កម្ពុជា-វៀតណាម រួមគ្នាបន្តពង្រឹងកិច្ចសហប្រតិបត្តិការរក្សាសន្តិភាព និងពង្រីកសេដ្ឋកិច្ច ពាណិជ្ជកម្ម

ក្នុងជំនួបសម្តែងការគួរសម នៃប្រតិភូក្រសួងទំនាក់ទំនងជាមួយរដ្ឋសភា-ព្រឹទ្ធសភា និងឣធិការកិច្ច ដឹកនាំដោយសម្តេចកិត្តិសង្គហបណ្ឌិត ម៉ែន សំអន ជាមួយឯកឧត្តម ផាម មិញជិញ នាយករដ្ឋមន្ត្រីវៀតណាម នៅទីក្រុងហាណូយ
នាថ្ងៃ​ទី២៦ ខែឧសភា ឆ្នាំ២០២៣ ភាគីទាំងពីរបានឯកភាព បន្តថែរក្សា និងពង្រឹងគ្រប់យន្តការទំនាក់ទំនងនៅគ្រប់ថ្នាក់រវាងគណបក្ស នៃប្រទេសទាំងពីរ ដើម្បីរួមគ្នាដោះស្រាយបញ្ហានានាឲ្យទាន់ពេលវេលា និងមានប្រសិទ្ធភាពតាមរយ:

លើសពីនេះទៀតភាគីទាំងខិតខំបន្តសហការគ្នាល្អ បន្ថែមទៀតដើម្បីផលប្រយោជន៍ នៃសន្តិភាព មិត្តភាព ការអភិវឌ្ឍ សេដ្ឋកិច្ច និងពាណិជ្ជកម្ម នៃប្រទេសទាំងពីរ ពិសេសឯកភាពលើការបង្កើនកិច្ចសហប្រតិបត្តិការ ការគាំទ្រគ្នានៅក្នុងអង្គការអន្តរជាតិ និងវេទិកាពហុភាគី ដើម្បីចូលរួមដោះស្រាយកិច្ចការតំបន់ និងពិភពលោក ។

ឈរលើស្មារតីនេះ ឯកឧត្តម ផាម មិញជិញ (Phạm Minh Chinh) បានថ្លែងនូវការកោតសសើរចំពោះកម្ពុជា ក្រោមការដឹកនាំប្រកបដោយកិត្តិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រី ដែលបានដឹកនាំប្រទេសឲ្យមានការរីកចម្រើនលើគ្រប់វិស័យយ៉ាងឆាប់រហ័ស។

ជាការឆ្លើយតប សម្តេចកិត្តិសង្គហបណ្ឌិត បានមានប្រសាសន៍ថា ៖ រាជរដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន នឹងបន្តខិតខំប្រឹងប្រែង ដើម្បីរួមចំណែកលើកកម្ពស់ទំនាក់ទំនងអ្នកជិតខាងល្អ មិត្តភាពប្រពៃណី កិច្ចសហប្រតិបត្តិការលើគ្រប់វិស័យ និងយូរអង្វែងរវាងប្រទេសទាំងពីរ។

នៅចុងបញ្ចប់ នៃជំនួបនេះ ភាគីទាំងពីរបានសម្តែងនូវការពេញចិត្តលើលទ្ធផលជាផ្លែផ្កា ដែលបានរួមចំណែកយ៉ាងសំខាន់ដល់ការពូនជ្រុំទំនាក់ទំនងមិត្តភាពជាប្រពៃណី សាមគ្គីភាពដ៏រឹងមាំ ភាពជា អ្នកជិតខាងល្អ និងពង្រឹងពង្រីកកិច្ចសហប្រតិបត្តិការដ៏ជិតស្និទ្ធរវាងគណបក្ស រដ្ឋាភិបាល និងប្រជាជននៃប្រទេសទាំងពីរតែម្ដង៕

អត្ថបទ៖ វិមាន