ព័ត៌មានជាតិ

បង្កងតាកែវល្បីរសជាតិឆ្ងាញ់ មិនទាន់ធំធាត់អាចផ្គត់ផ្គង់ទីផ្សារគ្រប់នៅឡើយ

បានផុស

១ year មុន

នៅ

ថ្ងៃព្រហស្បតិ៍ ១ មិថុនា ២០២៣

ដោយ

បើតាមការគូសបញ្ជាក់របស់លោក ស៉ាប់ សារុន ប្រធានសមាគមបង្កងខេត្តតាកែវបានឱ្យដឹងនៅថ្ងៃទី ០១ ខែមិថុនា ឆ្នាំ២០២៣នេះថា បង្កងខេត្តតាកែវបច្ចុប្បន្ន នៅមិនទាន់មានលក្ខណៈធំធាត់ល្អគ្រប់គ្រាន់អាចនាំចេញមកផ្គត់ផ្គង់នៅតាមទីផ្សារបាននោះទេ ព្រោះបង្កងនៅមិនទាន់មានលក្ខណៈវិលជុំបាននៅឡើយ។

លោក ស៉ាប់ សារ៉ុន បានបន្តថា ក្នុងពេលបច្ចុប្បន្ននេះ នៅតាមសមាគមនានា ក៏ដូចជាសមាគមរបស់លោកផ្ទាល់ ការប្រមូលផលបង្កងនៅមានភាពរអាក់រអួល មិនទាន់អាចវិលជុំបាន សម្រាប់យកទៅផ្គត់ផ្គង់នៅលើទីផ្សារបាននៅឡើយទេ តែជាក់ស្ដែង គឺអាចផ្គត់ផ្គង់បានតែសម្រាប់ទីផ្សារក្នុងខេត្តបន្តិចបន្តួចប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៉ាប់ សារ៉ុនបញ្ជាក់៖ «ដោយសារតែបច្ចុប្បន្ន ការផ្គត់ផ្គង់បង្កងសម្រាប់ទីផ្សារ មិនទាន់អាចបានគ្រប់គ្រាន់ ជាហេតុធ្វើឱ្យទីផ្សារបង្កងនៅមានលក្ខណៈខ្វះខាត ទើបបណ្ដាលឱ្យមានការនាំចូលបង្កងនានា សម្រាប់បំពេញតម្រូវការប្រជាពលរដ្ឋជាដើម»។

បើតាមប្រធានសមាគមរូបនេះ នៅពេលដែលប្រជាពលរដ្ឋក្នុងសមាគម អាចមានលទ្ធភាព ផ្គត់ផ្គង់បាន នោះ នឹងមានចាត់វិធានការ រៀបចំនៅតាមទីផ្សារឱ្យមានភាពល្អប្រសើរ ហើយការងារនេះក៏ត្រូវមានការជួយអន្តរាគមន៍ ពីខាងក្រសួងពាណិជ្ជកម្ម ដើម្បីកុំឱ្យមានការក្លែងបន្លំពីការនាំចូលបង្កងដទៃថាជាបង្កងរបស់ខេត្តតាកែវ។

លោកក៏បានបញ្ជាក់បន្ថែមថា ដើម្បីអាចផ្គត់ផ្គង់បង្កងនៅលើទីផ្សារបានល្អប្រសើរលុះត្រាតែបង្កងអាចប្រមូលផលបានក្នុង ១ថ្ងៃពី កន្លះតោន ដល់ ១តោន ហើយបង្កងទាំងអស់នោះ ក៏ត្រូវមានសភាពធំធាត់ល្អផងដែរ។

ជាមួយគ្នានេះ លោក ស៉ាប់ សារ៉ុន បានលើកឡើងបន្តថា នៅពេលបង្កង ដល់ពេលអាចប្រមូលផលបានល្អ នោះខាងសមាគម ក៏ដូចជាក្រសួងពាណិជ្ជកម្ម នឹងបើកកិច្ចប្រជុំបន្ថែម ជាមួយម្ចាស់សមាគមចិញ្ចឹមបង្កងនានានៅក្នុងខេត្ត ដើម្បីត្រៀមរៀបចំផែនការដើម្បីទប់ស្កាត់ ពីការក្លែងបន្លំបង្កងនាំចូល។

ម្យ៉ាងវិញទៀត បង្កងខេត្តតាកែវ ក៏បង្កងមានអាជ្ញាប័ណ្ណច្បាស់លាស់ នឹងមានបិទស្លាកសញ្ញា ក៏ដូច ជាប័ណ្ណសម្គាល់ជាដើម ដើម្បីបញ្ជាក់ច្បាស់ថាជាបង្កងនាំចេញពីខេត្តតាកែវពិតប្រាកដ។

លោកប្រធានសមាគមបញ្ជាក់ថា បង្កងនៅក្នុងខេត្តតាកែវ មិនថាជាបង្កងចិញ្ចឹម ឬជាបង្កងយកចេញពីក្នុងបឹងទេ ត្រូវតែធានាបានថា ជាបង្កងដែលមានរសជាតិឆ្ងាញ់ គ្រាន់តែបង្កងដែល យកចេញពីក្នុងបឹង អាចនិយាយបានថា ជាបង្កងលេខមួយ ហើយបង្កងចិញ្ចឹមទឹកសាប គ្រាន់តែខុសពីបង្កងធម្មជាតិបន្តិចបន្តួច តែរសជាតិ គឺប្រហាក់ប្រហែលនឹងបង្កងធម្មជាតិដែរ។

នៅក្នុងខេត្តតាកែវ មានកសិដ្ឋានចិញ្ចឹមបង្កងសរុបប្រមាណជិត ១០ កសិដ្ឋាន ដែលបូកសរុបទាំងតូចទាំងធំ ហើយបង្កងពេលនេះ ចំពោះតម្លៃ លក់ទូទៅដល់ប្រជាពលរដ្ឋបរិភោគនៅក្នុងស្រុក ១គីឡូក្រាម មានតម្លៃ ២០ដុល្លា ដោយឡែកចំពោះទីផ្សារខាងក្រៅ លោកនៅមិនទាន់អាចបញ្ជាក់បាននោះទេ។

គួររំលឹកបន្ថែមថា បង្កងទឹកសាបនៅក្នុងខេត្តតាកែវ ទើបតែត្រូវបានក្រសួងពាណិជ្ជកម្មចុះបញ្ជីម៉ាកសម្គាល់ភូមិសាស្ត្រទំនិញកាលពីថ្ងៃទី២៦ ខែមេសា ឆ្នាំ២០២៣កន្លងទៅនេះ។ ហើយការចុះបញ្ជីសម្គាល់ភូមិសាស្ត្រនេះ ក្រសួងពាណិជ្ជកម្ម បានដាក់ក្តីរំពឹងថា នឹងអាចជួយឱ្យដល់ផលិតករ អាជីវករ និងប្រតិបត្តិ ករ ក្រុមហ៊ុនកែច្នៃ វេចខ្ចប់ ក្នុងការនាំចេញទៅលក់នៅទីផ្សារអន្តរជាតិបន្ថែមទៀត៕

ដោយ៖ ថារី

Related Topics:បង្កងតាកែវ