ទូតចិន៖ ក្រោមដឹកនាំរបស់គណបក្សប្រជាជនកម្ពុជា គឺមិត្តភាពកម្ពុជា-ចិន នឹងកាន់តែស៊ីជម្រៅ

«ក្រោមការដឹកនាំរបស់សម្ដេចតេជោ កម្ពុជាសម្រេចបានជោគជ័យស្ថេរភាពនយោបាយសង្គម រក្សាបាននូវកំណើនសេដ្ឋកិច្ចយ៉ាងឆាប់រហ័សរយៈពេលជាច្រើនឆ្នាំជាប់ៗគ្នា»។ នេះ គឺជាអះអាងរបស់លោក វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជានៅចំពោះមុខសម្តេចតេជោ ហ៊ុន សែន នាព្រឹកថ្ងៃពុធនេះ។ បន្ថែមលើនេះ លោកថា មិត្តភាពកម្ពុជា-ចិន នឹងកាន់តែរីកចម្រើនបន្ថែមទៀត ក្រោមការដឹកនាំរបស់គណបក្សប្រជាជនកម្ពុជា។

ពីវេទិកាបើកការដ្ឋានសាងសង់ផ្លូវល្បឿនលឿនភ្នំពេញ-បាវិត និងស្ពានឆ្លងកាត់ទន្លេមេគង្គ តាមរយៈអ្នកបកប្រែ លោក វ៉ាង វិនធាន បានលើកសរសើរយ៉ាងខ្លាំងពីការដឹកនាំប្រទេសកម្ពុជាដ៏ឈ្លាសវៃរបស់សម្ដេចតេជោ ហ៊ុន សែន។ ជាមួយគ្នានេះ លោកឯកអគ្គរដ្ឋទូតចិន បានបង្ហាញការជឿជាក់ថា ក្រោមការដឹកនាំដ៏យូរអង្វែងរបស់គណបក្សប្រជាជនកម្ពុជា ចំណងមិត្តភាព និងកិច្ចសហប្រតិបត្តិការកម្ពុជា-ចិន នឹងកាន់តែមានភាពស៊ីជម្រៅ និងនាំមកនូវផលប្រយោជន៍ដល់ប្រជាជនកម្ពុជា ហើយជីវភាពរស់នៅរបស់ប្រជាជនកម្ពុជា នឹងកាន់តែល្អប្រសើពីមួយថ្ងៃទៅមួយថ្ងៃ។

ក្រោមការដឹកនាំរបស់គណបក្សប្រជាជនកម្ពុជាដែលមានសម្ដេចតេជោ ជាប្រធានគណបក្ស និងជានាយករដ្ឋមន្ត្រី កម្ពុជាសម្រេចបានការអភិវឌ្ឍគួរជាទីកត់សម្គាល់ មានការរីកចម្រើនលើគ្រប់វិស័យ ជាក់ស្តែងមានសំណង់អគារខ្ពស់ៗពេញរាជធានីភ្នំពេញ។ បើនិយាយពីកត្តាសុខ សន្តិភាពវិញ គឺកម្ពុជាបានចាកផុតពីសង្គ្រាម ហើយមានសន្តិភាពយ៉ាងពេញលេញចាប់ពីឆ្នាំ ១៩៩៨ រហូតមកដល់បច្ចុប្បន្ននេះ។

រីឯកត្តាសេដ្ឋកិច្ចវិញ គឺទំហំសេដ្ឋកិច្ចកម្ពុជា មានការរីកចម្រើនគួរទីមោទនៈ ដោយកម្ពុជាបាននាំចូល    នាំចេញ ស្រូវអង្ករ គ្រាប់ស្វាយចន្ទី សម្លៀកបំពាក់។ល។ ទៅប្រទេសធំៗ ដូចជា អាមេរិក សហភាពអឺរ៉ុប អង់គ្លេស ហើយដៃគូរពាណិជ្ជកម្មដ៏ធំរបស់កម្ពុជា គឺមហាយក្សចិន។ ចិន តែងតែជួយកម្ពុជា ទាំងការផ្តល់ជំនួយឥតសំណង និងកម្ចីផ្សេងៗដែលកម្ពុជាត្រូវការ ដើម្បីយកមកអភិវឌ្ឍប្រទេសជាតិ។

សូមជម្រាបជូនថា ឆ្នាំនេះ គឺជាខួប ៦០ឆ្នាំ នៃការបង្កើតទំនាក់ទំនងការទូតកម្ពុជា-ចិន និងខួបទី១០ នៃគម្រោងផ្ដួចផ្ដើម ខ្សែ និងផ្លូវរបស់ចិន។ តាមរយៈចំណងការទូតដ៏រឹងមាំនេះ គឺចិនដែលជាមិត្តដែកថែបរបស់កម្ពុជា បានជួយកម្ពុជាឱ្យមានការអភិវឌ្ឍលើគ្រប់វិស័យ ដូចជា សុខាភិបាល មានមន្ទីរពេទ្យ សម្ភារៈវេជ្ជសាស្ត្រ វ៉ាក់សាំងកូវីដ១៩ វិស័យហេដ្ឋារចនាសម្ព័ន្ធ មានដូចជា ស្ពាន ផ្លូវថ្នល់ ផ្លូវល្បឿនលឿន និងលើវិស័យជាច្រើនផ្សេងៗទៀត៕

ដោយ៖ ង៉ិល ណារ៉ាត់