លោកស្រី ជា សិរី ណែនាំដល់យុវជនលេងកីឡាដើម្បីសុខភាព និងចាកឆ្ងាយពីអំពើទាំងឡាយដែលសង្គមស្អប់ខ្ពើម

លោកស្រីបណ្ឌិត ជា សិរី សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាអនុប្រធានទី១ក្រុមការងារចុះមូលដ្ឋានស្រុកសន្ទុក បានណែនាំដល់យុវជនលេងកីឡាឱ្យបានគ្រប់ៗគ្នាដើម្បីសុខភាព និងចាកឆ្ងាយពីអំពើទាំងឡាយដែលសង្គមស្អប់ខ្ពើម។

ថ្លែងក្នុងពិធីបិទការប្រកួតបាល់ទាត់មិត្តភាពយុវជនឃុំប្រាសាទ និងកំពង់ថ្ម ក្រោមប្រធានបទ “កីឡារស់ក្នុងសន្តិភាព” កាលពីថ្ងៃទី១៨មិថុនា លោកស្រីបានមានប្រសាសន៍ថា « ការលេងកីឡាមិនត្រឹមតែផ្ដល់ឱ្យយុវជនយើងនូវសុខភាពល្អប៉ុណ្ណោះទេ តែថែមទាំងបង្ហាញការរីកចម្រើននៃផ្នត់គំនិតល្អៗនៅក្នុងជីវភាពរស់នៅរបស់ប្រជាជនពិសេសក្នុងស្រទាប់យុវជនឲ្យប្រព្រឹត្តិតែអំពើល្អ និងចាកឆ្ងាយពីអំពើផងទាំងឡាយណាដែលសង្គមស្អប់ខ្ពើមផងដែរ»។

លោកស្រី ជា សិរី វាយតម្លៃខ្ពស់ចំពោះការចូលរួមប្រកួតរបស់យុវជនជាកីឡាករទាំងអស់ ដែលបានធ្វើឲ្យការប្រកួតប្រព្រឹត្តិទៅដោយប្រកបដោយលទ្ធផលល្អក្នុងស្មារតីមិត្តភាពនិងសាមគ្គីភាព ។ លោកស្រីបានបញ្ជាក់ថា កាលដែលយើងមានឱកាសបានរៀបចំការប្រកួតកីឡាកម្រិតថ្នាក់ឃុំ ស្រុក ពិសេសការប្រកួតកីឡាស៊ីហ្គេម លើកទី៣២ និងប៉ារ៉ាហ្គេមដែលកម្ពុជាធ្វើជាម្ចាស់ផ្ទះទទួលបានជោគជ័យកន្លងទៅនេះ គឺអាស្រ័យដោយប្រទេសជាតិមានសុខសន្តិភាព និងមានការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្ដេចតេជោហ៊ុនសែន នាយករដ្ឋមន្ត្រីនៃរាជរដ្ឋាភិបាលកម្ពុជា។ដូចនេះយុវជនយើងត្រូវចងចាំនិងត្រូវរួបរួមគ្នាការពារសន្តិភាពនេះឲ្យបានដាច់ខាត។

ជាមួយនេះដែរលោកស្រីបានអំពាវនាវដល់យុវជនត្រូវខិតខំបន្តប្រឹងប្រែងរៀនសូត្រ និងបំពេញការងារឱ្យបានល្អដើម្បី​ជួយដល់គ្រួសារ ក៏ដូចជាសង្គមជាតិ ជាពិសេសឲ្យក្លាយជាកម្លាំងស្នូលនៃការអភិវឌ្ឍជាតិនាពេលខាងមុខ ដែលរាជរដ្ឋាភិបាលនឹងផ្ដល់ឱ្យការងារយ៉ាងច្រើននៅគ្រប់វិស័យ។

សូមរំលឹកថាការប្រកួតបាល់ទាត់មិត្តភាពរវាងយុវជនឃុំប្រាសាទ និងឃុំកំពង់ថ្មនេះមានរយះពេល៤ សប្តាហ៍។ជាលទ្ធផលជ័យលាភី លេខ ១ បានទៅក្រុមយុវជនឃុំកំពង់ថ្មទទួលបានពាន១និងថវិកា១ លានរៀល,លេខ ២ បានទៅក្រុមយុវជនឃុំប្រសាទទួលបានថវិកា៧០ ម៉ឺនរៀល លេខ៣ថវិកា៥០ម៉ឺនរៀលនិងផ្ដល់រង្វាន់លើកទឹកចិត្តដល់កីឡាករយុវជនមកពីបណ្ដាភូមិរបស់ឃុំទាំង២ផងដែរ។

ក្នុងឱកាសនោះលោកស្រីបណ្ឌិត ជា សិរី ក៏បានអញ្ជើញទៅប្រគល់ផ្ទះថ្មី២ខ្នងដល់គ្រួសារខ្វះខាតរស់នៅភូមិស្រែតាកោ ឃុំប្រាសាទដែលជាអំណោយមនុស្សធ៌មរបស់លោកបណ្ឌិត ជា ចាន់តូ និងលោកលោកស្រី ខៀវ ស៊ីណា៕

អត្ថបទ៖ សំអឿន