កម្មករជិត ៩០០០នាក់ រងប៉ះពាល់ដោយវិបត្តិសេដ្ឋកិច្ចសកល​ទទួលបានប្រាក់ឧបត្ថម្ភលើកទី១​ពីរដ្ឋាភិបាល

កម្មករនិយោជិតសរុបចំនួន ៨៨៣១នាក់ ក្នុងវិស័យវាយនភណ្ឌ កាត់ដេរផលិតស្បែកជើងផលិតផលធ្វើដំណើរ និងកាបូបដែលដែលព្យួរការងារ ដោយសារវិបត្តិសេដ្ឋកិច្ចសកលទទួលបានប្រាក់ឧបត្ថម្ភលើកទី១ពីរដ្ឋាភិបាល។

យោងតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ស្តីពីការបើកផ្ដល់ប្រាក់ឧបត្ថម្ភ លើកទី១ ដែលទើបចេញផ្សាយ នៅថ្ងៃទី០២ មិថុនានេះ បានឱ្យដឹងថាចំពោះការបើកប្រាក់ឧបត្ថម្ភនេះរាជរដ្ឋាភិបាល​ធ្វើឡើង​តាមរយៈធនាគារវីង ដែលផ្ញើសារចូលទៅក្នុងទូរស័ព្ទដៃរបស់កម្មករនិយោជិតដែលបានផ្តល់​ឲ្យក្រសួងតាមរយៈ​រដ្ឋបាលរោងចក្រនិងសហគ្រាសនាពេលកន្លងមក។

 ប្រាក់ឧបត្ថម្ភនេះ នឹងត្រូវបើកផ្តល់ជាប្រាក់រៀល និងអាស្រ័យលើចំនួនថ្ងៃ នៃការព្យួរកិច្ចសន្យាការងារ ក្នុងនោះទឹក​ប្រាក់ចំនួន៨១០០០រៀលស្មើនឹង២០ដុល្លារសម្រាប់ការព្យួរកិច្ចសន្យាការងាររយៈពេលពីដល់៧ថ្ងៃដល់១៤ខែ។ទឹកប្រាក់១៦២០០០រៀល ស្មើនឹង៤០ដុល្លារអាមេរិកសម្រាប់ព្យួរការងាររយៈពេល១៥ថ្ងៃដល់១ខែ។

ក្រសួងបានរំលឹកថា ធនាគារឯកទេសវីង នឹងបង្វិលប្រាក់ឧបត្ថម្ភនេះ ជូនរាជរដ្ឋាភិបាលវិញ ប្រសិនជាបងប្អូនខកខាន មិនបានទៅបើកប្រាក់ឧបត្ថម្ភនេះ ក្នុងរយៈពេល១០ថ្ងៃ បន្ទាប់ពីទទួលបានសារតាមទូរស័ព្ទពីធនាគារឯកទេសវីង ដោយត្រូវយកអត្តសញ្ញាណបណ្ណសញ្ជាតិខ្មែរ និងទូរសព្ទដែលទទួលបានសារនោះទៅកាន់ភ្នាក់ងារវីង ដែលនៅជិត​បំផុតដើម្បីបើកប្រាក់ឧបត្ថម្ភនេះហើយរាល់ការបើកប្រាក់នេះគឺមិនតម្រូវឲ្យបង់ថ្លៃសេវាឡើយ។

ក្នុងករណីបងប្អូនកម្មករនិយោជិត ដែលបម្រើការងារនៅរោងចក្រ សហគ្រាស ទាំង១៩នេះ មិនបានទទួលសារ ទូរសព្ទពីធនាគារឯកទេសវីង នោះត្រូវធ្វើទំនាក់ទំនងសួរព័ត៌មានបន្ថែម ឬធ្វើបច្ចុប្បន្នភាពលេខទូរសព្ទរបស់ខ្លួន ទៅរដ្ឋបាលរោងចក្រ សហគ្រាសរបស់ខ្លួនជាបន្ទាន់៕

អត្ថបទ៖ សំអឿន