សម្ដេចតេជោ ហ៊ុន សែន នឹងផ្អាកជួបកម្មករអំឡុងពេលបោះឆ្នោត តែក្រោយបោះឆ្នោតនឹងបន្តជួបទៀត

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា សម្ដេច នឹងផ្អាកជួបសំណេះ​សំណាលជាមួយកម្មករ-កម្មការនី នៅក្នុងអំឡុងពេលយុទ្ធនការបោះឆ្នោតជ្រើសតាំង តំណាងរាស្រ្ដ នីតិកាលទី ៧ តែនៅក្រោយការបោះឆ្នោតបានបញ្ចប់ សម្ដេច នឹងបន្តចុះជួបបន្តទៀត។

ការឲ្យដឹងរបស់សម្ដេចតេជោ ហ៊ុន សែន ធ្វើឡើងក្នុងពិធីជួបសំណេះសំណាល និងសួរសុខទុក្ខជាមួយកម្មករ-កម្មការិនី នៅស្រុកជើងព្រៃ ខេត្តកំពង់ចាម នាព្រឹកថ្ងៃទី ១៦ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន បានថ្លែងថា សម្ដេច នឹងផ្អាកជួបសំណេះសំណាល និងសួរសុខទុក្ខកម្មករ-កម្មការនី ក្នុងអំឡុង​ពេលយុទ្ធនាការបោះឆ្នោត តែនៅពេលបោះឆ្នោតរួចហើយ សម្ដេច នឹងបន្តជួបសំណេះសំណាល និងសួរសុខទុក្ខបន្តទៀត។

សម្ដេចតេជោ ហ៊ុន សែន បញ្ជាក់បែបនេះថា «ព្រោះបើសិនចុះទៅតាមរោងចក្រក្នុងពេលយុទ្ធនាការបោះឆ្នោត បែរជាមានការផ្ដល់លុយផ្ដល់កាក់ សម្រាប់អ្នកមានផ្ទៃពោះ ឬក៏មានម្ហូបអាហារ មានស្អី មាននំបុ័ង មានទឹកក្រូច មានស្អីគេផាក គេប្ដឹងយើង ចឹងយើងត្រូវគោរពច្បាប់បោះឆ្នោត​»។

សម្ដេចតេជោ ហ៊ុន សែន រំលឹកថា កាលពីជុំទីមួយសម្ដេច បានជួបសំណេះសំណាល និងសួរសុខទុក្ខចំនួន ៧៧លើក ដែលមានកម្មករ-កម្មការនីរហូតដល់ ១លាននាក់។

សម្ដេចតេជោ ហ៊ុន សែន បានស្នើថា បន្ទាប់ពីបានជួបចំនួន ១៨លើក ក្នុងជុំទីពីរនេះហើយ គឺសម្ដេច នឹងផ្អាកជួបមួយ​រយៈ​សិន ហើយនៅពេលបោះឆ្នោតបានបញ្ចប់ និងបង្កើតរាជរដ្ឋាភិបាលថ្មី សម្ដេច នឹងបន្តជួបសំណេះសំណាល និងសួរសុខទុក្ខកម្មករ-កម្មការនី បន្តទៀត៕

អត្ថបទ៖ ឃួន សុភ័ក្រ