ក្រសួងសុខាភិបាលបន្តក្រើនរំលឹកពីការចាក់វ៉ាក់សាំងកូវីដ-១៩ ខណ:បណ្តាប្រទេសមួយចំនួនកំពុងមានការឆ្លង វីរុសបំប្លែងថ្មី Omicron XBB.1.5

គណ:កម្មការចំពោះកិច្ចចាក់វ៉ាក់សាំងកូវីដ-១៩ (គ.វ.ក.១៩) បានធ្វើការក្រើនរម្លឹក ដល់សាធារណជនអំពីការចាក់វ៉ាក់សាំងកូវីដ-១៩ ដូសជំរុញតាមគោលការណ៍ស្ម័គ្រចិត្ត ដោយគម្លាតនៃការចាក់វ៉ាក់សាំងកូវីដ-១៩ ដូសជំរុញចាប់ពី៦ខែឡើង បន្ទាប់ពីចាក់ដូសចុងក្រោយ។

តាមរយ:ការក្រើនរម្លឹកនៅព្រឹកថ្ងៃទី០២ ខែមិថុនា ឆ្នាំ២០២៣នេះ ក្រសួងសុខាភិបាលបានបញ្ជាក់អំពីការចាក់វ៉ាក់សាំងកូវី-១៩នៅក្នុងប្រទេសកម្ពុជាដូចតទៅ៖

-ចំពោះកុមារ ដែលមានអាយុចាប់ពី៣ឆ្នាំ ដល់អាយុក្រោម៥ឆ្នាំទាំងអស់ដែលបានចាក់វ៉ាក់សាំងកូវី-១៩ ដូសទី១ និងដូសទី២ (ដូសមូលដ្ឋាន) រួចរាល់ ហើយមានគម្លាតចាប់ពី៦ខែឡើង បន្ទាប់ពីចាក់ដូសចុងក្រោយ។ សូមអាណាព្យាបាលរួសរាន់នាំកូន ក្មួយ ឬចៅ ទៅទទួលយកការចាក់វ៉ាក់សាំងកូវី-១៩ ដូសទី៣ ឬដូសទី៤ ឲ្យបានគ្រប់ៗគ្នា។

-ចំពោះកុមារ ដែលមានអាយុចាប់ពី៥ឆ្នាំ ដល់អាយុក្រោម១២ឆ្នាំទាំងអស់ដែលបានចាក់វ៉ាក់សាំងកូវី-១៩ ដូសទី១ និងដូសទី២ (ដូសមូលដ្ឋាន) រួចរាល់ ហើយមានគម្លាតចាប់ពី៦ខែឡើង បន្ទាប់ពីចាក់ដូសចុងក្រោយ។ សូមអាណាព្យាបាលរួសរាន់នាំកូន ក្មួយ ឬចៅ ទៅទទួលយកកការចាក់វ៉ាក់សាំងកូវី-១៩ ដូសទី៣ ដូសទី៤ ឬដូសទី៥ ឲ្យបានគ្រប់ៗគ្នា។

-ចំពោះប្រជាជនដែលមានអាយុចាប់ពី១២ឆ្នាំឡើងទៅទាំងអស់ដែលបានចាក់វ៉ាក់សាំងកូវីដ-១៩ ដូសទី១ និងដូសទី២ ឬបានចាក់វ៉ាក់សាំងចនសុន និងចនសុន (ដូសមូលដ្ឋាន) រួចរាល់ហើយមានគម្លាតចាប់ពី៦ខែឡើង បន្ទាប់ពីចាក់វ៉ាក់សាំងកូវីដ-១៩ ដូសចុងក្រោយ។ សូមរួសរាន់ទៅចាក់វ៉ាក់សាំងកូវីដ-១៩ ដូសទី៣ ដូសទី៤ និងដូសទី៥ ឬដូសទី៦ ឲ្យបានគ្រប់ៗគ្នា។

ចំពោះទីតាំងចាក់វ៉ាក់សាំងកូវីដ-១៩ ដែលត្រូវចាក់ជូនគ្រប់ក្រុមដែលបានរៀបរាប់ខាងលើ គឺមាននៅតាមមូលដ្ឋានសុខាភិបាលសាធារណ: រួមមានមន្ទីពេទ្យជាតិ មន្ទីពេទ្យបង្អែក និងមណ្ឌលសុខភាព ទូទាំងរាជធានី-ខេត្តទាំ២៥។

សូមបញ្ជាក់ថា ក្នុងរយ:ពេលថ្មីៗនេះ វីរុសកុវីដ-១៩បំប្លែងថ្មី Omicron XBB.1.5 និងពពួកថ្មីៗទៀត កំពុងមានការឆ្លងរីករាលដាលនៅតាមបណ្តាប្រទេសមួយចំនួននៅលើសាកលលោក និងនៅក្នុងតំបន់៕