សម្តេច​តេជោ​ ហ៊ុន សែន​ ​ណែនាំ​ឱ្យ​អភិបាល​​ខេត្ត​តាកែវ​ក្តាប់​ឱ្យ​​​បាន​នូវ​​​ប្រាក់​ចំណូល​ពលរដ្ឋ​ក្នុង​ខេត្ត​

សម្តេចតេជោ ហ៊ុន សែន​ នាយករដ្ឋមន្រ្តី​នៃ​កម្ពុជា​​បាន​​ណែ​ឱ្យ​នាំ​ឱ្យ​អភិបាល​​ខេត្ត​តាកែវ ​​​​ត្រូវ​ក្ដាប់​ឱ្យ​បាន​នូវ​ចំណូល​ចំណាយ​របស់​ខេត្ត​ខ្លួន​ ជា​ពិសេស​ចំនួនប្រាក់​ចំណូល​របស់​ប្រជាពលរដ្ឋ​នៅ​ក្នុង​ខេត្តរបស់ខ្លួនតែម្តង។ ​ការណែនាំនេះ គឺបន្ទាប់ពីសម្ដេចតេជោ​បាន​សាក​សួរ​អភិបាល​ខេត្ត​តាកែវ ពាក់ព័ន្ធនឹងប្រាក់ចំណូលរបស់កម្មករ កម្មការិនី ក្នុងខេត្ត តែអភិបាល​ខេត្ត​តាកែវ​មិន​បាន​ដឹង​ច្បាស់​លាស់។​

ក្នុង​ឱកាស​សំណេះ​សំណាល​ជាមួយ​នឹង​កម្មករ​កម្មការិនី​ជា​ង​​២​ម៉ឺន​​នាក់​​​នា​ព្រឹក​ថ្ងៃ​ទី​១១ ខែ​​មិថុនា ឆ្នាំ​​២០២៣​នេះ​​នៅ​ក្នុង​ស្រុក​ត្រាំ​កក់​ខេត្ត​តាកែវ​ សម្តេច​តេជោ​ ហ៊ុន សែន​ បាន​​​មាន​ប្រសាសន៍​ថា​ រោងចក្រ សហគ្រាសទាំង១២ ដែលអនុញ្ញាត​ឱ្យ​កម្មករ កម្មការិនីជួបសំណេះសំណាល​នៅថ្ងៃនេះ កំពុងដំណើរការអាជីវកម្ម​នៅក្នុង​ស្រុកត្រាំកក់ និងស្រុក​សំរោង ខេត្តតាកែវ។ រោងចក្រ សហគ្រាស​ទាំង១២នេះ ជាប្រភេទរោង​ចក្រផលិតគ្រឿងអេឡិចត្រូនិកចំនួន៦, កាត់ដេរសម្លៀកបំពាក់ចំនួន៣, ផលិតស្បែកជើងចំនួន២ និងផលិតផលិតផលធ្វើដំណើរ និងកាបូបចំនួន១។ ផលិត​ផលរបស់​រោងចក្រ​ទាំង​នេះ គឺនាំចេញទៅទីផ្សារអន្តរជាតិ ជាពិសេសសហគមន៍​អឺរ៉ុប និងសហរដ្ឋអាមេរិក។ល។

លោក​ អ៊ួច​ ភា អភិបាល​ខេត្ត​តាកែវ​បាន​​​មាន​ប្រសាសន៍​ថា ក្នុង​មួយ​ឆ្នាំ​ខេត្ត​តាកែវ ទទួល​បាន​ប្រាក់ចំណូល​​ប្រមាណ ១៨២​លានដុល្លារ​​អាមេរិក ពី​វិស័យ​កាត់​ដេរ និង​ដេរ​ស្បែក​ជើង។

សម្តេចតេជោ ហ៊ុន សែន ពិតជារីករាយដែលបានអញ្ជើញមកជួបជាមួយបងប្អូនកម្មករ កម្មការិនីនៅ​ខេត្តតាកែវនេះ​ជាថ្មីម្ដងទៀត បន្ទាប់ពីបានជួបកាលពីឆ្នាំ២០១៩កន្លងទៅ។សម្តេចតេជោបានមាន​ប្រសាសន៍ថា រោងចក្រសហគ្រាសដែលបានពង្រាយនៅទូទាំង ២៥ ខេត្តក្រុងនៅទូទាំង​ប្រទេស​កម្ពុជា គឺជាគោលនយោបាយពង្រាយរោងចក្រ ទៅតាមបណ្ដាខេត្ត របស់រាជរដ្ឋាភិបាល ដើម្បី​បង្កើន​ការងារជូនដល់ប្រជាពលរដ្ឋដោយផ្ទាល់នៅមូលដ្ឋាន មិនមែនមានរោងចក្រនៅ​តែរាជធានី​ភ្នំពេញ​មួយប៉ុណ្ណោះទេ។ សម្ដេចតេជោ នាយករដ្ឋមន្ត្រីបានបញ្ជាក់ថា បន្ទាប់ពីបានចុះជួប​ជាមួយ​កម្មករ និយោជិតនៅរាជធានីភ្នំពេញ និងតាមបណ្ដាខេត្តមួយចំនួនរួចហើយ សម្ដេចនឹងបន្តចុះជួប​ជាមួយ​កម្មករ​និយោជិតនៅតាមបណ្ដាខេត្តមួយចំនួនទៀត ដូចជា ខេត្តពោធិ៍សាត់ កំពង់ចាម និង​ខេត្ត​ស្វាយរៀងជាដើម។

