដែល​សារមន្ទីរ​បាន​ជ្រើសរើស និង​ទើប​រក​ឃើញ​ពី​កំណាយ​ស្រាវជ្រាវ​នៅ​តំបន់​រមណីយដ្ឋាន​អង្គរ រួម​នឹង​កុលាលភាជន៍ មាន​ប្រភព​ពី​ឡ​ដុត​កុលាលភាជន៍​បុរាណ​តំបន់​ភ្នំ​គូលែន​ផង​ដែរ។

សម្រាប់​សមុច្ច័យ​ដែល​នឹង​តាំង​បង្ហាញ​ក្នុង​ពិព័រណ៍​ខាង​លើ​នេះ​ចែក​ជា ៣ ប្រភេទ ក្នុង​នោះ​វត្ថុ​ដែល​ធ្វើ​ពី​ដី​ឥដ្ឋ​មាន លោហធាតុ សំរឹទ្ធ ស្ពាន់ ដែក​សំណ​សមុច្ច័យ​វត្ថុ​បុរាណ​ជា​ត្បូង​គ្រី​ស្តា​ល់ និង​គ្រាប់​ក្វាត​ជាដើម​។ សារមន្ទីរ​ព្រះ​នរោត្តម សីហនុ​-​អង្គរ មាន​សុទិដ្ឋិនិយម​ថា ពិព័រណ៍​ខាង​លើ​នេះ នឹង ផ្តល់​ព័ត៌មាន​ថ្មីៗ ស្ដីពី​វឌ្ឍនភាព និង​ភាព​រីកចម្រើន​ក្នុង​វិស័យ​ស្រាវជ្រាវ និង​កំណាយ​តាម​បែប​បុរាណវិទ្យា ក្នុង​តំបន់​ការពារ​បេតិកភណ្ឌ​រមណីយដ្ឋាន​អង្គរ។

សាធារណជន ក៏​អាច​ស្វែងយល់​បន្ថែម​ពី​ការងារ​ថែទាំ និង​ជួសជុល​វត្ថុ​បុរាណ ក្រោយ​ពេល​បញ្ចប់​ការងារ​ស្រាវជ្រាវ​ពី​ការដ្ឋាន​កំណាយ​ផង​ដែរ។

សូម​បញ្ជាក់​ថា ពិព័រណ៍​ខាង​លើ​នេះ​ធ្វើឡើង​ដើម្បី​អបអរ​ទិវា​សារមន្ទីរ​អន្ដរជាតិ​ថ្ងៃ​ទី ១៨ ខែ​ឧសភា។ ក្នុង​ថ្ងៃ​ទី ១៨ នេះ​ដែរ ភ្ញៀវ​ទេសចរ​ជាតិ អន្តរជាតិ អាច​ចូល​ទស្សនា​បាន​ដោយ​ឥតគិតថ្លៃ៕

អត្ថបទ ៖ ចាន់រ៉ា