រោងចក្រប្រព្រឹត្តកម្មទឹកស្អាត បាក់ខែង ជំហានទី ២ គ្រោងបញ្ចប់ការសាងសង់នៅដើមឆ្នាំក្រោយ

លោក ចម ប្រសិទ្ធ ទេសរដ្ឋមន្តី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅក្នុងពិធីសម្ពោធដាក់ឱ្យដំណើរការជាផ្លូវការរោងចក្រប្រព្រឹត្តកម្មទឹកស្អាត បាក់ខែង ជំហានទី ១ របស់រដ្ឋាករទឹកស្វយ័តក្រុងភ្នំពេញនា ថ្ងៃទី១៩ ខែមិថុនា ឆ្នាំ២០២៣នេះ បានឱ្យដឹងថា ការសាងសង់រោងចក្រប្រព្រឹត្តកម្មទឹកស្អាតបាក់ខែង ជំហានទី ២ អាចនឹងបញ្ចប់ទៅ នៅខែមករា ឆ្នាំ ២០២៤។

លោក ចម ប្រសិទ្ធ ទេសរដ្ឋមន្តី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងបន្តថា ដោយលក្ខខណ្ឌអំណោយផល នៃសុខភាពសាធារណៈ និងសុខសន្តិភាព បានផ្ដល់លទ្ធភាពឱ្យការសាងសង់រោងចក្រប្រព្រឹត្តកម្មទឹកស្អាត បាក់ខែង ជំហានទី២ អាចនឹងបញ្ចប់ទៅនៅខែមករា ឆ្នាំ២០២៤ ខាងមុខ ដោយមានសមត្ថភាពផលិតទឹកស្អាត ១៩ម៉ឺន ៥ពាន់ម៉ែត្រគូប/ក្នុងមួយថ្ងៃ ស្មើគ្នានឹងរោងចក្រផលិតទឹកស្អាត ជំហានទី១។

លោក ចម ប្រសិទ្ធ បានបញ្ជាក់ថា រោងចក្រផលិតទឹកស្អាតបាក់ខែងទាំង ២ជំហាន មានសមត្ថភាពផលិតទឹកស្អាត ដល់ ៣៩ម៉ឺនម៉ែត្រគូប/ក្នុងមួយថ្ងៃ។ នេះជាសមត្ថភាពដ៏ធំមហិមាលើកដំបូងនៅក្នុងប្រវត្តិសាស្ត្រ នៃការកសាងរោងចក្រផលិតទឹកស្អាត នៅក្នុងប្រទេសកម្ពុជា។

ជាមួយគ្នានេះ ចំណុចដែលកម្ពុជាមិនដែលមានពីមុនសោះ និងជាកំណត់ត្រាប្រវត្តិសាស្ត្រថ្មីក្នុងវិស័យទឹកស្អាត គឺការដ្ឋានសាងសង់ប្រព័ន្ធផ្គត់ផ្គង់ទឹកស្អាតថ្មីនេះ បានដាក់បំពង់មេនាំទឹកខ្នាតធំជាងគេបំផុត ដែលមានអង្កត់ផ្ចិតទំហំរហូតដល់ ២ ០០០ មិល្លីម៉ែត្រ (២ម៉ែត្រ) ដែលមានអាយុកាលយូរអង្វែងលើសពី ៥០ឆ្នាំ។

គួររំលឹកថា ក្នុងឱកាសបើកការដ្ឋានសាងសង់រោងចក្រប្រព្រឹត្តកម្មទឹកស្អាតបាក់ខែង កាលពីថ្ងៃទី១ ខែកុម្ភៈ ឆ្នាំ២០២១ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដល់អនុសាសន៍ណែនាំ រដ្ឋាករទឹកស្វយ័តក្រុងភ្នំពេញ និងក្រុមហ៊ុនវាំងស៊ី (VINCI Construction Grands Projets) ពន្លឿនការងារសាងសង់ ដើម្បីដោះស្រាយបញ្ហាទឹកស្អាតជូនប្រជាជនជាង ៤ ម៉ឺនគ្រួសារ នៅរាជធានីភ្នំពេញ និងតំបន់ជាយក្រុង ដែលកំពុងមានបញ្ហាប្រឈមនឹងកង្វះទឹកស្អាត៕