មន្ត្រី៖ព្រះខ័នរាជដែលប្រទះឃើញនៅស្រុករវៀងកំពុងរក្សាទុកនៅខេត្តព្រះវិហារ

លោក អ៊ុក សុខា អគ្គនាយក​នៃអគ្គនាយកដ្ឋាន​បេតិកភណ្ឌ បញ្ជាក់ថា ព្រះខ័នរាជដែលប្រជា​ពលរដ្ឋប្រទះឃើញនៅស្រុករវៀង បានយកមករក្សាទុកនៅមន្ទីរវប្បធម៌ និងវិចិត្រសិល្បៈខេត្តព្រះវិហារយ៉ាងល្អ ដើម្បីរងចាំមន្ត្រីជំនាញពិនិត្យបន្ត។

លោក អ៊ុក សុខា បានប្រាប់សារព័ត៌មាន «កម្ពុជាថ្មី» នៅរសៀលថ្ងៃទី១១ ខែមិថុនានេះ ថា លោក បានទទួលព័ត៌មាននេះហើយ ខណៈព្រះខ័នរាជកំពុងរក្សាទុកយ៉ាងត្រឹមត្រូវ និងសុវត្ថិភាព នៅមន្ទីរវប្បធម៌ និងវិចិត្រសិល្បៈខេត្តព្រះវិហារ ប៉ុន្តែនៅពេលនេះ លោកមិនទាន់អាចបញ្ជាក់បានទេ ថា ព្រះខ័នរាជនេះមានអាយុកាល ឬប្រវត្តិយ៉ាងណានោះទេ។

លោក អ៊ុក សុខា អគ្គនាយកនៃអគ្គនាយកដ្ឋាន​បេតិកភណ្ឌ បានបញ្ជាក់ថា នៅពេលខាងមុខ ឬថ្ងៃអាចចន្ទ លោក នឹងចាត់ក្រុមន្ត្រីជំនាញរបស់អគ្គនាយកដ្ឋាន​បេតិកភណ្ឌ ដើម្បីចុះទៅពិនិត្យដោយផ្ទាល់លើព្រះខ័នរាជនេះ។

កាលពីថ្ងៃសៅរ៍ ទី១០ ខែមិថុនា ឆ្នាំ២០២៣ ប្រជាកសិករម្នាក់នៅស្រុករវៀង ខេត្តព្រះវិហារ បានប្រទះឃើញព្រះខ័នរាជមួយដើម ខណៈនៅពេលគាត់កំពុងភ្ជួរដីធ្វើស្រែចម្ការ។ ក្រោយប្រទះឃើញព្រះខ័នរាជនេះ កសិកររូបនោះ ក៏បានយកទៅប្រគល់ឲ្យអាជ្ញាធរមូលដ្ឋានរក្សាទុក ដើម្បីយកទៅពិនិត្យបន្ត។ ប៉ុន្តែបើតាមការសន្និដ្ឋាន ព្រះខ័នរាជនេះ អាចមានអាយុកាលជាង១ពាន់ឆ្នាំឯណោះ៕

ដោយ៖ ធឿន វ៉ាន់សុង