ព័ត៌មានជាតិ
រោងចក្រមួយនៅភ្នំពេញ ផលិតកាបូបគ្រប់ប្រភេទនាំចេញទៅអាមេរិកប្រមាណ ១៥ ទៅ ១៦ម៉ឺនកាបូប ក្នុងមួយខែៗ
រោងចក្រមួយនៅខណ្ឌដង្កោ រាជធានីភ្នំពេញ បានផលិតផលិតផលកាបូបគ្រប់ប្រភេទ នាំចេញទៅកាន់សហរដ្ឋអាមេរិក ប្រមាណជា ១៥ ទៅ ១៦ម៉ឺនកាបូប ក្នុងមួយខែៗ។ ក្នុងនោះដែរ អ្នកបញ្ជាទិញនៅសហរដ្ឋអាមេរិក បានកោតសរសើរនូវគុណភាពផលិតផលកាបូប ដែលផលិតនៅកម្ពុជាផងដែរ។
![](https://www.kampucheathmey.com/wp-content/uploads/2023/06/009-1-1024x576.jpg)
កញ្ញា ឡុង ស្រីពៅ ប្រធានរដ្ឋបាលនៃរោងចក្រ ហ្ស៊ីជាង ហេងហ្វេង ថប លេហ្សឺរ (ខេមបូឌា) ឯ.ក បានឲ្យដឹងថា រោងចក្រនេះ ផលិតនូវផលិតផលកាបូបគ្រប់ប្រភេទ ហើយនាំចេញទៅកាន់សហរដ្ឋអាមេរិកតែមួយប្រទេសប៉ុណ្ណោះ។ ក្នុងមួយខែរោងចក្រនេះ អាចផលិត និងនាំចេញកាបូបប្រមាណ ១៥ ទៅ ១៦ម៉ឺនកាបូប ហើយក្នុងមួយឆ្នាំរោងចក្រនេះ អាចរកចំណូលបានប្រមាណជា ១២លានដុល្លារអាមេរិក។
![](https://www.kampucheathmey.com/wp-content/uploads/2023/06/001-4-1024x768.jpg)
កញ្ញា ឡុង ស្រីពៅ បានឲ្យដឹងបន្តថា ក្នុងរយៈពេលដំណើរការ ៤ឆ្នាំកន្លងមកនេះ អ្នកបញ្ជាទិញនៅសហរដ្ឋអាមេរិក បានកោតសរសើរនូវគុណភាពផលិតផលកាបូប ដែលផលិតនៅរោងចក្រ ហ្ស៊ីជាង ហេងហ្វេង ថប លេហ្សឺរ ហើយក៏សរសើរការយកចិត្តទុកដាក់របស់កម្មករ-កម្មការនីរបស់កម្ពុជា ផងដែរ។
![](https://www.kampucheathmey.com/wp-content/uploads/2023/06/002-5-1024x768.jpg)
ប្រធានរដ្ឋបាល បានប្រាប់ឲ្យដឹងបែបនេះថា «រយៈពេល ៤ឆ្នាំនេះ ដែលយើងបានសហការជាមួយគ្នា ជាមួយនឹងខាងក្រុមហ៊ុន Buyer គឺគាត់មាន Feedback ល្អៗ ចំពោះគុណភាពនៃកាបូបរបស់យើង ហើយគាត់ក៏បានសរសើរដែរថា កម្មករនៅខ្មែររបស់យើង គឺធ្វើការយកចិត្តទុកដាក់»។
![](https://www.kampucheathmey.com/wp-content/uploads/2023/06/003-5-1024x768.jpg)
សម្រាប់កម្មករ-កម្មការនី នៅរោងចក្រ ហ្ស៊ីជាង ហេងហ្វេង ថប លេហ្សឺរ គឺទទួលបានប្រាក់ខែគោលចំនួន ២០០ដុល្លារក្នុងមួយខែដូចៗគ្នា ទោះបីជាពួកគាត់ទើបនឹងចូលធ្វើការងារដំបូងៗក៏ដោយ។ បើបូកនឹងអត្ថប្រយោជន៍ផ្សេងៗទៀត កម្មករ-កម្មការនី នៅរោងចក្រនេះ ទទួលបានថវិកាសរុបពី ៣០០ ទៅ ៣២០ដុល្លារ។
