ប្រតិភូកាយរឹទ្ធិជាតិកម្ពុជា នឹងចូលរួមបោះជំរំកាយរឹទ្ធិពិភពលោក នៅសាធារណរដ្ឋកូរ៉េ

នៅថ្ងៃទី១៩ ខែមិថុនា ឆ្នាំ ២០២៣នេះ បណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការ នៃសមាគមកាយឫទ្ធិនារីកម្ពុជា បានអញ្ជើញជួបសំណេះសំណាល និងផ្តល់អនុសាសន៍ដល់ប្រតិភូកាយរឹទ្ធិជាតិកម្ពុជា ចំនួន ៤៧នាក់ ដែលនឹងត្រូវចូលរួមបោះជំរំកាយរឹទ្ធិពិភពលោកលើកទី២៥ នៅសាធារណរដ្ឋកូរ៉េ នៅខែសីហា ឆ្នាំ ២០២៣ ខាងមុខនេះ។​

បណ្ឌិត ពេជ ចន្ទមុន្នី បានឱ្យដឹងថា ការបោះជំរំពិភពលោកនេះ ហៅថា ការបោះជំរំ ជែមប៊ូរី ដែលការបោះជំរំនេះ ធ្វើឡើងសម្រាប់ក្មេងជំទង់ អាយុពី១៤ ទៅ១៧ឆ្នាំ។ ក្នុងនាមជាឧត្តមទីប្រឹក្សារបស់សមាគមកាយរឹទ្ឋជាតិកម្ពុជា បណ្ឌិត ពេជ ចន្ទមុន្នី មានប្រសាសន៍ថា ការបោះជំរំនេះពិតជាមានសារៈសំខាន់ណាស់សម្រាប់ក្មួយៗ ជាពិសេសបានផ្លាស់ប្តូរបទពិសោធន៍ ឱ្យគ្នាទៅវិញទៅមក ដោយបេសកកម្មនេះគឺមានគោលបំណងអភិវឌ្ឍ និងផ្តល់ថាមពលដល់យុវជនទាំងអស់ ដើម្បីក្លាយជាសសរទ្រូង សម្រាប់ប្រទេសជាតិនៅថ្ងៃក្រោយ។

បណ្ឌិត ពេជ ចន្ទមុន្នី បញ្ជាក់ថា សមាគមកាយឫទ្ឋិនារីកម្ពុជា បានផ្តល់ទិសដៅដូចគ្នាទៅលើ កុមារី  និងយុវតី ដើម្បីបំពេញឱ្យគ្នាទៅវិញទៅមក។ ថ្មីៗនេះសមាគមកាយរឹទ្ធិជាតិ ក៏បានធ្វើការបោះជំរំនៅខេត្តកំពង់ធំ ដែលបានអនុញ្ញាតឱ្យ សមាគមកាយឫទ្ធិនារីកម្ពុជា បានចូលរួមផ្លាស់ប្តូរយកបទពិសោធន៍។

បណ្ឌិត ពេជ ចន្ទមុន្នី បានថ្លែងអំណរគុណយ៉ាងជ្រាលជ្រៅ ចំពោះសមាជិកកាយរឹទ្ឋជាតិកម្ពុជា ដែលបានផ្តល់ឱកាស និងការទុកចិត្ត បោះឆ្នោតគាំទ្រលោកជំទាវ ជាឧត្តមទីប្រឹក្សារបស់សមាគមកាយរឹទ្ឋជាតិកម្ពុជា ក្នុងការចូលបរួមណ្តុះបណ្តាលយុវជនជំនាន់ក្រោយ ឱ្យក្លាយជាពលរដ្ឋល្អនៅក្នុងសង្គម។

នៅក្នុងកម្មវិធីនៃការជួបសំណេះសំណាលនេះដែរ លោកស្រី គឹម សេដ្ឋានី រដ្ឋលេខាធិកា នៃក្រសួងអប់រំ យុវជន និងកីឡា និងជាអនុប្រធានកាយរឹទ្ឋិជាតិកម្ពុជា បានចូលរួមស្វាគមន៍យ៉ាងកក់ក្តៅ និងស្និទ្ធស្នាល ដោយលោកស្រី បានបញ្ជាក់ថា ការបោះជំរំកាយរឹទ្ធិ គឺការប្រមូលផ្ដុំកុមារ-យុវជន ជាសមាជិក នៃចលនាកាយរឹទ្ធិជាតិដ៏ច្រើនកុះករ មកពីគ្រប់ទិសទី ដើម្បីធ្វើសកម្មភាពរួមគ្នា។

លោកស្រី គឹម សេដ្ឋានី មានប្រសាសន៍ថា គោលបំណង គឺរួមចំណែកក្នុងការអភិវឌ្ឍ កុមារ និងយុវជន ឱ្យមានសក្ដានុពលភាពពេញលេញខាង ផ្លូវកាយ ផ្លូវបញ្ញា ផ្លូវសង្គម ផ្លូវចិត្ត និងផ្លូវអារម្មណ៍ ដើម្បីឱ្យក្លាយទៅជាពលរដ្ឋមានការទទួលខុសត្រូវ និងទៅជាសមាជិកក្នុងសហគមន៍ តាមមូលដ្ឋានរស់នៅសហគមន៍ជាតិ និងអន្តរជាតិ។

គួរបញ្ជាក់ថា បច្ចុប្បន្ន កាយរឹទ្ធិជាតិកម្ពុជា មានសមាជិកសរុបចំនួន ១៧១ ១៣៥ នាក់ ស្រី ៤៩ភាគរយ៕