អភិបាលខេត្តកោះកុង ជំរុញឲ្យបញ្ចូនកុមារតូចចូលរៀនឲ្យបានគ្រប់ៗគ្នា ចៀសវាងបោះបង់​ចោលការសិក្សា

លោកស្រី មិថុនា ភូថង អភិបាលខេត្តកោះកុង បានជំរុញដល់អាណាព្យាបាលសិស្សនៅភូមិចំការក្រោម ត្រូវបញ្ចូនកូនៗមករៀនសូត្រឱ្យបានទៀងទាត់ពេលវេលា ចៀសវាងបោះបង់ចោលការសិក្សាឱ្យសោះ។

ការអំពាវនាវរបស់លោស្រី មិថុនា ភូថង នៅពេលនេះធ្វើឡើងក្នុងពិធីអញ្ជើញសម្ពោធអគារសិក្សាថ្មី សាលាបឋមសិក្សាប្រកា ស្ថិតនៅក្នុងឃុំស្រែអំបិល ស្រុកស្រែអំបិល កាលពីថ្ងៃទិ១៣ ខែមិថុនា ឆ្នាំ២០២៣។

លោកស្រីអភិបាលខេត្ត ថ្លែងអំណអរគុណដល់ឧកញ៉ា លឹម បុក និងក្រុមគ្រួសារដែលមានសណ្តានចិត្តល្អជួយគាំទ្រឧបត្ថម្ភកសាងសាលារៀននេះជាថ្មីជូនប្រជាពលរដ្ឋ និងកុមារតូចៗនៅទីជនបទដាច់ស្រយោលដែលមានតម្រូវការអប់រំច្រើនមិនចាញ់ទីប្រជុំជន។ លោកស្រីបន្តលើកឡើងថា អគារសិក្សាថ្មីដែលចំនួន១ខ្នង ស្មើនឹង៣បន្ទប់ បំពាក់ទៅដោយ​អណ្តូងទឹកប្រើម៉ូទ័របូមស្វ័យប្រវត្តិ១គ្រឿង ធុងស្តុកទឹកចំនួន២ ចំណុះ១៥០០លីត្រ នឹងផ្តល់សុវត្ថិភាពកាន់តែងាយស្រួលដល់សិស្សបានចូលរៀនសូត្រ បើធៀបនឹងអគារចាស់ទ្រុឌទ្រោមសង់ឡើងពីឈើប្រក់ស្លឹក។

ទន្ទឹមនោះ លោកស្រីរំពឹងថា ការបោះបង់ចោលការសិក្សារបស់កុមារតូចៗទាំងនេះលែងជាការព្រួយបារម្ភទៀត ដោយសំដៅសំដៅធានាការអប់រំប្រកបដោយគុណភាព បរិយាប័ន្ន សមធម៌ និងបង្កើតកាលានុវត្តភាពសិក្សាពេញមួយជីវិត ស្របពេលដែលរាជរដ្ឋាភិបាលចាត់ទុកវិស័យអប់រំជាវិស័យអាទិភាព។

បើតាមលោក ជា ចាន់កញ្ញា អភិបាលស្រុកស្រែអំបិល កន្លងទៅសាលាបឋមិក្សាប្រកាំនេះជាសាលាឧបសម្ព័ន្ធមួយដែលផ្តួចផ្តើមកសាងដោយសប្បុរសជនទុកឱ្យកុមារតូចៗបានចូលរៀនសូត្រ ដោយមិនចង់ឱ្យពួកគេធ្វើដំណើរឆ្ងាយពីផ្ទះ ខ្លះត្រូវដើរកាត់ព្រៃ និងជិះទូកជាដើម។

លោកអភិបាលស្រុកស្រែអំបិល បន្ថែមថា បច្ចុប្បន្នសាលារៀននេះ បានប្រែមុខមាត់ថ្មីតាមរយៈការទទួលបានអគារសិក្សាថ្មី១ខ្នងធ្វើពីបេតុង ប្រក់ស៊ីប្រូ ក្រាលការ៉ូបាត មានបណ្តោយ២៤ម៉ែត្រ និងទទឹង៩ម៉ែត្រដែលប្រើប្រាស់ពេលសាង​សង់​៤​ខែជាអំណោយរបស់លោកឧកញ៉ា លឹម បុក និងក្រុមគ្រួសារ។ លោកអភិបាលក៏ថ្លែងអំណអរគុណដល់លោកឧកញ៉ា លឹម បុក និងក្រុមគ្រួសារដែលគាំទ្រឧបត្ថម្ភកសាងសាលារៀនថ្មីឡើងវិញដើម្បីសុវត្ថិភាពដល់កុមារតូចៗបានចូលរៀនយ៉ាងសមរម្យបំផុត។

សាលាបឋមសិក្សាប្រកាំ មានសិស្សសរុបចំនួន៣៥នាក់ ស្រី១៤ គ្រូ២នាក់ មានកម្រិតសិក្សាពីថ្នាក់ទី១ដល់ថ្នាក់ទី៣ ដោយគ្រឹះស្ថានសិក្សាមួយនេះត្រូវបានចាត់ទុកថា នៅតំបន់ដាច់ស្រយោលពីទីរួមស្រុកស្រែអំបិល។ ស្រុកស្រែអំបិល សព្វថ្ងៃមានវិទ្យាល័យចំនួន២ មានគ្រូបង្រៀន៩៣នាក់ និងសិស្សសរុប១.៧៣៧នាក់ អនុវិទ្យាល័យចំនួន៦កន្លែង សាលាបឋមសិក្សា៤៣កន្លែង និងសាលាឧបសម្ព័ន្ធ៤កន្លែងមានគ្រូបង្រៀនសរុប២៧៧នាក់ គ្រូកិច្ចសន្យា២០នាក់ និងសិស្សានុសិស្ស៦.៣៧៦នាក់៕

អត្ថបទ៖ សិរីវឌ្ឍនៈ