ព័ត៌មានជាតិ

ជប៉ុនវិនិយោគ ដាំដំណាំម្ទេស នាំចេញក្រៅប្រទេស ក្នុងមួយខែ៥០០តោនជារៀងរាល់ខែ

បានផុស

២ years មុន

នៅ

ថ្ងៃសៅរ៍ ១០ មិថុនា ២០២៣

ដោយ

សៀមរាប ៖ លោក សោម សមស័ក្ក នាយកទីចាត់ការហិរញ្ញវត្ថុខេត្តសៀមរាប និងក្រុមការងារបាននាំអ្នកវិនិយោគជនជាតិ ជប៉ុន លោក NABESHIMA KATSUHITO ប្រធានកសិដ្ឋានដាំបន្លែស្តង់ដារជប៉ុន ចុះទៅពិនិត្យទីតាំងគ្រោងបើកកសិដ្ឋានដាំម្ទេសស្តង់ដារជប៉ុន លើផ្ទៃដី៧២ហិកតាជំហានទី០១ ស្ថិតក្នុងភូមិត្រពាំងទូក ឃុំជប់តាត្រាវ ស្រុកអង្គរធំ ខេត្តសៀមរាប ថ្ងៃទី១០ខែមិថុនាឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក NABESHIMA KATSUHITO បានឱ្យដឹងថា កសិដ្ឋាននេះគឺជាបច្ចេកទេសថ្មីហើយនិងបានផលច្រើន និងជាគំរូមួយសម្រាប់កសិកម្មនៅក្នុងស្រុកផងដែរ។ លោកបានបញ្ជាក់ បច្ចុប្បន្ននេះមានអ្នកបញ្ជាទិញ ក្នុងមួយខែរហូតដល់៥០០តោន ជារៀងរាល់ខែ ហើយផែនការនេះមិនមែនលក់នៅក្នុងស្រុកនោះទេគឺនាំចេញទៅក្រៅប្រទេស។

យើងត្រូវការបុគ្គលិកបង្គោល ដើម្បីមើលថែដំណាំម្ទេសដែលមានគុណភាពនិងស្តង់ដារនាំចេញព្រមទាំងត្រូវការកម្លាំងកម្មករជាច្រើននាក់ ក្នុងការប្រមូលផល កសិដ្ឋាននេះនិងជួយឲ្យប្រជាពលរដ្ឋនៅក្បែរៗនេះមានការងារធ្វើជារៀងរាល់ថ្ងៃ។

កសិដ្ឋាននឹងបង្រៀនអំពីបច្ចេកទេសនៃការដាំម្ទេសឲ្យត្រូវនឹងស្តង់ដារនាំចេញទៅក្រៅប្រទេសដល់ប្រជាកសិករ។ចំពោះពលរដ្ឋដែលមានដី សម្រាប់ដាំដំណាំម្ទេស លោក NABESHIMA KATSUHITO សន្យាបង្រៀនទាំងផ្នែកបច្ចេកទេស ផ្តល់ពូជនិងទទួលទិញនៅផលដំណាំរបស់ប្រជាកសិករផងដែរ។

លោកសង្ឃឹមថា កសិដ្ឋាននេះនិងក្លាយជាគំរូមួយដើម្បីឲ្យប្រជាកសិករ ដែលចង់ដាំម្ទេសអាចទៅសិក្សាស្រាវនិងរៀនសូត្រពីកសិដ្ឋានបាន។ យើងនឹងធ្វើមួយជំហានម្ដងមួយជំហានម្ដង កសិដ្ឋាននេះធ្វើលើផ្ទៃដី៧២ហិកតា ជាជំហានដំបូងនិងធ្វើជំហានបន្តបន្ទាប់ទៀតដើម្បីតម្រូវទីផ្សារនៅក្រៅប្រទេស លោកជឿជាក់ថា ពេលដែលកសិដ្ឋាននេះបានដំណើរការយើងនឹងមានអ្នកកុម្ម៉ង់ទិញផ្សេងៗទៀតកាន់តែច្រើនថែមទៀត។

លោកបញ្ជាក់ថា តម្រូវការ ៥០០តោន ក្នុងមួយខែគឺយើងត្រូវការផ្ទៃដី ២០០ហិកតាទើបគ្រប់គ្រាន់សម្រាប់ផលិតឱ្យបាន ៥០០តោនក្នុងមួយខែ ដើម្បីឱ្យផលដំណាំវិលជុំបាន យើងត្រូវការចូលរួមពីប្រជាជននៅជុំវិញនោះផងដែរ។