កញ្ញា ឡុង ស្រីពៅ បានបញ្ជាក់បែបនេះថា «តាមបទពិសោធន៍របស់ខ្ញុំ Estimate គាត់អាចទទួលបានពី ៣០០ ទៅ ៣២០ដុល្លារ ខែខ្លះអាចលោតដល់ ៣៥០ដុល្លារ បើសិនជាប្រាក់រង្វាន់ប្រចាំសប្ដាហ៍របស់គាត់»។
![](https://www.kampucheathmey.com/wp-content/uploads/2023/06/ddd-1024x576.jpg)
លោក សំ វិសិដ្ឋ ប្រធានសហជីពដើម្បីសិទ្ធិការងារប្រចាំរោងចក្រ ហ្ស៊ីជាង ហេងហ្វេង ថប លេហ្សឺរ (ខេមបូឌា) ឯ.ក បានឲ្យដឹងដែរថា រោងចក្រនេះ បានបើកដំណើរការនៅខែកក្កដា ឆ្នាំ ២០១៩ ហើយមានកម្មករ-កម្មការនី កំពុងបម្រើការងារចំនួន ៧៣៥នាក់ ដោយស្រ្ដីមានចំនួន ៤៦៨នាក់។
![](https://www.kampucheathmey.com/wp-content/uploads/2023/06/004-5-1024x768.jpg)
លោក សំ វិសិដ្ឋ បានឲ្យដឹងបន្តថា ការបញ្ជាទិញពីសហរដ្ឋអាមេរិក នៅតែបន្តមានជាបន្តបន្ទាប់ ហើយកម្មករ-កម្មការនី ក៏ទទួលការងារបន្ថែមម៉ោងជាបន្តបន្ទាប់ដែរ។ លោកថា «ចំពោះខាងនយោជក គឺគាត់មានការយកចិត្តទុកដាក់ ជាមួយបងប្អូនកម្មករ ក៏ដូចជានៅពេលបងប្អូនកម្មករមានបញ្ហាអី គាត់សួរផ្ទាល់ៗតែម្ដង ហើយគាត់លើកទឹកចិត្តពួកគាត់»។
![](https://www.kampucheathmey.com/wp-content/uploads/2023/06/006-1-1024x576.jpg)
រីឯលោក សំ សឿន ប្រធានក្រុមប្រឹក្សាជាតិសហជីព និងជាប្រធានសហភាពពលកម្មជាតិកម្ពុជា បានឲ្យដឹងដែរថា សហជីពនៅក្រោមសហភាពរបស់លោក បានធ្វើការងារជាមួយរោងចក្រ ហ្ស៊ីជាង ហេងហ្វេង ថប លេហ្សឺរ រយៈពេល ៤ឆ្នាំមកហើយ ដោយបានសម្របសម្រួលធ្វើយ៉ាងណាឲ្យមានសុខដុមរមនា នៅក្នុងរោចក្រនេះ។
![](https://www.kampucheathmey.com/wp-content/uploads/2023/06/005-5-1024x768.jpg)
លោក សំ សឿន មានប្រសាសន៍បែបនេះថា «សហជីពយើងបានធ្វើការជាមួយនឹងរោងចក្រនេះ ចាប់តាំងពីឆ្នាំ ២០១៩មកម្លេះ ជាមួយនឹងការបង្កើតថ្មីៗ នៃការបង្កើតឲ្យមានរោងចក្រនេះ យើងក៏បានកសាងនូវរចនាសម្ព័ន្ធសហជីពរបស់យើងនៅទីនេះ ដើម្បីរួមចំណែកក្នុងការទំនាក់ទំនងផ្នែកវិជ្ជាជីវៈរវាងកម្មករ និងនិយោជក ដើម្បីធ្វើយ៉ាងណាឲ្យមានសុខដុមរមនា នៅកន្លែងការងារ»។
សូមជម្រាបថា រោងចក្រ ហ្ស៊ីជាង ហេងហ្វេង ថប លេហ្សឺរ (ខេមបូឌា) ឯ.ក មានទីតាំងស្ថិតនៅក្នុងសួនវឌ្ឍនៈ ២ ផ្លូវជាតិលេខ ៣ ភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។ បើតាមកញ្ញា ឡុង ស្រីពៅ ប្រធានរដ្ឋបាលនៃរោងចក្រ បានបញ្ជាក់ដែរថា រោងចក្ររបស់កញ្ញា កំពុងត្រៀមបង្កើតអគារមួយបន្ថែមទៀត ហើយត្រូវការកម្មករ-កម្មការប្រមាណ ២០០ ទៅ ៣០០នាក់បន្ថែមទៀត។
