ប្រធានគណបក្សធម្មាធិបតេយ្យអះអាងថា ការមិនបានចុះបញ្ជីគណបក្សភ្លើងទៀនជាកលល្បិចនយោបាយ​

ប្រធានគណបក្សធម្មាធិបតេយ្យលោកស្រី ពោធិតី សាវត្ថី នៅថ្ងៃទី ៣១ ខែឧសភានេះ បានបង្ហាញជំហរគាំទ្រការសម្រេចរបស់គណៈកម្មាធិការជាតិរៀបចំការបោះឆ្នោត (គ.ជ.ប) និងក្រុមប្រឹក្សាធម្មនុញ្ញដែលបដិសេធលើការចុះបញ្ជីដល់គណបក្សភ្លើងទៀន សម្រាប់បោះឆ្នោតតំណាងរាស្រ្ត អាណត្តិទី៧ ដោយសារតែគណបក្សនេះ មិនបំពេញឱ្យគ្រប់លក្ខខណ្ឌច្បាប់ឯកសារច្បាប់ដើម។

ថ្លែងនៅក្នុងសន្និសីទសារព័ត៌មាននៅថ្ងៃ ៣១ ខែឧសភានេះ លោកស្រី ពោធិតី សាវត្ថី បានអះអាងថា គ.ជ.ប ធ្វើបានត្រឹមត្រូវតាមច្បាប់ ខណៈលោកស្រីស្នើឱ្យ គ.ជ.ប អញ្ជើញគណបក្សនយោបាយទាំងអស់ និងតំណាងទូតនៅកម្ពុជា ហើយឱ្យគណបក្សទាំងអស់យកលិខិតច្បាប់ដើមដាក់លើតុទាំងអស់គ្នាដើម្បីបញ្ជាក់តម្លាភាព។

លោកស្រី ពោធិតី សាវត្ថីបន្តថា ការធ្វើបែបនេះ ដើម្បីប្រាប់ទៅអន្តរជាតិឱ្យដឹងថា ក្រុមប្រឆាំងកំពុងដើរផ្ទុយពីច្បាប់នៅក្នុងស្រុក ហើយកុំឱ្យបរទេសលូកដៃចូលជ្រៀតជ្រែកកិច្ចការផ្ទៃក្នុងកម្ពុជាដែលនាំទៅរកសង្គ្រាមដូចប្រទេសអ៊ុយក្រែន។

​លោកស្រី ពោធិតី សាវត្ថី បានអះអាងថា ​ការមិនបានចុះបញ្ជីរបស់គណបក្សភ្លើងទៀន​ជាកលល្បិចរបស់មេដឹកនាំគណបក្សមួយនេះនាំកម្ពុជាទៅរកសង្គ្រាម។

លោកស្រី ពោធិតី សាវត្ថី បញ្ជាក់ថា៖ «ខ្ញុំមិនជឿថា បាត់ទេ ជាល្បិចកលនយោបាយ ពីមុនខ្ញុំជឿថាបាត់មែន ប៉ុន្តែក្រោយពីខ្ញុំទៅសហគមន៍អឺរ៉ុប ហើយត្រឡប់មកវិញ ខ្ញុំជឿថាអត់បាត់ជាដាច់ខាត។ ជាហ្គេមមួយ​គេកំពុងលេងជាមួយមហាអំណាច​ដើម្បីបំផ្លាញកម្ពុជា»។

គណៈកម្មាធិការជាតិរៀបចំការបោះឆ្នោត កាលពីរសៀលថ្ងៃទី ១៥ ខែឧសភា ឆ្នាំ ២០២៣ បានសម្រេចបដិសេធលើការចុះបញ្ជីរបស់គណបក្សភ្លើងទៀនឈរឈ្មោះបោះឆ្នោតតំណាងរាស្រ្ត អាណត្តិទី៧ ដោយសារគណបក្សនេះ មិនបានបំពេញគ្រប់លក្ខខណ្ឌ និងមិនបានភ្ជាប់មកជាមួយនូវប្រកាស ក្នុងការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យា​នុកូលកម្ម៕