ជប៉ុន នឹងផ្តល់ឥណទាន និងហិរញ្ញប្បទានឥតសំណងបន្ថែមទៀតដល់កម្ពុជា

លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក UENO Atsushi ឯកអគ្គរាជទូតជប៉ុនប្រចាំកម្ពុជា នឹងចុះហត្ថាលេខាលើលិខិតប្តូរសារ និងឯកសារពាក់ព័ន្ធមួយចំនួន ក្រោមសេចក្តីសម្រេច ដែលជប៉ុន នឹងផ្តល់ឥណទាន និងហិរញ្ញប្បទានឥតសំណងបន្ថែមទៀតដល់កម្ពុជា ទី១ គឺគម្រោងការធ្វើឱ្យប្រសើរឡើងវិញនូវផ្លូវជាតិលេខ៥ និងទី២ គម្រោងអាហាររូបករណ៍អភិវឌ្ឍន៍ធនធានមនុស្ស។ នេះបើតាមការឲ្យដឹង ពីនាយកដ្ឋានព័ត៌មាននៃក្រសួងការបរទេស និងសហប្រតិបត្តិការអន្តរជាតិ។

បើតាមការបញ្ជាក់ ការចុះហត្ថាលេខារវាងថ្នាក់ដឹកនាំតំណាងប្រទេសទាំងពីរ នឹងធ្វើឡើងនៅថ្ងៃទី២៤ ខែឧសភា នាទីស្តីការក្រសួង លើលិខិតប្តូរសារ និងឯកសារពាក់ព័ន្ធមួយចំនួនខាងក្រោមនេះ៖
១. ឥណទានសម្បទានប្រាក់យ៉េន ដែលមានទឹកប្រាក់ចំនួន ៧.២០៥ លានយ៉េន ដែលស្មើនឹងប្រមាណ ៥២,៦ លានដុល្លារអាមេរិក សម្រាប់អនុវត្ត «គម្រោងការធ្វើឱ្យប្រសើរឡើងវិញនូវផ្លូវជាតិលេខ៥ (កំណាត់ផ្លូវពីព្រែកក្តាម-ធ្លាម្អម) ដំណាក់កាលទី៤» ។

២. ហិរញ្ញប្បទានឥតសំណង ដែលមានទឹកប្រាក់ចំនួន ៣៦៦ លានយ៉េន (ប្រមាណ ២,៦៧ លានដុល្លារអាមេរិក) សម្រាប់អនុវត្ត «គម្រោងអាហាររូបករណ៍អភិវឌ្ឍន៍ធនធានមនុស្ស»។

បើតាមនាយកដ្ឋាន ការផ្តល់ជំនួយអភិវឌ្ឍន៍ផ្លូវការខាងលើ ជាការចូលរួមចំណែកដលល់កិច្ចខិតខំប្រឹងប្រែងអភិវឌ្ឍន៍​សេដ្ឋកិច្ច-សង្គម ជាបន្តបន្ទាប់ របស់រាជរដ្ឋាភិបាលកម្ពុជា ព្រមទាំងបង្កើតគការពង្រីកទំនាក់ទំនងល្អ និងកិច្ចសហប្រតិបត្តិការ ដែលកំពុងលូតលាស់លើគ្រប់វិស័យរវាងប្រជាជាតិទាំងពីរ៕