បុរសពិការពាក់ជើងឈើ ទទួលបានជើងសិប្បនិម្មិតថ្មី

បុរសពិការកំសត់ពាក់ជើងឈើ ត្រូវបានមជ្ឈមណ្ឌលស្តារលទ្ធភាពពលកម្មកាយសម្បទា ខេត្តបាត់ដំបង បានផ្តល់ជើងសិប្បនិម្មិតថ្មី ដើម្បីសម្រួលដល់ការធ្វើដំណើរ និងការងារប្រចាំថ្ងៃ។

មន្រ្តីមជ្ឈមណ្ឌលស្តារលទ្ធភាពពលកម្មកាយសម្បទា ខេត្តបាត់ដំបង បានឱ្យដឹងថា បុរសកំសត់រូបនេះមានឈ្មោះ យ៉ាន់ ហេង ជាជនរងគ្រោះថ្នាក់ដោយសារមីន និងពិការភាពជើងម្ខាង។

រាជរដ្ឋាភិបាល និងដៃគូអភិវឌ្ឍន៍នានា កំពុងជួយអភិវឌ្ឍន៍ និងកាត់បន្ថយភាពភាពក្រីក្ររបស់ជនពិការទាំងនៅក្នុងសហគមន៍ និងតាមទីជនបទឆ្ងាយៗ តាមរយៈការផ្តល់សេវាស្តារលទ្ធភាពពលកម្មកាយសម្បទាន ដល់ជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម និងជនពិការទូទៅ។

អាជ្ញាធរមីន បានឱ្យដឹងថា ខ្លួននឹងបន្តជួយកៀរគរធនធានពីប្រទេសម្ចាស់ជំនួយ និងដៃគូអភិវឌ្ឍន៍នានា ដើម្បីជួយឧបត្ថម្ភគាំទ្រដល់មជ្ឈមណ្ឌលស្តារលទ្ធភាពពលកម្មកាយសម្បទា នៅក្នុងប្រទេសកម្ពុជា ក្នុងការបន្តនិរន្តភាពផ្តល់សេវារបស់ខ្លួនដល់ជនរងគ្រោះថ្នាក់ដោយសារមីន និងស.ផ.ស និងជនពិការទូទៅឲ្យបានគ្រប់គ្រាន់ និងទាន់ពេលវេលា៕