អាជ្ញាធរខេត្តស្វាយរៀង បន្តអភិវឌ្ឍហេដ្ឋារចនាសម្ព័ន្ធផ្លូវថ្នល់​ក្នុងស្រុកចន្ទ្រា

អាជ្ញាធរខេត្តស្វាយរៀង បាននិងកំពុងអភិវឌ្ឍហេដ្ឋារចនាសម្ព័ន្ធគ្រប់ទីកន្លែង ពោលគឺពីក្រុងរហូតដល់ជនបទ។ ជាក់ស្តែង លោក ថន ថាវុទ្ធា អភិបាលស្រុកចន្ទ្រា បានបើកការដ្ឋានស្ថាបនាផ្លូវក្រាលថ្មបំបែកមួយខ្សែប្រវែង ៣.៩០០ម៉ែត្រ ទទឹងប្រវែង ៥ម៉ែត្រ កម្រាស់១.៥ ០សង់ទីម៉ែត្រ ឆ្លងកាត់២ភូមិ គឺភូមិបន្លាស្អិត និងភូមិត្រពាំងធ្លក ស្ថិតក្នុងឃុំច្រេស ស្រុកចន្ទ្រា ថ្ងៃទី ២១ មិថុនា ឆ្នាំ ២០២៣។

ទន្ទឹមនឹងនេះ លោកអភិបាលស្រុក បានសុំការយោគយល់ពីប្រជាពលរដ្ឋ សម្រាប់ការពង្រីក និងជួសជុលស្ថាបនាផ្លូវ​នាពេលនេះ អាចមានផលប៉ះរបងផ្ទះរបស់ពួកគាត់ក្នុងការពង្រីកផ្លូវ។ លើសពីនេះទៀត លោកស្នើថា នៅពេលផ្លូវនេះ​បានជួសជុលរួចហើយសូមឱ្យអ្នកប្រើប្រាស់ផ្លូវទាំងអស់គ្នាត្រូវចូលរួមគោរពច្បាប់ចរាចរណ៍ ដើម្បីកាត់បន្ថយនូវការគ្រោះ ដែលកើតមានជារៀងរាល់ថ្ងៃ។

លោកអភិបាលស្រុកបានបន្តថា នៅពេលមានជំងឺកូវីដ១៩ រាជរដ្ឋាភិបាល ក្រោមការដឹកនាំរបស់សម្ដេចតេជោ ហ៊ុន សែន លោកបានរកវ៉ាក់សាំងមកចាក់ស្រោចជួយជីវិតប្រជាជនឲ្យបានឆ្លងផុតគ្រោះមរណៈបានទាន់ពេលវេលា។ ដើម្បីលើកស្ទួយជាប្រភាពប្រជាជនរាជរដ្ឋាភិបាលមានគោលនយោបាយទាក់ទាញអ្នកវិនិយោគឲ្យមកសាងសង់បង្កើតតំបន់សេដ្ឋកិច្ចពិសេសដែលនាំឲ្យកូនចៅយើងមានការងារធ្វើមានប្រាក់ចំណូលជួយដល់គ្រួសារ។

លោកបានបន្ថែមទៀតថា ដោយសារការដឹកនាំរបស់គណបក្សប្រជាជនកម្ពុជា យើងបានរួចផុតពីសង្គ្រាមរួចផុត​ពីសម័យជូរចត់​លំបាកតោកយ៉ាកម្នាក់ៗមានជីវភាពសមរម្យជាបណ្ដើរៗមានទីជម្រកសមរម្យ មានសាលារៀនមន្ទីរពេទ្យ ផ្លូវថ្នល់ខ្វាត់ខ្វែងមានស្ពានឆ្លងទន្លេតូចធំឆ្លងកាត់ ស្ពានអាកាស មានផ្លូវល្បឿនលឿនធ្វើដំណើរបានស្រួលរហ័ស​ទាន់ចិត្តមាន​ពហុកីឡាដ្ឋានទំនើបហើយបានរៀបចំកីឡាស៊ីហ្គេមទទួលភ្ញៀវជាតិអន្តរជាតិបានរាប់ម៉ឺននាក់ថែមទៀតផង។

លោកអភិបាលស្រុក បានសង្កត់ធ្ងន់ថា សុខសន្តិភាពពេញលេញ មានសាមគ្គីគ្នាទើបមានការរីកចម្រើន បែកបាក់គ្នាមានតែងនាំឱ្យវិនាស៕

ដោយ:ភក្ដី