ព័ត៌មានជាតិ

លោក អ៊ុ សុភា នាំអំណោយ ឯកឧត្ដម ហ៊ុន ម៉ាណែត ផ្ដល់ជូនពលរដ្ឋរងគ្រោះដោយខ្យល់កន្ត្រាក់ ៣ គ្រួសារ ក្នុងឃុំកំពង់ហាវ

បានផុស

២ years មុន

នៅ

ថ្ងៃអង្គារ ៣០ ឧសភា ២០២៣

ដោយ

លោកឧត្ដមសេនីយ៍ត្រី អ៊ុ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្តកំពង់ឆ្នាំង កាលពីព្រឹកថ្ងៃទី ២៩ ខែឧសភា ឆ្នាំ ២០២៣ បានដឹកនាំក្រុមការងារមនុស្សធម៌ និងក្រុមការងារយេនឌ័ររបស់អង្គភាព សហការជាមួយអាជ្ញាធរ ស្រុក ឃុំ នាំយកអង្ករចំនួន ១៥០ គីឡូក្រាម ,ស័ង្កសី ៩០ សន្លឹក, ស៊ីម៉ង់ ៦ បេ, មី ០៣ កេះ ,ទឹកត្រី ០៣ យួរ, ទឹកស៊ីអ៊ីវ ០៣ យួរ ,ត្រីខ ០៣ យួរ , មុង ០៣ មុង ,ម៉ាស់ ០៣ ប្រអប់ រួមនឹងថវិកាមួយចំនួន ដែលជាអំណោយដ៏ថ្លៃថ្លារបស់ ឯកឧត្ដមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ហ៊ុន ម៉ាណែត ឧបត្ថម្ភដល់ប្រជាពលរដ្ឋ ០៣ គ្រួសារ រងគ្រោះដោយខ្យល់កន្ត្រាក់ បោករលំផ្ទះអស់ទាំងស្រុង កាលពីថ្ងៃទី ២៧ ខែឧសភា ឆ្នាំ ២០២៣ នៅឃុំកំពង់ហាវ ស្រុកកំពង់លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសផ្ដល់អំណោយដ៏ថ្លៃថ្លាខាងលើនេះ លោកមេបញ្ជាការតំបន់ប្រតិបត្តិការសឹករងកំពង់ឆ្នាំង ក៏បានពាំនាំនូវការផ្ដាំផ្ញើសួរសុខទុក្ខពីសំណាក់ឯកឧត្ដមបណ្ឌិត ហ៊ុន ម៉ាណែត និងលោកអភិបាលខេត្តកំពង់ឆ្នាំង ដែលជានិច្ចកាលតែងតែយកចិត្តទុកដាក់គិតគូរអំពីសុខទុក្ខរបស់ប្រជាពលរដ្ឋនៅគ្រប់មូលដ្ឋាន ពិសេសអ្នករងគ្រោះថ្នាក់ធម្មជាតិផ្សេងៗ ដោយមិនរើសអើង ឬប្រកាន់និន្នាការនយោបាយឡើយ។

ជាមួយគ្នានេះ លោកមេបញ្ជាការ ក៏សូមអំពាវនាវដល់ប្រជាពលរដ្ឋទាំងអស់នៅក្នុងខេត្តកំពង់ឆ្នាំងផងដែរ សូមនាំគ្នាទៅបោះឆ្នោតជ្រើសរើសតំណាងរាស្ត្រអាណត្តិទី ៧ ដែលនឹងប្រព្រឹត្តទៅនៅថ្ងៃទី ២៣ ខែកក្កដា ឆ្នាំ ២០២៣ ខាងមុខនេះ ជ្រើសរើសថ្នាក់ដឹកនាំប្រទេសខ្លួនស្រឡាញ់ ដើម្បីអភិវឌ្ឍន៍ប្រទេសជាតិឲ្យមានការរីកចម្រើនលើគ្រប់វិស័យ និងទទួលបានសុខសន្តិភាពរហូតតទៅ៕

អត្ថបទ ៖ ឈៀង ថារិទ្ធ