ព័ត៌មានជាតិ

ច្រកទាំង៣ ដែលកម្ពុជា អាចទទួលវ៉ាក់សាំងកូវីដ ១៩ មកចាក់ជូនពលរដ្ឋ

បានផុស

៤ years មុន

នៅ

ថ្ងៃសុក្រ ២២ មករា ២០២១

ដោយ

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា កម្ពុជាមិនមែនប្រើតែវ៉ាក់សាំង ដែលមកពីចិន នោះទេ ពោលគឺវ៉ាក់សាំងប្រទេសដទៃទៀត ក៏រដ្ឋាភិបាលស្វះស្វែងរកដើម្បីយកមកចាក់ជូនប្រជាពលរដ្ឋ។

មានប្រសាសន៍នៅក្នុងពីធីសម្ពោធអគារទីស្តីការថ្មីក្រសួងសាធារណការនិងដឹកជញ្ជូន និងវិទ្យាស្ថាន «តេជោសែន សាធារណការ និងដឹកជញ្ជូន» នៅព្រឹកថ្ងៃសុក្រនេះ សម្តេចតេជោបានលើកពីច្រកទ្វារ ៣ ដែលកម្ពុជា អាចរកវ៉ាក់សាំងកូវីដ១៩ គឺច្រកទី១ តាមរយៈគម្រោង COVAX ដែលជាគម្រោងរបស់អង្គការសុខភាពពិភពលោក ដែលមានសមាជិក១៩០ប្រទេស និងច្រកទី២ គឺការចរចាជាមួយដៃគូប្រទេស និងប្រទេស ដូចជាកម្ពុជាជាមួយចិន កម្ពុជាជាមួយឥណ្ឌា និងកម្ពុជាជាមួយកូរ៉េខាងត្បូង។

ចំណែកឯច្រកទី៣ រដ្ឋាភិបាលនឹងចរចាផ្ទាល់ជាមួយក្រុមហ៊ុន ដូចជាក្រុមហ៊ុនវ៉ាក់សាំងរបស់អង់គ្លេសជាដើម។

ក្រោយពេលចិនប្រកាសផ្តល់ជំនួយវ៉ាក់សាំងកូវីដ ១៩ ដល់កម្ពុជា ប្រមុខរដ្ឋាភិបាលបានសរសេរលិខិតជូនទៅនាយករដ្ឋមន្ត្រីឥណ្ឌា និងកំពុងពិចារណាដាក់សំណើទៅប្រធានាធិបតីកូរ៉េខាងត្បូង ដើម្បីពិនិត្យលទ្ធភាពក្នុងការផ្គត់ផ្គង់ វ៉ាក់សាំងជូនដល់កម្ពុជា។

រដ្ឋាភិបាលកម្ពុជា ក៏កំពុងពិភាក្សាដើម្បីប្រើប្រាស់វ៉ាក់សាំងរបស់អង់គ្លេស ហៅថា AstraZeneca ដែលអាចរក្សាទុកក្នុងសីតុណ្ហភាព ពី២ ដល់៨ អង្សា ដោយប្រើប្រាស់នូវឥណទានរបស់ធនាគារអភិវឌ្ឍអាស៊ី (ADB)។

បើតាមប្រមុខរដ្ឋាភិបាល នៅពេលវ៉ាក់សាំងរបស់ចិនមកដល់នៅអំឡុងខែកុម្ភៈ សម្តេចនឹងចេញទៅទទួលដោយផ្ទាល់ ព្រោះនេះជាទំនិញយុទ្ធសាស្ត្រ និងជាសុវត្ថិភាពសម្រាប់ប្រជាជនកម្ពុជា។ ការចាក់វ៉ាក់សាំងកូវីដដល់ប្រជាពលរដ្ឋគឺដោយឥតគិតថ្លៃ ដោយឈរលើគោលការណ៍ស្ម័គ្រចិត្ត៕