រដ្ឋមន្ត្រីសុខាភិបាលចាក់វ៉ាក់សាំងដល់ដូសទី ៨ ហើយទទូចឱ្យពលរដ្ឋទៅចាក់វ៉ាក់សាំងដូសជំរុញការពារកូវីដបំប្លែងថ្មី

លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមប្រឹក្សាភិបាលសាកលវិទ្យាល័យវិទ្យាសាស្រ្តសុខា​ភិបាលបានជំរុញឱ្យប្រជាពលរដ្ឋនាំគ្នាទៅចាក់វ៉ាក់សាំងដូសជំរុញបន្ថែមទៀត ដើម្បីឱ្យមានភាពស៊ាំទប់ស្កាត់ការឆ្លងជំងឺកូវីដ-១៩ ពិសេសវីរុសបំប្លែងថ្មីៗ។

ថ្លែងក្នុងឱកាសដឹកនាំក្រុមគ្រូពេទ្យស័្មគ្រចិត្តរបស់សាកលវិទ្យាល័យវិទ្យាសាស្រ្តសុខាភិបាលចុះពិនិត្យព្យាបាលជំងឺជូនប្រជាពលរដ្ឋដោយមិនគិតថ្លៃនៅសង្កាត់គោកឃ្លាង ខណ្ឌសែនសុខ រាជធានីភ្នំពេញនៅព្រឹកថ្ងៃទី ០២ ខែមិថុនានេះ លោករដ្ឋមន្ត្រី បានមានប្រសាសន៍ថា ការចាក់ដូសជំរុញនេះសម្រាប់កុមារអាយុ៣ឆ្នាំ ត្រូវចាក់ដូសទី៣ និងដូសទី ៤អាយុចាប់ពី៥ឆ្នាំដល់១២ឆ្នាំចាក់ដូសជំរុញទី៤, ទី៥ ទី៦ទី៧ជាហូរហែរក្នុងចន្លោះពី៦ខែបន្ទាប់ពីចាក់ដូសជំរុញនីមួយៗរួច។

លោករដ្ឋមន្ត្រីបានបន្តថា «ខ្ញុំចាក់ដូសជំរុញទី៨ហើយការចាក់នេះមិមែនខ្ញុំខ្លាចឈឺជាងគេទេប៉ុន្តែត្រូវតែចាក់ការពារព្រោះថា ពេលឈឺវាមិនមែនស្រួលទេបើយើងចាក់ការពារបានងាយស្រួលអត់ឈឺយើងអាចធ្វើកិច្ចការងារផ្សេងៗបានហើយកុមារអាចទៅរៀនសូត្របានត្រឹមត្រូវតាមម៉ងតាមពេលនិងលេងបាន។ ឥឡូវនេះសូមបងប្អូននាំកូនចៅទៅចាក់ដូសជំរុញនៅមណ្ឌលសុខភាពដើម្បីការពារការឆ្លងជំងឺកូវីដ១៩ទាំងអស់គ្នា»។

ជាមួយគ្នានេះដែរ លោករដ្ឋមន្ត្រីក៏បានណែនាំឱ្យបងប្អូនប្រជាពលរដ្ឋត្រូវអនុវត្តវិធានការ៣ការពារនិង៣កុំឱ្យបានល្អនិងខ្ជាប់ខ្ជួននិងកុំភ្លេចធ្វើអនាម័យដូចជាលាងសំអាតដៃជាមួយសាប៊ូ អាកុលនិងពេលជួបជុំគ្នាត្រូវពាក់មាសហើយពេលចាក់ដូសទី៥ទី៦ហើយក៏ដោយក៏ត្រូវបន្តចាក់ដូសទី៧ឬទី៨ជាបន្តបន្ទាប់ដើម្បីការពារកុំឱ្យឆ្លងជំងឺកូវីដ១៩។

គួរបញ្ជាក់ថា គិតចាប់ពីថ្ងៃទី១០ខែកម្ភៈឆ្នាំ២០២១ រហូតមកដល់ថ្ងៃទូ០១ ខែមិថុនា ឆ្នាំ២០២៣ កម្ពុជាបានចាក់វ៉ាក់សាំងដូសទី១បានចំនួន ១៥ ២៨៩ ៧៩២ នាក់ ដូសទី២ ចំនួន ១៤ ៦៦២ ៩៨៨នាក់ ដូសទី៣ចំនួន ១០ ៦៦១ ១៨០​នាក់ដូសទី៤ចំនួន ៥ ២២០ ៥២៤ នាក់ ដូស ទី៥ចំនួន ១ ៨៦៩ ៩១៦ នាក់ និងដូសទី៦បានចំនួន ៤២៦ ៥០៧នាក់។លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦លាន នាក់មាន ៩៥,៥៦%៕

អត្ថបទ៖ សំអឿន