គ្រោងទិញស្ករត្នោត១៥០តោនដើម្បីកែឆ្នៃនាំចេញ​ទៅក្រៅប្រទេស

សម្រាប់ឆ្នាំ២០២៣នេះក្រុមហ៊ុនខនហ្វីរេល នឹងទិញស្ករត្នោតចំនួន១៥០តោនពីប្រជាកសិករដើម្បីធ្វើការកែឆ្នៃនាំចេញទៅលក់នៅក្រៅប្រទេស។

ថ្លែងប្រាប់អ្នកសារព័ត៍មាននៅក្នុងពិធីប្រគល់ពានរង្វាន់ស្ករត្នោតឆ្នាំ២០២៣ កាលពីល្ងាច ថ្ងៃទី១៧មិថុនា លោកឧកញ៉ា ឱសថបណ្ឌិត ហៃ លីអ៊ាង ប្រធានមូលនិធិគីណាល់ និងជាប្រធានអគ្គនាយកសហគ្រាសផលិតឱសថប៉េប៉េអឹម និងក្រុមហ៊ុនខនហ្វីរេលបានមានប្រសាសន៍ថា គម្រោងទិញស្ករត្នោត១៥០តោននេះ គឺយើងទិញពីប្រជាពលរដ្ឋច្រើនមុខមិនមែន​ទិញស្ករត្នោតស្ងួតទាំងអស់នោះទេ គឺមានទិញជាសេរ៉ូ និងទឹកត្នោតដើម្បីធ្វើការកែឆ្នៃបន្ថែមទៅជាស្ករសូកាឡាត្នោត ឬផ្លែឈើផ្សេងៗទៀតប្រើស្ករត្នោតសម្រាប់នាំចេញលក់នៅជប៉ុន វៀតណាម និងបារាំងជាដើម។

លោកបានបន្តថា ពីមុនស្ករត្នោតមិនសូវមានតម្លៃប៉ុន្មានទេ ពោលគឺ១គីឡូតែ៥០០រៀលប៉ុណ្ណោះ ថោកជាងស្ករសរទៅទៀត ប៉ុន្តែចាប់តាំងពីយើងបានទិញពីឆ្នាំ២០០១មកឃើញថា ផលិតផលស្ករត្នោតមានហាងឆេង និងលក់បានតម្លៃខ្ពស់ដែលបច្ចុប្បន្ននេះ១គីឡូតម្លៃជិត១ម៉ឺនរៀល។

លោកបានបន្តទៀតថា «យើងបានផ្សព្វផ្សាយស្ករត្នោតមុនគេ និងបានទូលំទូលាយ និងត្រូវបានគេទទួលស្គាល់ទាំង​ថ្នាក់ជាតិ និងអន្តរជាតិរហូតទទួលបានពានរង្វាន់ហើយយើងបានបន្តជំរុញការផ្សព្វផ្សាយផលិតផលម្រេចផលិត​ផលស្វាយនិងផលិតផលប្រហុកដល់អន្តរជាតិជាបន្តបន្ទាប់ហើយសុទ្ធតែទទួលបានការគាំទ្រពីកម្រិតជាតិនិងអន្តរជាតិផងដែរ»។

លោកបានអំពាវនាវដល់ប្រជាពលរដ្ឋខ្មែរជួយគាំទ្រផលិតផលខ្មែរ និងខិតខំថែរក្សាផលិតផលដែលដូនតាបានបន្សល់ទុកឱ្យបានគង់វង្សដូចជាប្រហុកខ្មែរដែលតាំងពីដូនតាសម័យអង្គរមកមិនដែលនឹកឃើញចាប់អារម្មណ៍ និងលើកតម្កើងដើម្បីកែឆ្នៃផលិតផលប្រហុកនេះទេ។

លោកបានបញ្ជាល់ថា ប៉ុន្តែបច្ចុប្បន្ននេះយើងគ្រោងធ្វើការកែឆ្នៃផលិតផលប្រហុកទៅជាផលិតផលទំនើបដើម្បីអន្តរជាតិទទួលស្គាល់ និងជាកម្មសិទ្ធបញ្ញារបស់ខ្មែរផងដែរហើយនាពេលខាងមុខនេះយើងគ្រោងនឹងកែឆ្នៃប្រហុកខ្មែរនាំចេញទៅលក់នៅក្រៅប្រទេសផងដែរដែលនឹងជួយលើកស្ទួយដល់សេដ្ឋកិច្ចប្រជាកសិករ និងសេដ្ឋកិច្ចជាតិកាន់តែរីកចំរើនថែមទៀត៕

អត្ថបទ៖ សំអឿន