៥ខែឆ្នាំនេះ កម្ពុជា ទទួលបានគម្រោងវិនិយោគចំនួន៦៤ សរុបទុនជាង ៥៤០លានដុល្លារ

នៅក្នុងរយៈពេល៥ខែឆ្នាំ២០២៣នេះ គម្រោងវិនិយោគចំនួន៦៤ក្រុមហ៊ុន ដែលមានទុនវិនិយោគចំនួន ៥៤០,៧៤លានដុល្លារ ត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តដោយផ្តល់ឱកាសការងារ​ជូនប្រជាពលរដ្ឋចំនួន៧៨២៩២កន្លែង។

ចំនួននេះបើធៀបទៅនឹងរយៈពេល៥ខែដូចគ្នាឆ្នាំ២០២២កន្លងទៅឃើញថា មានការថយចុះគួរឱ្យកត់សម្គាល់ ខណៈ ៥ខែឆ្នាំ២០២២ CDC បានអនុម័តគម្រោងវិនិយោគចំនួន ៧២ក្រុមហ៊ុនដែលមានទុនវិនិយោគជាង២៦៤៨​លានដុល្លារអាមេរិកនិងផ្តល់ឱកាសការងារជូនប្រជាពលរដ្ឋចំនួន ៤៤៦៥៩កន្លែង។

យោងតាមរបាយការណ៍ប្រចាំថ្ងៃរបស់ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា​ក្នុងចំណោមគម្រោងវិនិយោគចំនួន​៦៤ ក្រុមហ៊ុនក្នុងនោះ​ក្នុងខែមករាមានគម្រោងវិនិយោគចំនួន ១០មានទុនវិនិយោគចំនួន​ ៩៩,៤លានដុល្លារ​ ផ្តល់​ឱកាសការងារបាន ១៧១២៩ កន្លែង។ ខែកម្ភៈ មានគម្រោងវិនិយោគចំនួន ១៧មានទុនវិនិយោគចំនួន ៩៨,៨​លានដុល្លារ​ និងផ្តល់ឱកាសការងារជូនប្រជាពលរដ្ឋបានចំនួន ២២៧៨៤ កន្លែង។ ខែមីនាមានគម្រោងវិនិយោគ​ចំនួន ៧​មានទុនវិនិយោគចំនួន ៣៣,៧ ​លានដុល្លារ និងផ្តល់ឱកាសការងារជូនប្រជាពលរដ្ឋចំនួន ៦៦៦៩កន្លែង ខែមេសា​មានគម្រោងវិនិយោគចំនួន ២០ក្រុមហ៊ុនមានទុនវិនិយោគចំនួន ២៤៧,៧ លានដុល្លារដោយផ្តល់ឱកាស​ការងារជូន​ដល់ប្រជាពលរដ្ឋចំនួន ១៧៧២៣កន្លែងនិងខែឧសភាមានគម្រោងវិនិយោគចំនួន​១០​មានទុនវិនិយោគចំនួន ៦០,១៤លានដុល្លារដោយផ្តល់ឱកាសការងារជូនប្រជាពលរដ្ឋចំនួន១៣៩៨៧កន្លែង។

ក្នុងចំណោមគម្រោងវិនិយោគចំនួន ៦៤មានតែខែមេសា មានគម្រោងវិនិយោគធំៗ និងចំណាយទុនច្រើនជាងគេ​ក្នុងនោះរួមមានគម្រោងបង្កើតកសិដ្ឋានចិញ្ចឹមគោពូជនិងគោសាច់ខ្នាតធំនៅស្រុកស្នួល ខេត្តក្រចេះក្នុង​ទុនវិនិយោគប្រមាណ ៧៣,៤លានដុល្លារ ។គម្រោងវិនិយោគអភិវឌ្ឍន៍រមណីយដ្ឋានទេសចរណ៍លើកោះទទឹងនិងសកម្មភាពពាក់ព័ន្ធផ្សេងៗទៀត នៅភូមិកោះ​ស្តេចឃុំកោះស្តេច ស្រុកគិរីសាគរ ខេត្តកោះកុង ក្នុងទុនវិនិយោគប្រមាណ៣០លានដុល្លារ។គម្រោងបង្កើត​រោងចក្រកែច្នៃផ្លែស្វាយ នៅភូមិតានៃឃុំជាំសង្កែ ស្រុកភ្នំស្រួច ខេត្តកំពង់ស្ពឺ ក្នុងទុនវិនិយោគប្រមាណ ២៦លានដុល្លារ គម្រោងបង្កើតរោងចក្រផលិត និងផ្គុំដំឡើងបន្ទះសូឡានៅភូមិក្តាន់រយ ឃុំដំណាក់អំពិល ស្រុកអង្គស្នួលខេត្តកណ្តាល ក្នុងទុនវិនិយោគប្រមាណ ១៥,៦លានដុល្លារ៕

អត្ថបទ៖ សំអឿន