ព័ត៌មានជាតិ

ចែករំលែកបទពិសោធន៍ ស្វាយចន្ទីត្រូវការតែងមែក ទើបទទួលបានទិន្នផលច្រើន

បានផុស

២ years មុន

នៅ

ថ្ងៃចន្ទ ២២ ឧសភា ២០២៣

ដោយ

ស្វាយចន្ទីជាដំណាំកសិឧស្សាហកម្ម ដែលមានការដាំដុះច្រើនដើម្បីនាំចេញហើយទីផ្សារធំគឺប្រទេសវៀតណាម។ នៅខែឧសភាក្រោយប្រមូលផលរួច ដើមស្វាយចន្ទីចាំបាច់ត្រូវការសម្អាតដូចជាតែងមេឃ បាញ់ថ្នាំ និងកម្ចាត់ស្មៅជាដើម។

កសិកររស់នៅក្នុងភូមិ ព្រែករការ ឃុំសោប ស្រុកព្រែកប្រសប់ ខេត្តក្រចេះ ឈ្មោះ ប្រុស វី បានបង្ហាញពីវិធីតែងមេឃស្វាយចន្ទី ដើម្បីឲ្យស្វាយចន្ទីបានផ្លែល្អនិងទទួលបានទិន្នផលច្រើន។ កសិកររូបនេះបានរៀបរាប់ថា ដំណាំស្វាយចន្ទីត្រូវការពន្លឺព្រះអាទិត្យឲ្យបានគ្រប់គ្រាន់ ដូចនេះចាំបាច់ត្រូវកាត់មេឃឲ្យស្រឡះមិនត្រូវស្តាយឡើយ ពីព្រោះមេឃស្វាយចន្ទីច្រើនពេក ធ្វើឲ្យវាស្រូបយកសារធាតុបំប៉នមិនគ្រប់គ្រាន់។ បន្ថែមពីនេះ ការកាត់មេឃចេញគឺកាត់មែកចន្ទីណាដែលមិនល្អឬមែកណាដាប នៅពេលមានភ្លៀងធ្លាក់ស្លឹកនឹងដុះមកវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមបទពិសោធន៍ កសិកររូបនេះដំបូងក៏មិនបានតែងមែកដែរ ដោយគិតថាកាប់ទៅស្តាយតែដោយសារមានការណែនាំពីមិត្តភក្តិអាចឲ្យផលកើនឡើងច្រើន និងបានផ្លែល្អដូច្នេះហើយក្រោយប្រមូលផលរួចតែងតែតែងមេឃជាប់ជាប្រចាំ។

នៅពេលដែលតែងមេឃរួចហើយ ត្រូវបាញ់ថ្នាំស្មៅហើយដាក់ជីបំប៉នបន្ថែមទៀត។ បើតាមការអះអាងរបស់កសិករឈ្មោះ ប្រុស វី ដោយសារអនុវត្តតាមបច្ចេកទេសបានយ៉ាងត្រឹមត្រូវ ទើបស្វាយចន្ទីរបស់គាត់ទទួលបានផលច្រើនក្នុងមួយឆ្នាំៗ។ ក្រោយមើលឃើញផលកើនឡើង កសិកររូបនេះក៏ចង់ចែករំលែកបទពិសោធន៍ដល់អ្នកដាំស្វាយចន្ទីផ្សេងទៀតអាចយកវិធីសាស្រ្តនេះយកទៅអនុវត្តដើម្បីទទួលបានផលច្រើន បង្កើនប្រាក់ចំណូលបន្ថែមទៀត៕

អត្ថបទ៖ លី រតនា