សម្ដេចតេជោ ហ៊ុន សែន បញ្ជាកងកម្លាំងទប់ស្កាត់ក្រុមឧទ្ទាមវៀតណាមដែលអាចនៅកម្ពុជា

សម្ដេចតេជោ ហ៊ុន សែន បញ្ជាដល់កងកម្លាំងប្រដាប់អាវុធ និងអាជ្ញាធរកម្ពុជា ទប់ស្កាត់បណ្ដាញក្រុមឧទ្ទាមវៀតណាម ដែលអាចសម្ងំនៅប្រទេសកម្ពុជា។ បទបញ្ជារបស់សម្ដេចតេជោ ធ្វើឡើងនៅថ្ងៃទី១៦ ខែមិថុនា ឆ្នាំ២០២៣នេះ ក្រោយក្រុមឧទ្ទាមវៀតណាម បានចាញ់ការប្រយុទ្ធនៅក្នុងប្រទេសវៀតណាម កាលពីប៉ុន្មានថ្ងៃមកនេះ។

ពីវេទិកាសំណេះសំណាលជាមួយកម្មករ-កម្មការិនី នៅស្រុកជើងព្រៃ ខេត្តកំពង់ចាម នៅព្រឹកនេះ សម្ដេចតេជោ ហ៊ុន សែន បានចេញបទបញ្ជាផ្ទាល់មាត់ដល់កងកម្លាំងប្រដាប់អាវុធទាំងអស់ បង្កើនការយកចិត្តទុកដាក់ដោយសហការជាមួយភាគីវៀតណាម ដើម្បីទប់ស្កាត់ការប្រមូលផ្ដុំកម្លាំង នៃបណ្ដាញក្រុមឧទ្ទាមរបស់វៀតណាម ដែលអាចលួចចូលមកកម្ពុជា ក្រោយបើកការប្រយុទ្ធនៅក្នុងប្រទេសវៀតណាម។

សម្ដេចតេជោ ហ៊ុន សែន ក៏បានបញ្ជាឱ្យអាជ្ញាខេត្តមណ្ឌលគិរី និងខេត្តរតនគិរី ក៏ដូចជាអាជ្ញាធរខេត្តជាប់ព្រំដែនជាមួយវៀតណាម ត្រូវចុះពិនិត្យដោយផ្ទាល់នៅតាមភូមិនានាក្នុងភូមិសាស្ត្ររបស់ខ្លួន ដោយមិនត្រូវអនុញ្ញាតជាដាច់ខាតចំពោះការជ្រកកោនរបស់បណ្ដាញក្រុមឧទ្ទាមរបស់វៀតណាម ដែលអាចសម្ងំរស់នៅជាមួយប្រជាពលរដ្ឋខ្មែរនៅតាមភូមិ។

លើសពីនេះ សម្ដេចតេជោនាយករដ្ឋមន្ត្រី ក៏បានព្រមានដល់អង្គការអន្តរជាតិមួយចំនួននៅកម្ពុជា គឺត្រូវជៀសឱ្យឆ្ងាយពីការទទួលយកបណ្ដាញក្រុមឧទ្ទាមវៀតណាម ដោយសម្ដេចតេជោ សង្កត់ធ្ងន់ថា សកម្មភាពនេះជាឧក្រិដ្ឋកម្មអន្តរជាតិ ហើយកម្ពុជាមិនអនុញ្ញាតឱ្យយកទឹកដីកម្ពុជា ដើម្បីប្រឆាំងរដ្ឋដទៃឡើយ៕

អត្ថបទ៖ ធឿន វ៉ាន់សុង