កសិករចាប់យករបរចិញ្ចឹមពពែ ដើម្បីបង្កើនចំណូលផ្គត់ផ្គង់គ្រួសារ បន្ទាប់ពីការងារដាំដុះ

ដើម្បីដំឡើងប្រាក់ចំណូលសេដ្ឋកិច្ចគ្រួសារកសិករបានបង្កើនការងារចិញ្ចឹមសត្វពពែលក់ជាលក្ខណៈគ្រួសារមួយថែមទៀត លើរបរកសិកម្ម។

ការចិញ្ចឹមប្រកបដោយលក្ខណៈបទដ្ឋានបច្ចេកទេសច្បាស់លាស់មានអំណោយផលពីភូមិសាស្ត្រ ព្រមទាំងមានទីផ្សារផងនោះ កសិករទទួលបានប្រាក់ចំណូលសមរម្យហើយអាចអភិវឌ្ឍន៍គ្រួសារបានយ៉ាងប្រសើរ។

លោក ស្លេស ម៉ាត់ អាយុ៤២ឆ្នាំ ជាកសិកររស់នៅក្នុងភូមិព្រែកតូច ឃុំជីរោទ៍ទី១ ស្រុកត្បូឃ្មុំ ខេត្តត្បូងឃ្មុំ បានចិញ្ចឹមសត្វពពែបានឲ្យដឹងថា គាត់បានងាកមកចាប់យករបរចិញ្ចឹមពពែលក់នេះ រយៈពេល៨ឆ្នាំមកហើយ ទទួលបានផលល្អ ដោយសារតែសត្វពពែមានទីផ្សារល្អក្នុងស្រុកងាយស្រួលលក់ មានការគាំទ្រក្នុងការអាស្រ័យសាច់វាធ្វើជាម្ហូបមានរស​ជាតិ​ប្រកបដោយគុណភាពខ្ពស់មិនមានគីមីនោះទេ។ សាច់ពពែគេយកធ្វើម្ហូបបានច្រើនមុខមានដុត អាំង ស៊ុប ខ ជាដើម យ៉ាងឆ្ងាញ់ពិសារ។

លោក ម៉ាត់បានបន្តទៀតថា ពពែចាប់ពីពេលវាកើតរយ:ពេលមួយឆ្នាំពេញ នោះពពែនឹងផ្ដល់ផលហើយ មានថៅកែមកប្រមូលទិញដល់ទ្រុងទាំងអស់តែម្ដង ហើយក្នុងពពែមួយក្បាល គេទិញក្នុងតម្លៃចាប់ពី ១៤០ដុល្លារ ទៅ១៥០ដុល្លារ ក្នុងពពែមួយក្បាល យើងអាច់លក់បានជិត១០០ក្បាលដែរ។

លោក ម៉ាត់ បានឲ្យដឹងទៀតថា ចំពោះមេពពែក្នុងមួយក្បាល ក្នុងមួយឆ្នាំៗពពែមានកូនពីរ ទៅបីដង ឯណោះ ហើយកូនម្ដងពី២ ទៅ ៣ ក្បាលផងដែរ។

កាលពីឆ្នាំកន្លងទៅ តម្លៃទីផ្សារពពែមានតម្លៃដូចតែឆ្នាំនេះដែរ ហើយផលប្រយោជន៍របស់សត្វពពែ គេចិញ្ចឹមដើម្បីលក់ជាពូជយកទៅចិញ្ចឹមបន្ត ឬទិញសម្រាប់យកសាច់ជាអាហារយ៉ាងពេញនិយម៕

អត្ថបទ៖ សាន វិឡែម