សម្រាប់ប្រាក់ខែ និងអត្ថប្រយោជន៍ដែលកម្មករ-កម្មការនី នៅរោងចក្រនេះទទួលបានរួមមាន៖ ប្រាក់ខែគោល ២០០ដុល្លារ+ប្រាក់ជំនាញ ១៥-១៥០ដុល្លារ+ប្រាក់ព្រីម ១៣ដុល្លារ+ប្រាក់បាយថ្ងៃត្រង់ ១៣ដុល្លារ+ប្រាក់ធ្វើដំណើរ ១១ដុល្លារ+ប្រាក់អតីតភាពការងារ ៣-១៤ដុល្លារ+ប្រាក់ថែមម៉ោង ៨០ដុល្លារ+ប្រាក់បាយថែមម៉ោង ១ដុល្លារ/២ម៉ោង+ប្រាក់រង្វាន់បច្ចេកទេស ៣-២០ដុល្លារ+ប្រាក់រង្វាន់លើកទឹកចិត្តប្រចាំខែ៥ដុល្លារ+ប្រាក់ដេរស៊ីប៉ុង ១-១៨០ដុល្លារ+ប្រាក់រង្វាន់ប្រចាំសប្តាហ៍ ០.៧៥-៦០ដុល្លារ+ប្រាក់រង្វាន់កុងត្រា ៥ភាគរយ ៣០-៥០ដុល្លារ/៣ខែ+ប្រាក់បំណាច់ឆ្នាំ ១៥០-២៣០ដុល្លារ/១ឆ្នាំ+ប្រាក់សោធន ៥០ភាគរយ/១ខែ+បសស ប្រាក់ឧបត្ថម្ភថែទាំសុខភាព+ហាន័ភ័យការងារ៕
អត្ថបទ៖ ឃួន សុភ័ក្រ
![](https://kampucheathmey.com/wp-content/uploads/2020/12/1-01-2-01-1.png)
-
សន្តិសុខសង្គម៣ ថ្ងៃ ago
«ចែមុំបុកល្ហុង» សង្ស័យបង្កប់សេវាកម្មផ្លូវភេទ នគរបាលចុះបង្ក្រាបឃាត់ខ្លួនមនុស្ស១១នាក់
-
ជីវិតកម្សាន្ដ៦ ថ្ងៃ ago
ផ្ទុះការចាប់អារម្មណ៍នឹងយុវតីម្នាក់ សំឡេងពីរោះ ច្រៀងស្រដៀងនឹងរាជិនីសំឡេងសារិកាមាស ប៉ែន រ៉ន
-
សន្តិសុខសង្គម៦ ថ្ងៃ ago
អ្នកកាសែតម្នាក់ត្រូវឃាត់ខ្លួនក្រោយដោះមីនតោនដឹកយកទៅឱ្យប៉ូលិស
-
ព័ត៌មានអន្ដរជាតិ៥ ថ្ងៃ ago
ធ្លាក់យន្តហោះនៅ អាឡាស្កា អ្នកជិះក្នុងនោះ ស្លាប់ទាំងអស់
-
ព័ត៌មានជាតិ៣ ថ្ងៃ ago
ករណីលូ១តម្លៃ៤០ដុល្លា៖ អាជ្ញាធរ ថាមិនបានយកលុយពីពលរដ្ឋឡើយ គឺពលរដ្ឋជួលភាគីឯកជនឱ្យដាក់ខ្លួនឯង
-
ជីវិតកម្សាន្ដ៣ ថ្ងៃ ago
G-Devith ដាក់បណ្តឹងទៅ UNICEF នៅកម្ពុជា ដើម្បីលុបជាអចិន្ត្រៃយ៍គ្រប់គណនីហ្វេសប៊ុក ដែលប៉ះពាល់សិទ្ធិកុមារ តាមគ្រប់រូបភាព
-
ចរាចរណ៍៣ ថ្ងៃ ago
ផ្លូវ៦០ម៉ែត្រទៀត! រថយន្ដពាក់ស្លាកលេខរដ្ឋ បុករះរថយន្ដ២គ្រឿងកំពុងឈប់ចាំភ្លើងស្តុបរងការខូចខាត
-
ជីវិតកម្សាន្ដ៣ ថ្ងៃ ago
G-Devith ប្តេជ្ញារកយុត្តិធម៌ឱ្យគ្រួសារ ក្រោយម្ចាស់ផេក «អាក្លូ» ផ្លែផ្កាគ្រួសារខ្លួនជារឿយៗ ពិសេសទាញកូនប្រុសទៅពាក់ព័ន្ធ