ព័ត៌មានជាតិ

មន្ត្រីជាន់ខ្ពស់យុត្តិធម៌ អំពាវនាវពលរដ្ឋ សូមកុំបន្តចែកចាយព័ត៌មាន ទាក់ទងការចាប់ក្មេងៗ យកសរីរាង្គ

បានផុស

១ year មុន

នៅ

ថ្ងៃចន្ទ ២២ ឧសភា ២០២៣

ដោយ

លោកបណ្ឌិត គឹម សន្តិភាព អ្នកនាំពាក្យ និងរដ្ឋលេខាធិការក្រសួងយុត្តិធម៌ បានធ្វើការអំពាវនាវដល់ប្រជាពលរដ្ឋ សូមកុំបន្តចែកចាយនូវព័ត៌មានពុំមានប្រភពច្បាស់លាស់ ពិសេសព័ត៌មានមួយចំនួនទាក់ទងនឹងការចាប់ក្មេងៗ ដើម្បីយកសរីរាង្គ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្មីៗនេះ តាមបណ្ដាញសង្គមហ្វេសប៊ុក មានការចែកចាយតៗគ្នាថា «សូមអាណាព្យាបាលគ្រប់រូប គួរតែមានការប្រុងប្រយ័ត្នខ្ពស់ចំពោះកូនៗ ពេលចូលរៀន ព្រោះជនអនាមិក ចាប់ផ្ដើមដើរចាប់ក្មេងៗទៀតហើយ ខេត្តដែលប្រុងប្រយ័ត្នបំផុត គឺ ខេត្តកណ្ដាល ព្រៃវែង តាកែវ រតនគិរី មណ្ឌលគិរី កំពត កំពង់ចាម កំពង់ធំ កំពង់ស្ពឺ សូមអាជ្ញាធរមានសមត្ថកិច្ចជួយល្បាតតាមរបងសាលាផង និងមួយទៀតលើកឡើងថា ក្រុមអនាមិកចាប់ក្មេងវះក្រលៀនកំពុងស្ថិតក្នុងខេត្តកណ្ដាល និងតាកែវ សមត្ថកិច្ចកំពុងស្រាវជ្រាវសុំអាណាព្យាបាលរស់នៅក្នុងខេត្តពីរនេះ សូមប្រយ័ត្នឲ្យខ្ពស់បំផុត ក្មេងដែលបាត់នៅមិនទាន់ឃើញទេ»។

តាមរយៈបណ្ដាញសង្គមហ្វេសប៊ុកផ្លូវការរបស់ខ្លួន លោកបណ្ឌិត គឹម សន្តិភាព បានសរសេរថា «មួយរយៈនេះឃើញមានព័ត៌មានមួយចំនួនទាក់ទងនឹងការចាប់ក្មេងៗ ដើម្បីយកសរីរាង្គ។ ខ្ញុំសូមជម្រាបជូនថា សមត្ថកិច្ចកំពុងស្រាវជ្រាវយ៉ាងយកចិត្តទុកដាក់លើព័ត៌មានទាំងនេះ តែមកទល់ពេលនេះពុំមានតម្រុយណាមួយទាក់ទងនឹងករណីនេះទេ»។

លោកបានសរសេរទៀតថា ទន្ទឹមនេះ សមត្ថកិច្ចក៏កំពុងស្រាវជ្រាវផងដែរនូវប្រភពព័ត៌មានដែលកំពុងចែកចាយទាំងនេះ ដើម្បីស្វែងរកការពិតជូនពលរដ្ឋ។ លោកសូមលើកទឹកចិត្តសម្រាប់ការបង្ហាញព័ត៌មានពិត តែសម្រាប់អ្នកដែលបំពុលព័ត៌មាននេះ ក៏នឹងទទួលខុសត្រូវចំពោះមុខច្បាប់ផងដែរ។

លោកបានអំពាវនាវដល់ពលរដ្ឋ សូមកុំបន្តចែកចាយនូវព័ត៌មានពុំមានប្រភពច្បាស់លាស់ ដើម្បីចូលរួមថែរក្សាសណ្ដាប់ធ្នាប់ និងសុវត្ថិភាពសង្គម៕

អត្ថបទ ៖ សំអឿន