កម្ពុជា-នូវែលសេឡង់ ឯកភាពរៀបចំកិច្ចពិគ្រោះយោបល់លើកទី៣ នៅចុងឆ្នាំនេះ

កម្ពុជា-នូវែលសេឡង់ ឯកភាពគ្នាលើការរៀបចំកិច្ចពិគ្រោះយោបល់លើកទី៣ រវាងក្រសួងការបរទេសនៃប្រទេសទាំងពីរ នៅចុងឆ្នាំ២០២៣នេះ។ ការឯកភាពនេះធ្វើឡើងកាលពីថ្ងៃទី៧ ខែមិថុនា ក្នុងជំនួបរវាងលោកស្រី ទួត បញ្ញា រដ្ឋលេខាធិការក្រសួងការបរទេស និងឯកអគ្គរដ្ឋទូតនូវែលសេឡង់ប្រចាំកម្ពុជា ដែលមាននិវេសនដ្ឋាននៅទីក្រុងបាងកក។

បើតាមការបញ្ជាក់របស់ភាគីទាំងពីរ កិច្ចពិគ្រោះយោបល់លើកទី៣នេះ គឺដើម្បីពង្រឹង និងពង្រីកកិច្ចសហប្រតិបត្តិការទ្វេភាគីថែមទៀតលើវិស័យជាច្រើន ក៏ដូចជាដើម្បីធានានូវផលប្រយោជន៍រួមរបស់ប្រជាជនទាំងពីរ កម្ពុជា-នូវែលសេឡង់។

លោកស្រី ទួត បញ្ញា និងលោក ចូណាថាន់ ឃីងស៍ ឯកអគ្គរដ្ឋទូតនូវែលសេឡង់ប្រចាំកម្ពុជា បានពិនិត្យឡើងវិញដោយក្ដីពេញចិត្តចំពោះវឌ្ឍនភាពនៃទំនាក់ទំនងទ្វេភាគី ជាពិសេស ការកើនឡើងជាលំដាប់នៃទំហំពាណិជ្ជកម្មរវាងកម្ពុជា និងនូវែលសេឡង់។ ភាគីទាំងពីរ ក៏បានផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ដែលជាក្ដីព្រួយបារម្ភ និងជាផលប្រយោជន៍រួមរវាងប្រទេសទាំងពីរ។

ទន្ទឹមនេះ ភាគីទាំងពីរ ក៏បានកត់សម្គាល់អំពីសារៈសំខាន់នៃការធ្វើការរួមគ្នាយ៉ាងជិតស្និទ្ធក្នុងវិស័យអប់រំ វិស័យកសិកម្ម ថាមពលកកើតឡើងវិញ ការបោសសម្អាតមីន និងភាពធន់នឹងការប្រែប្រួលអាកាសធាតុ។ ក្នុងឱកាសនោះ លោកឯកអគ្គរដ្ឋទូតនូវែលសេឡង់ ក៏បានជម្រាបអំពីការចាប់អារម្មណ៍របស់ក្រុមហ៊ុននូវែលសេឡង់ក្នុងបោះទុនវិនិយោគទៅលើផ្នែកផលិតកម្មនៅកម្ពុជា ផងដែរ។

ជាការឆ្លើយតប លោកស្រី ទួត បញ្ញា បានថ្លែងអំណរគុណយ៉ាងជ្រាលជ្រៅចំពោះនូវែលសេឡង់ ដែលបានផ្តល់ជំនួយជាបន្តបន្ទាប់ក្នុងការអភិវឌ្ឍសេដ្ឋកិច្ច-សង្គមរបស់កម្ពុជា ហើយផ្អែកលើវឌ្ឍនភាពទាំងនេះ ភាគីទាំងពីរ បានពិភាក្សាអំពីមធ្យោបាយ ដើម្បីជំរុញ និងពង្រីកការធ្វើពាណិជ្ជកម្ម និងការវិនិយោគរវាងប្រទេសទាំងពីរបន្ថែមទៀត៕

ដោយ៖ ធឿន វ៉ាន់សុង / រូបភាព៖ ក្រសួងការបរទេសកម្ពុជា