​សម្ដេច ហ៊ុន សែន៖ «អតិថិជនមិនត្រូវយកហេតុផលនាយករដ្ឋមន្ត្រី​ស្នើម្ចាស់បុរីបញ្ឈប់ការរឹបអូសផ្ទះ បញ្ឈប់​ការបង់ប្រាក់​»

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា​នៅថ្ងៃទី ១០ ខែមិថុនានេះបានថ្លែង​ស្នើឱ្យម្ចាស់​បុរីបញ្ឍប់​ការរឹបអូសផ្ទះពីអតិថិជន ​ប៉ុន្តែអតិថិជនក៏មិនត្រូវយកហេតុផល​នេះបញ្ឈប់​ការបង់ប្រាក់​នោះ​ទេ។

សម្ដេចតេជោ ហ៊ុន សែនថ្លែងថា៖ «គម្រោងក្រដាសបិទតាមជញ្ជាំងថា ត្រូវរឹបអូសថ្ងៃនេះ ឃើញដកហូតចេញ ប៉ុន្តែក៏សូមបញ្ជាក់ជូន កុំយកហេតុផលដែលនាយករដ្ឋមន្ត្រីសំណូមពរ ធ្វើជាហេតុផលមិនព្រមបង់ប្រាក់រំលោះ»។

សម្ដេចតេជោ ហ៊ុន សែន បានមានប្រសាសន៍ឱ្យដឹងថា ពីថ្ងៃម្សិលមិញសម្ដេចបានជួបម្ចាស់បុរីចំនួន ២ នាក់ ក្នុងនោះម្នាក់បានប្រាប់ថា មិនដែលមានការរឹបអូសទាល់តែសោះ ឯម្នាក់ទៀតប្រាប់ថា បានពន្យាពេលបង់ប្រាក់ពី ១០ ឆ្នាំដល់ ១៥ ឆ្នាំ ឬលើសពីនេះ។ ប៉ុន្តែករណីខ្លះ គេហៅដោះស្រាយមិនព្រមទៅដែលនេះជាបញ្ហាទ្វេទិស។ សម្ដេចតេជោ បញ្ជាក់ថា សម្ដេចលើកទឹកចិត្តឱ្យរឹបអូស ប្រសិនបើជឿតាមការញុះញង់របស់ក្រុមប្រឆាំង។

សម្ដេចតេជោ ហ៊ុន សែន៖ «ខ្ញុំលើកទឹកចិត្តឱ្យរឹបអូស ប្រសិនបើក្រុមទាំងនោះធ្វើតាមការញុះញង់របស់ក្រុមប្រឆាំង ព្រោះកាលពីពេលបោះឆ្នោតគេបានប្រកាសថា ឱ្យតែគេឈ្នះគេឱ្យលុបបំណុលចោលទាំងអស់ អញ្ចឹងទេ បើថាអ្នកនិយាយ ទៅរឹបអូសមុនគេតែម្ដងទៅ ឥឡូវអ្នកដែលទិញផ្ទះតាមបុរី បើដឹងថា អ្នកហ្នឹងជាក្រុមប្រឆាំងមិនចង់សងតាមការញុះញង់តាមការញុះញង់របស់មេបក្សប្រឆាំង រឹបអូសមុនគេទៅ កាត់ឱ្យដាច់ឫសគល់»។

បើតាមសម្ដេចតេជោ ហ៊ុន សែន ប្រសិនបើម្ចាស់បុរីដួលរលំ សេដ្ឋកិច្ចក៏ដួលរលំដូចគ្នា ឧទាហរណ៍ថាប្រាក់ចំណូលរបស់យើងពីដើមមានលទ្ធភាពបង់ ៥០០ ដុល្លារ តែឥឡូវប្រាក់ចំណូលរបស់យើងធ្លាក់ យើងគ្រាន់តែកាត់បន្ថយថា កាលពីមុន ៥០០ បង់ ២០ ខែឥឡូវយើងសុំរៀបចំទៅ ២៥ ខែ តែបង់ ១ ខែតែ ៣០០ ដោយសារប្រាក់ចំណូលយើងធ្លាក់ចុះ ធ្វើដូច្នេះឈ្នះឈ្នះទាំងអស់គ្នា៕