កម្ពុជា-វៀតណាម បើកវេទិកាពាណិជ្ជកម្ម ឆ្នាំ​២០២៣ដើម្បីជំរុញកំណើនសេដ្ឋកិច្ចពាណិជ្ជកម្ម និងការវិនិយោគ

កម្ពុជា-វៀតណាមបានបើកវេទិកាពាណិជ្ជកម្ម ឆ្នាំ២០២៣ពិភាក្សាគ្នារិះរកមធ្យោបាយដើម្បីជំរុញកំណើនសេដ្ឋកិច្ច ពាណិជ្ជកម្ម និងការវិនិយោគប្រទេសទាំងពីរ។

ថ្លែងក្នុងវេទិកាពាណិជ្ជកម្មកម្ពុជា-វៀតណាមឆ្នាំ២០២៣នៅស្ថានទូតវៀតណាមប្រចាំនៅក្រកម្ពុជាកាលពីពេលថ្មីៗនេះ លោក ជា វុទ្ធី អគ្គលេខាធិការរង គណៈកម្មាធិការវិនិយោគកម្ពុជាបានឱ្យដឹងថា វេទិកាពាណិជ្ជកម្ម កម្ពុជា-វៀតណាម ឆ្នាំ២០២៣ នេះរៀបចំឡើងដោយមានកិច្ចសហការរវាងក្រសួងឧស្សាហកម្ម និងពាណិជ្ជកម្មវៀតណាម ជាមួយស្ថាន​ទូតវៀតណាមប្រចាំព្រះរាជាណាចក្រកម្ពុជា ក្នុងគោលបំណង ដើម្បីអញ្ជើញអ្នកជំនួញ និងអ្នកវិនិយោគកម្ពុជា-វៀតណាមទាំងផ្នែកឯកជន ទាំងរដ្ឋាភិបាលនៃប្រទេសទាំងពីរព្រមទាំងភាគីពាក់ព័ន្ធផ្សេងៗទៀត ដើម្បីមកពិគ្រោះ ពិភាក្សាគ្នារិះរកមធ្យោបាយដើម្បីជំរុញកំណើនសេដ្ឋកិច្ច ពាណិជ្ជកម្ម និងការវិនិយោគនៅក្នុងប្រទេសកម្ពុជា និងវៀតណាម។

លោក ជា វុទ្ធី បានគូសបញ្ជាក់អំពីកិច្ចខិតខំប្រឹងប្រែងរបស់រដ្ឋាភិបាលរបស់ប្រទេសទាំងពីរក្នុងការពង្រឹងពង្រីកកិច្ចសហប្រតិបត្តិការគ្រប់ជ្រុងជ្រោយសំដៅជំរុញនិងធានាបាននូវវឌ្ឍនភាពប្រកបដោយចីរភាព។ ជាមួយគ្នានេះ លោកបាន​ជម្រាបជូនអង្គវេទិកាទាំងមូលនូវកាលានុវត្តភាពវិនិយោគនៅកម្ពុជាជាពិសេសកិច្ចសម្រួលធុរកិច្ចការផ្តល់ជូននូវការ​លើកទឹកចិត្តប្រកបដោយភាពទាក់ទាញ និងការធានាការថែទាំការវិនិយោគ ដូចមានចែងនៅក្នុងច្បាប់ស្តីពីវិនិយោគនៃព្រះរាជា​ណាចក្រកម្ពុជា។

លោកបានបញ្ជាក់ផងដែរថា អនុក្រឹត្យស្តីពីការអនុវត្តច្បាប់ស្តីពីវិនិយោគនៃព្រះរាជាណាចក្រកម្ពុជានឹងចូលជាធរមាននា​ពេល​ដ៏ខ្លីខាងមុខ។ ឯកឧត្តមក៏បានជំរុញលើកទឹកចិត្តឱ្យអ្នកជំនួញ និងអ្នកវិនិយោគទាំងកម្ពុជា ទាំងវៀតណាមរួសរាន់​ចាប់យកឱកាសវិនិយោគនៅកម្ពុជា។

លោកសង្ឃឹមយ៉ាងមុតមាំថា វេទិកាពាណិជ្ជកម្មកម្ពុជា-វៀតណាមនេះនឹងរួមចំណែកពង្រីកនូវទំហំសេដ្ឋកិច្ច ពាណិជ្ជកម្ម និងការវិនិយោគនៃប្រទេសទាំងពីរឱ្យកាន់តែធំបន្ថែមទៀត ព្រមទាំងទទួលបាននូវលទ្ធផលជាវិជ្ជមាននាពេលដ៏ខ្លីខាងមុខនេះ៕

អត្ថបទ៖ សំអឿន