មុនក្លាយជារដ្ឋមន្ត្រីប្រតិភូអមនាយករដ្ឋមន្ត្រីនាពេលនេះ បណ្ឌិត សូ ណារ៉ូ មានអតីតកាលជាអ្នកកាសែត

លោកបណ្ឌិត សូ ណារ៉ូ ដែលទើបនឹងត្រូវបានព្រះមហាក្សត្រតែងតាំងជារដ្ឋមន្ត្រីប្រតិភូអមនាយករដ្ឋមន្ត្រីកាលពីថ្ងៃទី ១១ ខែឧសភា ឆ្នាំ ២០២៣ កន្លងទៅនេះ គឺកាលពីអតីតកាល លោកក៏ជាអ្នកសារព័ត៌មានជាន់ខ្ពស់មួយរូបផងដែរនៅក្នុងប្រទេសកម្ពុជា។ លោកបណ្ឌិត សូ ណារ៉ូ បា​នប្រាប់ឲ្យដឹងពីអតីតភាពជាអ្នកសារព័ត៌មាននេះនៅលើគណនីហ្វេសប៊ុករបស់លោកកាលពីថ្ងៃទី០៥ ខែមិថុនា ឆ្នាំ២០២៣។

រូបភាព៖ ហ្វេសប៊ុកហ្វេក So Naro

លោកបណ្ឌិត សូ ណារ៉ូ បានសរសេរពីរឿងនេះនៅលើគណនីហ្វេសប៊ុក ដោយអមជាមួយរូបថតដែលថតជាមួយសម្ដេចតេជោ ហ៊ុន សែន ព្រមទាំងសម្ដេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងខ្លឹមសាររំឮកអនុស្សាវរីយ៍កាលពី៣០ឆ្នាំមុន។ នៅគ្រានោះ លោកកំពុងបម្រើការងារជាអ្នកសារព័ត៌មាន ហើយសម្ដេចតេជោ បានផ្ដល់កិត្តិយសអនុញ្ញាតឱ្យចូលជួបសម្ដែងការគួរសម ហើយសម្ដេចបានអរគុណលោកដែលបានជួយផ្សព្វផ្សាយពីយុទ្ធនាការបោះឆ្នោតរបស់គណបក្សប្រជាជនកម្ពុជា នាពេលនោះ។ លោកបណ្ឌិត សូ ណារ៉ូ បានរំឮកថា កាលណោះ សម្ដេចតេជោ មានភាពភ្ញាក់ផ្អើលមែនទែន នៅពេលដឹងថា រូបលោក ជាចាងហ្វាងកាសែតគោកធ្លក ដែលមានអាយុត្រឹមតែ ២៨ឆ្នាំប៉ុណ្ណោះ។

លោកបណ្ឌិត សូ ណារ៉ូ បានរំលេចពីអត្តចរិតរបស់សម្ដេចតេជោ ថាតាមចរិតពីធម្មជាតិរបស់សម្ដេចតេ​ជោ សម្ដេចមិនប្រកាន់នឹងអាយុលោកឡើយ ហើយសម្ដេចទាំងទ្វេ បានទទួលពួកលោកយ៉ាងកក់ក្ដៅ ហើយថែមទាំងបានអនុញ្ញាតឱ្យរូបលោក និងលោក ឡុង ផា ថតរូបទុកជាអនុស្សាវរីយ៍ជាមួយថែមទៀត។ លោកថា ដោយសារតែកម្រិតជីវភាពលោកកាលណោះ មានកម្រិត ប្រើត្រឹមកាមេរ៉ាដែលគ្មានគុណភាព និងសល់ហ្វីលតែ៣តែប៉ុណ្ណោះ ទើបថតរូបបានតែ៣ប៉ុស្ដិ៍ ហើយ២ប៉ុស្ដិ៍សស្កុះខូចគុណភាពមើលមិនយល់ តែក៏សំណាងដែលមានមួយប៉ុស្ដិ៍បានក្លាយជារូបដែលមានអនុស្សាវរីយ៍ប្រចាំជីវិតមិនអាចបំភ្លេចបានទោះគុណភាពមិនល្អក្ដី។

រូបភាព៖ ហ្វេសប៊ុកហ្វេក So Naro

សូមបញ្ជាក់ជូនថា លោកបណ្ឌិត សូ ណារ៉ូ មុនពេលតែងតាំងជារដ្ឋមន្ត្រីប្រតិភូអមនាយករដ្ឋមន្ត្រីកាលពីពេលថ្មីៗនេះ លោកក៏ធ្លាប់បម្រើការនៅទីស្ដីការគណរដ្ឋមន្ត្រី និងនៅខុទ្ទកាល័យនាយករដ្ឋមន្ត្រីក្នុងនាមជាជំនួយការផ្ទាល់របស់សម្ដេចតេជោផងដែរ។ ប៉ុន្តែ ក្រោយមក រូបលោក និងក្រុមគ្រួសារ ក៏បានផ្លាស់ទៅរស់នៅសហរដ្ឋអាមេរិកនៅក្នុងឆ្នាំ២០១២។

រូបភាព៖ Google

ដោយឡែក បើនិយាយពីការមានអតីតភាពជាអ្នកសារព័ត៌មាននេះ មិនមែនមានលោកបណ្ឌិត សូ ណារ៉ូ តែមួយនោះទេ ពោល គឺមន្រ្តីជាន់ខ្ពស់នៃរាជរដ្ឋាភិបាលកម្ពុជាមួយចំនួនទៀត ក៏មានអតីតភាពជាអ្នកសារព័ត៌មាន​ដូចនេះផងដែរ។ មន្រ្តីទាំងនោះ រួមមាន សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ធ្លាប់ធ្វើជាអ្នកសារព័ត៌មាននៅកាសែតពន្លឺបូព៌ា ក្នុងសម័យសង្គ្រាមនៅកម្ពុជា។ លោក ប្រាក់ សុខុន ជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ធ្លាប់បម្រើការងារប្រធាន​ផ្នែក​និពន្ធ​កាសែត​កងទ័ពនៅឆ្នាំ១៩៧៩ ដល់ ឆ្នាំ១៩៨៦ និងនៅឆ្នាំ១៩៨៦ ដល់ឆ្នាំ១៩៩២ ជានិពន្ធ​នាយក​រង​កាសែត​កងទ័ព។

រូបភាព៖ Google

ចំណែក លោកស្រី ឃួន សុដារី គឺជា​​អនុ​ប្រធានទី២ រដ្ឋសភាជាតិ ធ្លាប់ធ្វើជានិពន្ធនាយកសារព័ត៌មានប្រជាជន នៅក្នុងឆ្នាំ១៩៨៧ ខណៈលោក​ ខៀវ កាញារីទ្ធ រដ្ឋមន្រ្តីក្រសួងព័ត៌មាននាពេលបច្ចុប្បន្ននេះ ក៏ធ្លាប់ជាអ្នកសារព័ត៌មានមួយរូបតាមរយៈតួនាទីជានិពន្ធនាយកកាសែតកម្ពុជា នៅឆ្នាំ១៩៧៩ ដល់ឆ្នាំ១៩៩០៕

ដោយ៖ ង៉ិល ណារ៉ាត់