ព័ត៌មានជាតិ

ក្រុមប្រតិបត្តិករ នឹងចាប់ផ្តើមបើកប្រតិបត្តិការដោះមីន ក្នុងភូមិសាស្ត្រស្រុកស្នួល ឆាប់ៗនេះ

បានផុស

២ years មុន

នៅ

ថ្ងៃអង្គារ ២០ មិថុនា ២០២៣

ដោយ

ក្រចេះ ៖ ក្រុមប្រតិបត្តិករ នៃបញ្ជាការដ្ឋានកងលេខ ១៣៥ នឹងចាប់ផ្តើមបើកប្រតិបត្តិការបោសសំអាតគ្រាប់មីននិងគ្រាប់យុទ្ធភណ្ឌមិនទាន់ផ្ទុះ នៅក្នុងតំបន់សង្ស័យមានមីន ក្នុងឃុំចំនួន៤ ក្នុងស្រុកស្នួល ខេត្តក្រចេះ នៅពេលឆាប់ៗខាងមុខនេះ ដើម្បីសន្តិសុខ សុវត្ថិភាព និងរំដោះផ្ទៃដី ជូនប្រជាពលរដ្ឋ សម្រាប់បង្កបង្កើនផល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសក្រុមការងារ នៃមូលនិធិសម្តេចតេជោ ហ៊ុន សែន ចុះត្រួតពិនិត្យការងារបោសសម្អាតចម្ការមីន នៅភូមិព្រែកក្តី ឃុំស្នួល ស្រុកស្នួល កាលពីថ្ងៃទី១៩ ខែមិថុនា ឆ្នាំ២០២៣ លោកវរសេនីយ៍ទោ វិន ឌី មេបញ្ជាការកងលេខ ១៣៥ ជាប្រធានប្រតិបត្តិករប្រចាំខេត្តក្រចេះ បានឲ្យដឹងថា ក្នុងចំណោមឃុំទាំង៤ នេះ ឃុំស្នួល មានផ្ទៃដីសង្ស័យមានមីនចំនួន ៧,៤២៥,២៦១ ម៉ែត្រក្រឡា ស្មើនឹង ៧៧ ចម្ការ, ឃុំស្រែចារ ចំនួន ១,៣៣៨,១៦៥ ម៉ែត្រក្រឡា, ឃុំឃ្សឹម ចំនួន ៦,២៨៨,៨២៣ ម៉ែត្រក្រឡា និងឃុំ ២ ធ្នូ ចំនួន ២,៩០៦,៦៥៦ ម៉ែត្រក្រឡា។

លោកបញ្ជាក់ថា ប្រតិបត្តិការដោះមីន នៅភូមិសាស្ត្រស្រុកស្នួល មានរយៈពេល៦ខែ ក្នុងឆ្នាំ២០២៣នេះ។ លោកស្រីឃុន សុចិន្តា អនុប្រធាននាយកដ្ឋានបទបញ្ញត្តិ និងត្រួតពិនិត្យ និង លោកញ៉ឹក សាម៉ន ប្រធានក្រុមត្រួតពិនិត្យ បានស្នើឲ្យក្រុមប្រតិបត្តិករ ខិតខំរួមគ្នាបន្តដោះស្រាយជាជំហានៗ ដោយត្រូវចាប់ផ្តើមពីភូមិមួយ, ឃុំមួយ, ស្រុកមួយ និងខេត្តមួយ រហូតដល់អស់មីន នៅទូទាំងប្រទេស ស្របតាមចក្ខុវិស័យឆ្នាំ២០២៥៕

ដោយ ៖ សានវិឡែម