បណ្ណបើកបរជាតិ ក៏អាចប្តូរជាបណ្ណអនុញ្ញាតបើកបរអន្តរជាតិបាន

ក្រសួងសារធារណការ និងដឹកជញ្ជូន បានជូនដំណឹងស្តីពីការប្តូរបណ្ណបើកបរជាតិ ទៅជាបណ្ណអនុញ្ញាតបើកបរអន្តរជាតិ
ដោយអះអាងថា បណ្ណបើកបរជាតិ គឺអាចស្នើសុំប្តូរបណ្ណអនុញ្ញាតបើកបរអន្តរជាតិបាន បន្ទាប់ពីមានចម្ងល់ជាច្រើនពាក់ព័ន្ធនឹងរឿងនេះ។ សម្រាប់អ្នកដែលមានបំណងចង់ប្តូរបណ្ណបើកបរជាតិ ទៅជាបណ្ណអនុញ្ញាតបើកបរអន្តរជាតិ គឺ​គ្រាន់តែតម្រូវឱ្យ​មាន​ឯកសារចាំបាច់មួយចំនួន និងត្រូវចំណាយលើថ្លៃសេវា ២៥០.០០០ រៀល។

យោងតាម​​​​​ការបញ្ជាក់ពីក្រសួង​សាធារ​ណ​ការ​ និង​ដឹក​ជញ្ជូន​​ ​របៀបស្នើរ​​​សុំពី​បណ្ណបើកបរ​ជាតិ​ ប្តូរ​​ទៅ​បណ្ណ​អនុញ្ញាតបើកបរអន្ត​រជាតិ​​​​​​​ គឺគ្រាន់តែយកបណ្ណបើកបរជាតិរបស់លោកអ្នក ដោយភ្ជាប់ជាមួយឯកសារចាំបាច់មួយចំនួនរួមមាន៖

• បណ្ណបើកបរជាតិ (ច្បាប់ដើមមានសុពលភាពយ៉ាងតិច១ឆ្នាំ)
• អត្តសញ្ញាណប័ណ្ណសញ្ជាតិខ្មែរ (ច្បាប់ចម្លងដែលមានបញ្ជាក់ពីអាជ្ញាធរមានសមត្ថកិច្ច)
• លិខិតឆ្លងដែន និងទិដ្ឋាការមានសុពលភាពមិនតិចជាង១៥ថ្ងៃ (សម្រាប់ជនបរទេស)
• លិខិតបញ្ជាក់ទីលំនៅ (ចេញដោយមេឃុំ/ចៅសង្កាត់ សម្រាប់ជនបរទេស)
• រូបថតខ្នាត ៤.៥ x ៤.៥ ផ្ទៃពណ៌សចំនួន ៤សន្លឹក

បើតាមក្រសួងសាធារណការ​ អ្នកមាន​បណ្ណអនុញ្ញាតបើកបរអន្តរជាតិ អាចបើកបរ​បាន​​​​​នៅតាម​បណ្ដា​ប្រទេសហត្ថលេខី​(​៩៩ប្រទេស) បណ្ណបើកបរអន្តរជាតិមានសុពលភាព ១ឆ្នាំ ស្របតាមអនុសញ្ញាស្ដីពីចរាចរណ៍ផ្លូវគោក ទីក្រុងវីយ៉ន ថ្ងៃទី១៩ ខែកញ្ញា ឆ្នាំ១៩៤៩៕