ព័ត៌មានជាតិ

ខេត្តបន្ទាយមានជ័យជាប់លេខ ៣ មានសំណង់អគារខ្ពស់ៗ បន្ទាប់ពីភ្នំពេញនិងខេត្តព្រះសីហនុ

បានផុស

២ years មុន

នៅ

ថ្ងៃសុក្រ ២៣ មិថុនា ២០២៣

ដោយ

របាយការណ៍របស់ក្រសួងដែនដី នគរូបនីយកម្មនិងសំណង់បានបង្ហាញពីស្ថានភាពបច្ចុប្បន្ននៃវិស័យសំណង់ និងសំណង់អគារខ្ពស់ៗនៅទូទាំងប្រទេស។

បើតាមរបាយការណ៍របស់ក្រសួងបញ្ជាក់ថា អគារខ្ពស់ៗចាប់ពី ៥ ជាន់ឡើងទៅនៅទូទាំងប្រទេសបច្ចុប្បន្នមានចំនួន ២ ៥៨៦ អគារ ក្នុងនោះនៅរាជធានីភ្នំពេញមានចំនួន ១ ៧១១ អគារ ខេត្តព្រះសីហនុមានចំនួន ៦៩០ អគារ ខេត្តបន្ទាយមានជ័យមានចំនួន ១៤២ អគារ និងខេត្តផ្សេងទៀតសរុបមានចំនួន ៤៣ អគារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍បានបែងចែកសំណង់អគារខ្ពស់ៗក្នុងនោះអគារដែលមានកម្ពស់ចាប់ពី ៥ ជាន់ ទៅ ៩ ជាន់ មានចំនួន ១ ៤៦៣ អគារ, អគារដែលមានកម្ពស់ចាប់ពី ១០ ជាន់ទៅ ១៩ ជាន់ មានចំនួន ៧០៥ អគារ, អគារដែលមានកម្ពស់ចាប់ពី ២០ ជាន់ទៅ ២៩ ជាន់ មានចំនួន ២៣៤ អគារ, អគារដែលមានកម្ពស់ចាប់ពី ៣០ ជាន់ ទៅ ៣៩ ជាន់ មានចំនួន ១៣២ អគារ និងអគារដែលមានចាប់ពី ៤០ ជាន់ឡើងមានមាន ៥២ អគារ។

តាមរបាយការណ៍ក៏បានបង្ហាញពីគម្រោងបុរីលំនៅឋាន និងបណ្តុំលំនៅឋានមានលក្ខណៈជាបុរីមានចំនួន ៥៤៧ គម្រោង និងសំណង់លំនៅឋានប្រភេទល្វែងមានចំនួន ៤០ ៩១៧ខ្នង។

តាមទិន្នន័យជំរឿនប្រជារាស្ត្រឆ្នាំ២០០៨ កម្ពុជានឹងមានប្រជាជនប្រមាណជាង ១៨ លាននាក់នៅឆ្នាំ ២០៣០ និងមានតម្រូវការលំនៅឋានថ្មីប្រមាណជាង ១,១ លានបន្ថែមទៀត។ ក្នុងនោះសម្រាប់រាជធានីភ្នំពេញ ទីក្រុង និងទីប្រជុំជន មានតម្រូវការប្រមាណ ៨០ ម៉ឺនលំនៅឋាន បើគិតជាមធ្យម មានតម្រូវការលំនៅឋានប្រមាណជាង ៥ ម៉ឺនលំនៅឋានក្នុង ១ ឆ្នាំ។

រយៈពេល ៥ ខែ ឆ្នាំ ២០២៣ ក្រសួងដែនដី នគរូបនីយកម្មនិងសំណង់ បានផ្តល់លិខិតអនុញ្ញាតសាងសង់សំណង់ចំនួន ១៤៦៣ គម្រោង លើទុនវិនិយោគជាង ២២៧០ លាន ដុល្លារអាមេរិកពោលគឺបានកើនឡើង ១៣៨ ភាគរយ បើធៀបរយៈពេលដូចគ្នាកាលពីឆ្នាំ ២០២២៕

Related Topics:ខេត្តបន្ទាយមានជ័យ