សម្ដេចតេជោ ហ៊ុន សែន ​ជំរុញឱ្យកងកម្លាំង​ទប់ស្កាត់ការបង្កចលាចលឱ្យបានទាន់ពេលវេលា

សម្ដេចតេជោ ហ៊ុន សែន នាយករដ្ឋមន្ត្រីកម្ពុជាជំរុញឱ្យមេបញ្ជាការ និងពលទាហានទាំងអស់ទប់ស្កាត់ឱ្យ​បានទាន់ពេលវេលានូវរាល់និន្នាការ​បង្ករចលាចល និងអស្ថិរភាពសង្គម។​

​សម្ដេចតេជោ ហ៊ុន សែន មានប្រសាសន៍នៅក្នុងពិធី​សម្ពោធសមិទ្ធិផលនានា​នៃកងពលតូច​លេខ​៧០​នៅព្រឹកថ្ងៃទី ១២ ខែមិថុនា ឆ្នាំ ២០២៣។​

សម្ដេចនាយករដ្ឋមន្ត្រីបានថ្លែងថា ​រាជរដ្ឋាភិបាល​នៅតែប្រកាន់ជំហរគាំទ្រឥតងាករេ ចំពោះការ​ពង្រឹង និងពង្រីកបន្ថែមទៀត​ចំពោះកិច្ចសហការ​នូវកងទ័ពនីមួយៗ ជាមួយស្ថាប័ន​ស៊ីវិល​ផ្សេងៗទៀត​ ក្នុងគោលដៅលើកកម្ពស់សមត្ថភាពវិស័យកងទ័ពកម្ពុជា។

សម្ដេចតេជោ ជំរុញនិងលើកទឹកចិត្តដល់សម្បុរជន ព្រមទាំងដៃគូអភិវឌ្ឍ និងអង្គការជាតិ អន្តរជាតិ ដើម្បីរួមចំណែកដោះស្រាយ​នូវរាល់ការលំបាកខ្វះខាតរបស់កងកម្លាំងប្រដាប់អាវុធ​ ក្នុងគោលដៅ​រក្សាឱ្យ​បាន​នូវសុខមាលភាព​ កម្លាំងមាំមួន​។ និងការធានាបាននូវសុខសន្ដិភាព សុវត្ថិភាព និងការអភិវឌ្ឍលើគ្រប់វិស័យ​។

​សម្ដេចតេជោ ហ៊ុន សែនមានប្រសាសន៍ថា៖ «ខ្ញុំសូមស្នើដល់មេបញ្ជាការ ​និងពលទាហាន នៃកងពលតូចលេខ ៧០ ​ត្រូវបន្តអនុវត្តកិច្ចសហការដ៏ល្អប្រសើ​ជាមួយអាជ្ញាធរដែនដីគ្រប់​លំដាប់ថ្នាក់​ ស្ថាប័នអង្គភាពពាក់ព័ន្ធ រួមជាមួយបងប្អូនប្រជាជននៅ​តាមតំបន់នីមួយៗ ក្នុងគោល​ដៅពង្រឹងសាមគ្គីភាព​ ទប់ស្កាត់ឱ្យបាន​នូវនិន្នាការបង្កអរិភាព​ជាតិទប់ស្កាត់ឱ្យ​ទាន់ពេល​វេលានូវរាល់និន្នាការ​បង្ករចលាចល និងអស្ថិរភាពសង្គម»៕