សម្ដេចតេជោ ហ៊ុន សែន អរគុណជប៉ុន បារាំង និងសហភាពអឺរ៉ុប ដែលផ្ដល់ថវិកាសម្រាប់បង្កើតរោងចក្រប្រព្រឹត្តកម្មទឹកស្អាត

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងអំណរគុណដល់រដ្ឋាភិបាលជប៉ុន រដ្ឋាភិបាលបារាំង និងសហភាពអឺរ៉ុប​ ដែលបានផ្ដល់ថវិកាកម្ចីសម្រាប់ដោះស្រាយបញ្ហាការផ្គត់ផ្គង់ទឹកស្អាត នៅរាជធានីភ្នំពេញ។ នៅក្នុងនោះដែរ សម្ដេចតេជោ ហ៊ុន សែន លើកឡើងដែរថា នៅរាជធានីភ្នំពេញ បើមិនឲ្យកម្ពុជាពឹងជប៉ុន ពឹងបារាំង និងសហភាពអឺរ៉ុប ថាតើឲ្យកម្ពុជាពឹងអ្នកណា?

ការថ្លែង និងលើកឡើងរបស់សម្ដេចតេជោ ហ៊ុន សែ​ន ខាងលើនេះ បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ រោងចក្រប្រព្រឹត្តកម្មទឹកស្អាតបាក់ខែង ស្ថិតនៅសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ នាព្រឹកថ្ងៃទី ១៩ ខែមិថុនា​ ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបែបនេះថា «ខ្ញុំអាចនិយាយនូវពាក្យដែលហ៊ាននិយាយថា នៅទីក្រុងភ្នំពេញ បើមិនឲ្យខ្ញុំពឹងជប៉ុន បើមិនឲ្យខ្ញុំពឹងបារាំង បើមិនឲ្យខ្ញុំពឹងសហភាពអឺរ៉ុប​ តើឲ្យខ្ញុំទៅពឹងអ្នកណា? អានេះគឺជារឿងពិតៗ ដែលបានកើតឡើងនៅក្នុងប្រវត្តិនៃការផ្គត់ផ្គង់ទឹក នៅក្នុងទីក្រុងភ្នំពេញ»។​

សម្ដេចតេជោ ហ៊ុន សែន បានថ្លែងអំណរគុណដល់រដ្ឋាភិបាលជប៉ុន រដ្ឋាភិបាលបារាំង​ និងសហភាពអឺរ៉ុប ដែលបានផ្ដល់ថវិកាកម្ចីសម្រាប់ដោះស្រាយបញ្ហាការផ្គត់ផ្គង់ទឹកស្អាត នៅក្នុងរាជធានីភ្នំពេញ និងក្រុងតាខ្មៅ នៃខេត្តកណ្ដាល។

យ៉ាងណាក៏ដោយ សម្ដេចតេជោ ហ៊ុន សែន លើកឡើងថា​ អតុល្យភាពរវាងតម្រូវ និងការផ្គត់ផ្គង់ទឹកនៅតែមាន។ ដូច្នេះហើយ ទើបរាជរដ្ឋាភិបាលកម្ពុជា បន្តសាងសង់រោងចក្រប្រព្រឹត្តកម្មទឹកស្អាត ជាបន្តបន្ទាប់ទៀត៕