សម្តេចតេជោ ហ៊ុន សែន បានមានប្រសាសន៍ថា បើសិនជាអត់មានរោងចក្រនៅក្នុងខេត្តតាកែវ​នោះទេ កម្មករនិយោជិតទាំងអស់ច្បាស់ណាស់ថា នឹងធ្វើចំណាកស្រុកទៅរកការងារធ្វើ​នៅកន្លែង​ផ្សេង ហើយពលរដ្ឋខ្លះទៀតនឹងបន្តប្រកបរបរចិញ្ចឹមជីវិ​ត​ធ្វើស្រែចម្ការធម្មតាជាមួយ​ឪពុកម្ដាយ​ជាក់​ជា​មិនខាន។ សម្តេចតេជោបានមានប្រសាសន៍បន្តទៀតថា បច្ចុប្បន្ននេះ កម្លាំងពលកម្មមួយភាគធំ ត្រូវចូលមកវិស័យឧស្សាហកម្ម សេវាកម្ម និងមួយផ្នែកទៀតកំពុងធ្វើការនៅតាមបណ្ដា​ប្រទេស​ជិត​ខាង​។​

សម្តេចតេជោនាយករដ្ឋមន្ត្រី បានមានប្រសាសន៍ថា វិស័យកាត់ដេរនៅកម្ពុជា បានចាប់ផ្ដើម​ពី​ជាង៦០​រោងចក្រ ដោយមានកម្មករនិយោជិតតែជាង៨ម៉ឺននាក់ប៉ុណ្ណោះកាលពីឆ្នាំ ១៩៩៧ ក៏ប៉ុន្តែ បច្ចុប្បន្ននេះ កម្ពុជាមានរោងចក្រជិត១៤០០រោងចក្រជាមួយនឹងកម្មករនិយោជិតជាង ៨០ម៉ឺននាក់ ដែលនេះបង្ហាញពីការរីកចម្រើនលើគោលនយោបាយវិស័យឧស្សាហកម្មរោងចក្រកាត់ដេររបស់ប្រទេសកម្ពុជាយើង។

សម្តេចតេជោក៏បានបញ្ជាក់ថា តាមរយៈជំនួបរបស់សម្ដេច ជាមួយកម្មករនិយោជិត បានធ្វើឱ្យ​រោង​ចក្រ​មានភាពល្អប្រសើរឡើង ទាំងការកសាងហេដ្ឋារចនាសម្ព័ន្ធរបស់រោងចក្រ និងការរៀប​ចំគោល​នយោបាយនានា ដើម្បីគាំពារដល់កម្មករនិយោជិតទាំងអស់។សម្ដេចតេជោ​បាន​អំពាវ​នាវ​ឱ្យ​ខិត​ខំរួមគ្នា ធ្វើឱ្យរោងចក្រក្លាយជាសហគមន៍សុខសាន្ត ដោយមិនឱ្យមានការប្រើប្រាស់គ្រឿងញៀន និងមិនឱ្យមានក្រុមបងធំ បងតូច នៅក្នុងរោងចក្រនោះឡើយ។

សម្តេចតេជោក៏បានបន្តអំពាវនាវដល់កម្មករនិយោជិតរួមគ្នារក្សាសន្ដិភាពរបស់កម្ពុជា ខណៈ​សង្គ្រាម​បានបំផ្លាញអ្វីគ្រប់បែបយ៉ាង និងធ្វើឱ្យមានសោកនាដកម្មជាច្រើន ហើយមាន​សន្តិភាព ទើបមានការអភិវឌ្ឍ។​មុននឹងបញ្ចប់ សម្តេចតេជោ ហ៊ុន សែន ក៏បានជូនពរដល់បងប្អូនកូនក្មួយ កម្មករ កម្មការិនីទាំងអស់ ជួបតែសេចក្តីសុខ សេចក្តីចម្រើន ជាពិសេសកម្មការិនីដែល​មាន​ផ្ទៃ​ពោះ​សូមឲ្យទទួលបាននូវសុខភាពល្អ ទាំងម្ដាយ និងកូននៅពេលសម្រាលហើយក៏បានផ្ដល់ជាថវិកាសម្រាប់ស្ត្រីមានផ្ទៃពោះចំនួន​ ៧១៤នាក់ក្នុងម្នាក់ៗ ២០០ដុល្លារ និងស្ត្រីមានកូនភ្លោះ ៤០០ដុល្លារ ផងដែរ៕

​