ព័ត៌មានជាតិ

បច្ចេកវិទ្យាឌីជីថលកំពុងមានសក្ដានុពលទៅលើសេដ្ឋកិច្ចកម្ពុជា

បានផុស

១ year មុន

នៅ

ថ្ងៃពុធ ២១ មិថុនា ២០២៣

ដោយ

នៅក្នុងបរិបទឧស្សាហកម្ម ៤.០ នេះ កម្ពុជារំពឹងថា នឹងជំរុញវិស័យបច្ចេកវិទ្យាព័ត៌មាន និងទូរគមនាគមន៍ (ICT) ឱ្យមានសន្ទុះ និងល្បឿនថ្មី ដោយចាប់យកវិស័យឌីជីថលជាមូលដ្ឋាន ដើម្បីទាញយកកាលានុវត្តភាព (ដំណើរវិវឌ្ឍត្រូវពេលវេលា) ថ្មីៗ និងជំរុញផលិតភាព ប្រសិទ្ធភាព និងភាពប្រកួតប្រជែងសេដ្ឋកិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា (ឆ្នាំ២០២១-២០៣៥) បានបង្ហាញថា សក្តានុពលសំខាន់ៗ រួមមាន៖

ការតភ្ជាប់ខ្សែចង្វាក់ផលិតកម្ម ខ្សែចង្វាក់តម្លៃតំបន់ និងសកល៖ ផលិតកម្មនៅក្នុងស្រុកនឹងស្ថិតក្នុងវិសាលភាពទូលំទូលាយគ្មានព្រំដែននៃបច្ចេកវិទ្យាឌីជីថល និងសម្រចបាន តាមនិន្នាការសកលភាវូបនីយកម្ម តាមរយៈការតភា្ជប់ទៅនឹងខ្សែច្រវាក់តម្លៃតំបន់ និងសកល។ ជាពិសេស ការតភ្ជាប់សហគ្រាស ធុនតូច និង មធ្យម (SMEs) ទៅក្នុងខ្សែចង្វាក់ផលិតកម្មតំបន់ និងសកល ត្រូវបានរំពឹងថា នឹងក្លាយជាមូលដ្ឋានដ៏រឹងមាំក្នុងការទ្រទ្រង់កំណើនសេដ្ឋកិច្ច ។

ការជំរុញសកម្មភាពពាណិជ្ជកម្ម និង ធុរកិច្ច៖ ប្រសិទ្ធភាពនៃប្រតិបត្តិការទិញ-លក់ទំនិញ និងសេវា ជាពិសេស ពាណិជ្ជកម្មតាមប្រព័ន្ធអេឡិចត្រូនិក តាមរយៈការទូទាត់កាន់តែងាយស្រួល និងរហ័ស គួបផ្សំនឹងការដឹកជញ្ជូនលឿន និងមានថ្លៃសមរម្យ នឹងត្រូវបានលើកកម្ពស់។ បន្ថែមលើនេះ ការគ្រប់គ្រងអាជីវកម្ម និងផលិតកម្ម នឹងកាន់តែមានប្រសិទ្ធភាព ដោយសារការប្រើប្រាស់បច្ចេកវិទ្យាឌីជីថល បូកផ្សំនឹងកម្លាំង ពលកម្មប្រកបដោយជំនាញ។ ជាមួយគ្នានេះដែរ ការរៀបចំពិព័រណ៍តាមប្រព័ន្ធអេឡិចត្រូនិក និងការរៀបចំថ្នាលសម្រាប់ដាក់លក់ និងផ្សព្វផ្សាយផលិតផល ដើម្បីជំរុញការនាំចេញ និងការផ្សារភ្ជាប់ទីផ្សារឱ្យដល់ អតិថិជនចុងក្រោយក៏អាចប្រពឹត្តទៅបានតាមបច្ចេកវិទ្យាឌីជីថល។

ការបង្កើតការងារ ជំនាញ និងការវិនិយោគ៖ ការងារ និងកម្រិតជំនាញ ត្រូវបានរំពឹងថា នឹងកើនឡើង ដើម្បីឆ្លើយតបទៅនឹងតម្រូវការនៃទីផ្សារ តាមរយៈយន្តការរដ្ឋ តួយ៉ាង កម្មវិធីបណ្តុះបណ្តាលបច្ចេកទេស វិជ្ជាជីវៈ និងការបណ្ដុះបណ្តាលជំនាញបន្ថែមដោយវិស័យឯកជន។ ជាមួយគ្នានេះ ការលើកកម្ពស់សហគ្រិន-ភាព និងនវានុវត្តន៍ នឹងរួមចំណែកក្នុងការបង្កើតធុរកិច្ចថ្មី និងការទាក់ទាញការវិនិយោគ នៅក្នុងស្រុក និងក្រៅស្រុក នៅក្នុងវិស័យ ICT (Information and communication technology)។

ការបង្កើនប្រសិទ្ធភាពនៃការផ្តល់សេវាសាធារណៈ៖ សម្រាប់វិស័យសាធារណៈ ការផ្តល់សេវាសាធារណៈ ត្រូវបានរំពឹងថា នឹងមានប្រសិទ្ធភាពកាន់តែប្រសើរ និងតម្លាភាពកាន់តែខ្ពស់ តាមរយៈការទទួលយកផ្នត់គំនិតឌីជីថល និងការលើកកម្ពស់សមត្ថភាពក្នុងការប្រើប្រាស់បច្ចេកវិទ្យាថ្មីៗ។ និន្នាការនេះក៏បានបង្កើនឱកាស សម្រាប់ការដោះស្រាយបញ្ហាជារចនាសម្ព័ន្ធ នៅក្នុងវិស័យប្រពៃណី រួមទាំងវិស័យសេដ្ឋកិច្ច សង្គម និងសន្តិសុខ។

សូមបញ្ជាក់ថា រដ្ឋាភិបាលបានដាក់ចេញនូវផែនការយុទ្ធសាស្ត្របច្ចេកវិទ្យាឌីជីថលរយៈពេល ៥ ឆ្នាំ គឺពីឆ្នាំ ២០២៣ ដល់ឆ្នាំ ២០២៧ ដើម្បីគាំទ្រនូវគោលនយោបាយយុទ្ធសាស្ត្រចតុកោណដំណាក់កាលទី៤ ពង្រឹងប្រសិទ្ធភាពការងារ លើកកម្ពស់ការផ្តល់សេវាសាធារណៈ និងសន្តិសុខជាតិឱ្យកាន់តែមានសុវត្ថិភាពខ្ពស់ តម្លាភាព និងស័ក្តិសិទ្ធិភាព តាមរយៈបច្ចេកវិទ្យាឌីជីថល ក្នុងយុគសម័យបដិវត្តន៍ឧស្សាហកម្ម ៤.០៕

អត្ថបទ៖ ផល ធារិត