សម្ដេចតេជោ ៖ បើមិនបង្កើតសាលាឧទ្ធរណ៍តាមភូមិភាគទេ ប្រហែលសំណុំរឿងនៅសាលាឧទ្ធរណ៍ភ្នំពេញ នឹងមានការកកស្ទះមិនខានឡើយ  

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ប្រសិនបើមិនមានការបង្កើតសាលាឧទ្ធរណ៍តាមបណ្ដាភូមិភាគទេ ប្រហែលជាមានសំណុំរឿងកកស្ទះនៅសាលាឧទ្ធរណ៍ភ្នំពេញច្រើនមិនខានឡើយ។

ការលើកឡើងរបស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគារថ្មី នៃបណ្ឌិត្យសភាភូមិន្ទយុត្តិធម៌កម្ពុជា និងពិធីប្រគល់សញ្ញាបត្រជូនដល់សិស្សចៅក្រម  សិស្សក្រឡាបញ្ជី សិស្សអាជ្ញាសាលា និងសិស្សសារការី នៅបណ្ឌិត្យសភាភូមិន្ទយុត្តិធម៌កម្ពុជាចំនួន១,៨៣៥នាក់ នាព្រឹកថ្ងៃទី ៦ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា កិច្ចការរបស់តុលាការ ត្រូវបន្តកែទម្រង់បន្តទៀត ដែលកន្លងមកសម្ដេចធ្លាប់លើកឡើងជាទូទៅថា កំណែទម្រង់ គឺ ៩៩ភាគរយរស់ តែបើមិនកែទម្រង់ ៩៩ភាគរយស្លាប់។

សម្ដេចតេជោ ហ៊ុន សែន លើកឡើងថា ជារឿងល្អហើយដែលក្នុងរយៈពេលកន្លងទៅនេះ មានការផ្ដួមផ្ដើមឲ្យមានសាលាឧទ្ធរណ៍តាមបណ្ដាភូមិភាគ។ បើមិនបង្កើតទេ នឹងធ្វើឲ្យមានការកកស្ទះសំណុំរឿងនៅសាលាឧទ្ធរណ៍ភ្នំពេញច្រើនមិនខានឡើយ។

សម្ដេចតេជោ ហ៊ុន សែន ថ្លែងបែបនេះថា «វាជាការល្អហើយដែលក្នុងរយៈពេលកន្លងទៅនេះ យើងបានផ្ដួចផ្ដើមរួមគ្នាបង្កើតសាលាឧទ្ធរណ៍តាមភូមិភាគ បើសិនជាមិនបង្កើតឲ្យមានសាលាឧទ្ធរណ៍តាមបណ្ដាភូមិភាគទេ ប្រហែលជាសំណុំរឿងកកស្ទះសាលាឧទ្ធរណ៍ភ្នំពេញហ្នឹង គឺយ៉ាងច្រើន»។

សម្ដេចតេជោ ហ៊ុន សែន បានបញ្ជាក់ថា ការបង្កើតសាលាឧទ្ធរណ៍តាមភូមិភាគ គឺដើម្បីបង្កភាពងាយស្រួល សម្រាប់ផ្ដល់សេវាយុត្តិធម៌ជូនដល់ប្រជាពលរដ្ឋ៕