នគរបាលខេត្តបន្ទាយមានជ័យ ទទួលបានបាល់ពន្លត់អគ្គីភ័យ

បាល់ពន្លត់អគ្គិភ័យ ចំនួន៧២គ្រាប់ គិតជាទឹកប្រាក់ ចំនួន៦.៣៣៦ ដុល្លារអាមេរិក ត្រូវបានប្រគល់ជូនស្នងការខេត្តបន្ទាយមានជ័យ ដើម្បីយកទៅពន្លត់អគ្គិភ័យដែលកើតឡើងជាយថាហេតុ។

បាល់ពន្លត់អគ្គិភ័យទាំង៧២គ្រាប់នេះ ជាអំណោយរបស់ នាយឧត្តមសេនីយ៍ កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន និងជាប្រធានក្រុមការងារ ថ្នាក់ជាតិ ចុះជួយខេត្តបន្ទាយមានជ័យនិងលោកជំទាវ ម៉ៅ ម៉ាល័យ កែ គឹមយ៉ាន ហើយបានប្រគល់ជូនកាលពីរសៀលថ្ងៃទី២១ ខែមករា ឆ្នាំ២០២១។

លោកឧត្តមសេនីយ៍ទោ សិទ្ធិ ឡោះ ថ្នាក់ដឹកនាំស្នងការដ្ឋាននគរបាល ខេត្តបន្ទាយមានជ័យ បានថ្លែងអំណរគុណ ដល់នាយឧត្តមសេនីយ៍ កែ គឹមយ៉ាន និងលោកជំទាវ ដែលឧបត្ថម្ភឧបករណ៍ពន្លត់អគ្គិភ័យប្រភេទបាល់ពន្លត់ ហើយស្នងការដ្ឋាន នឹងប្រើប្រាស់ឧបករណ៍ទាំងអស់ឲ្យចំគោលដៅ ដើម្បីសង្រ្គោះដល់ប្រជាពលរដ្ឋដែលរងគ្រោះដោយអគ្គិភ័យ៕

អត្ថបទ ៖ វ៉ាន់ ណាង