រោងចក្រសហគ្រាសក្នុងខេត្តកំពង់ស្ពឺ ផ្តល់ចំណូលដល់កម្មករជាមធ្យមជាង ៤៥១លានដុល្លារ

រោងចក្រសហគ្រាសនៅក្នុងខេត្តកំពង់ស្ពឺបានប្រាក់ចំណូលជាមធ្យមដល់ប្រជាពលរដ្ឋជាង ៤៥១លានដុល្លារក្នុងមួយឆ្នាំ។

ថ្លែងក្នុងឱកាសសំណេះសំណាលជាមួយកម្មករ កម្មការិនីនៅក្នុងស្រុកសំរោងទង និងគងពិសី ខេត្តកំពង់ស្ពឺ នាព្រឹកថ្ងៃទី១៧ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន បានមានប្រសាសន៍រំលឹកថា ពីមុនដី១ហិកតាអាចធ្វើស្រែចំការ និងចិញ្ចឹមប្រជាពលរដ្ឋបានតែ១គ្រួសារ ដែលមានសមាជិកប្រមាណ៥នាក់ប៉ុណ្ណោះ ប៉ុន្តែនៅពេលមានការវិនិយោគលើផ្ទៃដី១ហិកតា គឺអាចចិញ្ចឹមប្រជាពលរដ្ឋបានពី៣-៤ពាន់គ្រួសារ តាមរយៈការវិនិយោគលើរោងចក្រសហគ្រាស និងផ្នែកឧស្សាហកម្ម។

សម្តេចតេជោ បានមានប្រសាសន៍បញ្ជាក់ថា នយោបាយត្រឹមត្រូវរបស់រាជរដ្ឋាភិបាលកម្ពុជា គឺការសម្រេចចិត្តឱ្យមានទីតាំងរោងចក្រនៅខេត្តកំពង់ស្ពឺ ដែលពេលបច្ចុប្បន្ននេះ មានរោងចក្រ សហគ្រាស វិស័យកាត់ដេរចំនួន ១៩១ មានកម្មករនិយោជិតជាង១៤ម៉ឺន៥ពាន់នាក់ និងមានប្រាក់ឈ្នួលមធ្យមសរុបជាង ៤៥១លានដុល្លារក្នុងមួយឆ្នាំ។

សម្តេចតេជោបានមានប្រសាសន៍បន្តទៀតថា បញ្ហាកូវីដ-១៩ មិនមែនជាកត្តារាំងស្ទះ ឬឧបសគ្គមិនអាចឱ្យមានជំនួបរបស់សម្តេចជាមួយបងប្អូនកម្មករ កម្មការិនីនោះទេ។ សម្តេចតេជោ ហ៊ុន សែន បានមានប្រសាសន៍ទៀតថា ជំនួបរវាងសម្តេច ជាមួយបងប្អូនកម្មករ កម្មការិនី គឺធ្វើឡើងដោយក្តីគោរពស្រឡាញ់ ការជឿទុកចិត្ត ការយកចិត្តទុកដាក់ និងជាការថ្លែងអំណរគុណដល់បងប្អូនកម្មករកម្មការិនីដែលកន្លងមកតែងតែគាំទ្រចំពោះការដឹកនាំរបស់សម្ដេច។

មុននឹងបញ្ចប់ សម្តេចតេជោ ហ៊ុន សែន ក៏បានជូនពរដល់បងប្អូនកូនក្មួយ កម្មករ កម្មការិនីទាំងអស់ ជួបតែសេចក្តីសុខ សេចក្តីចម្រើន ជាពិសេសកម្មការិនីដែលមានផ្ទៃពោះសូមឲ្យទទួលបាននូវសុខភាពល្អ ទាំងម្ដាយ និងកូននៅពេលសម្រាលហើយក៏បានផ្ដល់ជាថវិកាសម្រាប់ស្ត្រីមានផ្ទៃពោះចំនួនសរុបចំនួន៥១៥នាក់ក្នុងម្នាក់ៗ ២០០ដុល្លារ ក្នុងនោះមានស្ត្រីមានកូនភ្លោះ២ ចំនួន៤នាក់ ក្នុងម្នាក់ៗ ចំនួន៤០០ដុល្លារផងដែរ៕