លោក NABESHIMA KATSUHITO លើកឡើងថា កសិដ្ឋានមួយនេះអាចដំណើរការទៅបានអាស្រ័យទៅលើការចូលរួមពីអាជ្ញាធរ និងប្រជាពលរដ្ឋនៅក្នុងមូលដ្ឋានចូលរួម ទើបអាចដំណើរការទៅបានដោយរលូន។

ទៅថ្ងៃអនាគតវានឹងបង្ហាញឲ្យពិភពលោកដឹងថាផលិតផលដែលផលិតនៅក្នុងប្រទេសកម្ពុជាគឺជាផលិតផលដែលមានគុណភាពខ្ពស់ ពិភពលោកនិងទទួលស្គាល់ផលិតផលរបស់កម្ពុជាដែលដាំតាមស្តង់ដារបច្ចេកទេស។

ពេលចាប់ផ្ដើមផលិតបានយើងក៏ចាប់ផ្ដើមកែច្នៃខ្នាតតូចមួយទៀត ទៅជាគ្រឿងទេស(ទឹកម្ទេស) នៅក្នុងប្រទេសកម្ពុជាក៏ដូចជាប្រទេសអាស៊ាន គឺចូលចិត្តញ៉ាំស៊ុប ដូច្នេះពួកយើងនឹងកែច្នៃទឹកម្ទេសមួយដែលជាប្រភេទម្ទេសកសិកម្មដាំនៅក្នុងទឹកដីខេត្តសៀមរាប មានន័យថា យើងនឹងមានទឹកម្ទេសកម្ពុជាដែលឆ្ងាញ់មានរសជាតិ។

ការផលិតទ្រង់ទ្រាយធំបែបនេះ ក៏ដូចជាការផ្សព្វផ្សាយទាញទីផ្សារពិភពលោកឱ្យបានឃើញ ប្រទេសកម្ពុជាដែលអាចផលិតបាននៅផលិតផលដែលមានស្តង់ដារ ពេលនោះនឹងអាចទាក់ទាញនៅភ្ញៀវទេសចរណ៍និងអ្នកវិនិយោគធំៗមកវិនិយោគនៅក្នុងខេត្តសៀមរាបកាន់តែច្រើន។

យើងត្រូវផលិតដើម្បីផ្គត់ផ្គង់តម្រូវការទីផ្សារឲ្យបានទាន់ពេលវេលាហើយនិងមានជារៀងរាល់ខែ បើគេត្រូវការរាល់សប្តាហ៍យើងផ្គត់ផ្គង់រាល់សប្តាហ៍គេត្រូវការរាល់ខែយើងផ្គត់ផ្គង់រាល់ខែ ពេលនោះអ្នកបញ្ជាទិញនិងមកបន្ថែមទៀតជាក់ជាមិនខាន។

លោក NABESHIMA KATSUHITOក្នុងនាមជាអ្នកជំនាញមួយរូបលោកដឹងថា បច្ចុប្បន្នជីកំពុងតែឡើងថ្លៃ ដូច្នេះយើងអាចកែច្នៃវត្ថុធាតុដើមនៅក្នុងមូលដ្ឋានឲ្យទៅជាជី ដើម្បីប្រើប្រាស់នៅក្នុងមូលដ្ឋានផ្ទាល់ដោយមិនបាច់នាំជីចូលពីក្រៅប្រទេស វានឹងកាត់បន្ថយថ្លៃដើមក្នុងការផលិត។

លោក ពៅ ប៊ុនធឿន អភិបាលស្រុកអង្គរធំ បានកោតសរសើរដល់លោក សោម សមស័ក្ក ដែលបាននាំនាក់វិនិយោគផ្នែកកសិកម្ម មកវិនិយោគក្នុងមូលដ្ឋានរបស់លោក និង ថ្លែងអំណរគុណដល់លោក NABESHIMA KATSUHITO ប្រធានកសិដ្ឋានដាំបន្លែស្តង់ដារជប៉ុន ដែលបានមកវិនិយោគនៅក្នុងស្រុកអង្គរធំខេត្តសៀរាប លោកសង្ឃឹមថា កសិដ្ឋាននេះ និងជួយបណ្តុះបណ្តាលដល់ប្រជាកសិករ ឱ្យមានជំនាញតាមបច្ចេកទេស និងមាកការងារធ្វើរបានកាន់តែច្រើន៕

ដោយ ៖ គឿនវេត