សម្តេច​ ស​ ខេង៖ មេដាយសរុប២៨២គ្រឿងដែលកម្ពុជាទទួលបាន មាន១៣២គ្រឿងដណ្តើមបានដោយអត្តពលិកក្រសួងមហាផ្ទៃ

ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់នៅលើបណ្តាញសង្គមហ្វេសប៊ុកថា​ ក្រុមអត្តពលិកនៃក្រសួងមហាផ្ទៃ បានរួមចំណែកប្រជែងបានមេដាយសរុបចំនួន ១៣២ គ្រឿង ដែលស្មើនឹងជាង ៤៦ភាគរយ នៃមេដាយសរុបដែលកម្ពុជាទទួលបានចំនួន ២៨២ ។

សម្តេចបានឲ្យដឹងកាលពីសប្តាហ៍មុនថា ក្នុងចំណោមមេដាយទាំង១៣២​ ដែលក្រុមអត្តពលិកនៃក្រសួងមហាផ្ទៃដណ្តើមបានរួមមានមេដាយមាសចំនួន ២៣គ្រឿង មេដាយប្រាក់ចំនួន ៣៤គ្រឿង និងមេដាយសំរឹទ្ធិចំនួន ៦៣គ្រឿង។ នេះជាការរួមចំណែកមួយរបស់ក្រុមអត្តពលិកនៃក្រសួងមហាផ្ទៃ ដែលអាចនាំយកមេដាយបានច្រើនជូនជាតិ ក្នុងនាមជាម្ចាស់ផ្ទះលើកដំបូងព្រឹត្តិការណ៍កីឡាស៊ីហ្គេម លើកទី៣២ឆ្នាំ២០២៣នេះ។

ជាមួយគ្នានោះ លោក សរ សិទ្ធិ អនុរដ្ឋលេខាធិការក្រសួងមហាផ្ទៃ ទទួលបន្ទុកក្រុមប្រឹក្សាកីឡាក្រសួងមហាផ្ទៃ បានមានប្រសាសន៍ថា៖ «ការចូលរួមចំណែកប្រជែងទទួលបានមេដាយជូនជាតិនេះ គឺជាមោទកភាពយ៉ាងក្រៃលែង»។ លោកបន្តថា អ្វីដែលកាន់តែអស្ចារ្យទៀតនោះក្នុងចំណោមអត្តពលិកជាតិដែលដណ្តើមបានមេដាយនោះ មានអត្តពលិកក្រសួងមហាផ្ទៃចំនួន ៣ រូប បានជាប់ជាអត្តពលិកឆ្នើមដោយដណ្តើមបានមេដាយច្រើនជាងគេ។

អត្តពលិកឆ្នើមទាំងនោះរួមមាន កីឡាការិនី ប៉ាល់ ឆរស្ម៊ី ទទួលបានមេដាយ ០៦គ្រឿង មាស០៤គ្រឿង ប្រាក់០១គ្រឿង សំរឹទ្ធ០១គ្រឿង លើវិញ្ញាសាវ៉ូវីណាម, កីឡាករ គង់ម៉ូណា មិថុរ៉ា ទទួលបានមេដាយ០៣គ្រឿង មាស២គ្រឿង សំរឹទ្ធ០១គ្រឿង លើវិញ្ញាសាជឺជីតស៊ូ និងកីឡាករ លី បូរ៉ាមី ទទួលបានមេដាយមាស ០៣គ្រឿង លើវិញ្ញាសាវ៉ូវីណាម៕