អភិបាល​ខេត្ត​ធ្វើបច្ចុប្បន្នភាពសក្ដានុពល និងឱកាសវិនិយោគក្នុងខេត្តបាត់ដំបង

ខេត្តបាត់ដំបងតមានសក្តានុពលលើវិស័យ ២ ជាចម្បងក្នុងចំណោមវិស័យសំខាន់ៗជាច្រើនទៀត។

លោក សុខ លូ អភិបាល​ខេត្ត​បាត់ដំបងបានលើកឡើងនៅ​ក្នុង​ការ​ដឹកនាំកិច្ចប្រជុំស្ដីពីការធ្វើបច្ចុប្បន្នភាពសក្ដានុពលនិងឱកាសវិនិយោគក្នុងខេត្តបាត់ដំបងថា ខេត្ត​បាត់ដំបង​មាន​វិស័យ ២ ជាចម្បងទី ១-វិស័យទេសចរណ៍ និងទី២-វិស័យ កសិកម្ម។

លោកអភិបាល​ខេត្ត​បាន​បញ្ជាក់ថា ខេត្តបាត់ដំបង​ត្រូវបានរាជរដ្ឋាភិបាលកម្ពុជាចាត់ទុកជាប៉ូលសេដ្ឋកិច្ចទី ៤ ដូចនេះក្នុងនាមរដ្ឋបាលខេត្តបាត់ដំបងត្រូវតែមានភាពច្បាស់លាស់ទៅលើសក្ដានុពលក្នុងខេត្តអ្វីខ្លះ​កំពុងមាន ឬតម្រូវការអ្វីខ្លះដែល​កំពុងខ្វះខាត​ និងកំពុងមានតម្រូវការសម្រាប់ថ្ងៃមុខ។

«យើងត្រូវប្រាកដថាតើខេត្តបាត់ដំបងមានចំណុចអ្វីដែលពិសេស សម្រាប់ទាក់ទាញអ្នកវិនិយោគឱ្យមកវិនិយោគនៅក្នុងខេត្តបាត់ដំបង ដែលកត្តាទាំងអស់នោះហើយយើងត្រូវចាប់ឱ្យបានច្បាស់លាស់នូវទិន្នន័យសំខាន់ៗ ឧទាហរណ៍ថា: សម្រាប់​វិស័យទេសចរណ៍ដូចជា សណ្ឋាគារ ភោជនីយដ្ឋាន ឬអាហារដ្ឋានជាដើមមានចំនួនប៉ុន្មាននៅក្នុងខេត្ត ផលិត​ផលកសិកម្មមានអ្វីខ្លះ ដែលកំពុងមានសក្ដានុពលនៅក្នុងខេត្ត ឬក៏នៅក្នុងវិស័យឧស្សាហកម្មមានរោងចក្រ,សិប្បកម្ម,​សហគ្រាស​​ប៉ុន្មានដែលកំពុងដំណើរការនៅក្នុងខេត្តគឺត្រូវធ្វើយ៉ាងណាឱ្យមានទិន្នន័យច្បាស់លាស់»។

លោកបន្តថា ក្នុងនាមរដ្ឋបាលខេត្តបាត់ដំបង ត្រូវក្ដាប់ឱ្យបានអំពីសេដ្ឋកិច្ចក្នុងខេត្តពី​ចំណូលប្រចាំឆ្នាំចំនួនប៉ុន្មានក្នុងនោះត្រូវក្ដាប់ឱ្យបាននូវចំណូលរបស់កម្មករកម្មការិនីជាមធ្យមប្រចាំឆ្នាំ ឬចំណូលរបស់ប្រជាពលរដ្ឋក្នុងខេត្ត។

ខេត្តបាត់ដំបងគឺជាខេត្តមួយស្ថិតនៅភាគពាយ័ព្យនៃប្រទេសកម្ពុជាដែលមានផ្ទៃដីទំហំ ១១,៧៤៨ គីឡូម៉ែត្រការ៉េហើយបច្ចុប្បន្នមានប្រជាពលរដ្ឋសរុប ១,៣៦៤,៨៧៣នាក់។ មានព្រំប្រទល់ខាងលិចទល់ខេត្តប៉ៃលិននិងប្រទេសថៃខាងកើតទល់ខេត្តពោធិ៍សាត់ និងបឹងទន្លេសាប ខាងជើងទល់ខេត្តបន្ទាយមានជ័យនិងខេត្តសៀមរាប និងខាងត្បូងទល់ខេត្តពោធិ៍សាត់។ ខេត្តបាត់ដំបង​មានព្រំប្រទល់ជាប់នឹងប្រទេសថៃដែលមានច្រកទ្វារអន្តរជាតិចំនួន ២ សំខាន់គឺ ច្រកទ្វារអន្តរជាតិដូង ស្ថិតក្នុងស្រុកកំរៀង និង ច្រកទ្វារអន្តរជាតិគីឡូ ១៣ (ភ្នំដី) ស្ថិតក្នុងស្រុកសំពៅលូន ព្រមទាំងច្រកទ្វារតំបន់ព្រំដែនចំនួន​៣ ដែលបង្កភាពងាយស្រួលក្នុងការដឹកជញ្ជូនដំណាំកសិផលនិងផលិតផលនានាទៅប្រទេសថៃ៕

អត្ថបទ៖ សៅ សារិទ្ធ