លោក ប្រាក់ សុខុន នឹងទៅចូលរួមពិធីចូលកាន់តំណែងជាផ្លូវការរបស់ប្រធានាធិបតីតួកគី

ប្រមុខការទូតកម្ពុជានឹងធ្វើជាតំណាងរបស់សម្ដេចតេជោ ហ៊ុន សែន ដើម្បីចូលរួមក្នុងពិធីចូលកាន់តំណែងជាផ្លូវការរបស់លោកប្រធានាធិបតីតួកគី។ នេះបើតាមសេចក្ដីប្រកាសរបស់ក្រសួងការបរទសកម្ពុជា នៅរសៀលថ្ងៃទី២ ខែមិថុនានេះ។

សេចក្ដីប្រកាស បានឲ្យដឹងថា តបតាមការអញ្ជើញរបស់វិមានប្រធានាធិបតីនៃសាធារណរដ្ឋតួកគី លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ ដែលជាតំណាងរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា នឹងទៅចូលរួមក្នុងពិធីចូលកាន់តំណែងជាផ្លូវការរបស់លោកប្រធានាធិបតីតួកគី ដែលនឹងប្រព្រឹត្តទៅនៅថ្ងៃទី៣ ខែមិថុនា ឆ្នាំ២០២៣ នៅរដ្ឋធានីអង់ការ៉ា។​

បើតាមសេចក្ដីប្រកាសដដែលនេះ កម្ពុជា និងតួកគី មានចំណងមិត្តភាពស្និទ្ធស្នាល និងរឹងមាំ និងមានកិច្ចសហប្រតិបត្តិការយ៉ាងជិតស្និទ្ធប្រកបដោយថាមវន្តលើគ្រប់វិស័យ ដែលផ្តល់ផលប្រយោជន៍ទៅវិញទៅមក។

សេចក្ដីប្រកាស បន្តថា វត្តមានរបស់លោកឧបនាយករដ្ឋមន្រ្តី ប្រាក់ សុខុន​ នៅក្នុងពិធីដ៏មានសារៈសំខាន់ខាងលើ នឹងរួមចំណែកពង្រឹងបន្ថែមទៀតនូវជំនឿទុកចិត្តផ្នែកនយោបាយទៅវិញទៅមក និងលើកកម្ពស់បន្ថែមទៀតនូវទំនាក់ទំនងដែលកំពុងរីកលូតលាស់ រវាងប្រទេសទាំងពីរ៕