ការអប់រំតាមបែបស្ទែម នឹងជួយឲ្យសិស្សចេះពី របៀបរៀនបែបពហុគំនិត និងចេះដោះស្រាយបញ្ហានៃជីវិតរស់នៅប្រចាំថ្ងៃ

មន្ត្រីជាន់ខ្ពស់ក្រសួងអប់រំយុវជននិងកីឡា បានលើកឡើងថា ការអប់រំតាមបែបស្ទែមនឹងជួយឱ្យសិស្សចេះពីរបៀបរៀនបែបពហុគំនិត និងចេះដោះស្រាយបញ្ហានានានៃជីវិតរស់នៅប្រចាំថ្ងៃប្រកបដោយគុណភាព និងប្រសិទ្ធភាព។

ថ្លែងក្នុងពិធីបើកវគ្គបណ្ដុះបណ្ដាលស្តីពី “ការរៀន និងបង្រៀនតាមបែបស្ទែមនៅកម្រិតមធ្យមសិក្សាទុតិយភូមិ” នៅមជ្ឈម​ណ្ឌល​គរុកោសល្យភូមិភាគខេត្តកំពង់ចាម កាលពីថ្ងៃទី២៤ មិថុនា លោក ថោង បូរ៉ាន់ អនុរដ្ឋលេខាធិការក្រសួងអប់រំ យុវ​ជននិងកីឡា បានមានប្រសាសន៍ថា ការអប់រំតាមបែបស្ទែម(STEM)មានគោលបំណងផ្ដល់នូវរបៀបរៀនបែបពហុគំនិត និងការដោះស្រាយបញ្ហា នៅក្នុងមេរៀនដោយរួមបញ្ចូលនូវមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិត​សាស្ត្រ រួមទាំងការអនុវត្ត។

លោកបានបន្តថា ការបង្រៀនបែបនេះបង្កើតបាននូវបរិស្ថាននៃការសិក្សាដែលសិស្សធ្វើការអង្កេតដោះស្រាយបញ្ហា និងរិះរកភ័ស្តុតាងបែបវិទ្យាសាស្ត្រតាមរយៈការពន្យល់បាតុភូតិធម្មជាតិ និងការផ្ដោតលើកត្តាបរិស្ថាន សង្គមរស់នៅ
អារម្មណ៍ កត្តារូបសាស្ត្រ ការចែករំលែក និងការចូលរួមពីសំណាក់សាលារៀន គ្រួសារ និងសហគមន៍។ លោកអនុរដ្ឋលេខាធិការ បានបញ្ជាក់ថា ការរៀនបែបស្ទែម គឺការអង្កេតលើបាតុភូតិធម្មជាតិ ដែលសិស្សបានជួបប្រទះក្នុងសកម្មភាព
នៃជីវិតរស់នៅប្រចាំថ្ងៃ ដោយការពន្យល់ ឬបកស្រាយតាមបែបវិទ្យាសាស្ត្រដើម្បីឆ្ពោះទៅរកការបង្កើតនូវផលិតផលថ្មី
ឬពន្យល់ពីបាតុភូតិធម្មជាតិដោយប្រើប្រាស់អន្តរមុខវិជ្ជា ក្នុងការដោះស្រាយបញ្ហាតាមរយៈការផ្សារភ្ជាប់ចំណេះដឹង និងបទពិសោធដែលមានពីមុននឹងបាតុភូតិនៅក្នុងបញ្ញតិ្តគោល នៃលំនាំការរៀន បង្រៀនវិមាត្របី គឺបញ្ញតិ្តគោល អន្តរមុខវិជ្ជា និងការអនុវត្ត។

នៅក្នុងឱកាសនោះដែរ លោកអនុរដ្ឋលេខាធិការ បានកោតសរសើរចំពោះមន្ត្រីអនុវត្តគម្រោងលើកកម្ពស់វិស័យអប់រំមធ្យមសិក្សាទុតិយភូមិទី២ ទាំងអស់ពិសេសមន្ត្រីសមាសភាគ «ក» បុគ្គលិកអប់រំ នៃវិទ្យាស្ថាន ជាតិអប់រំ និងដៃគូអភិវឌ្ឍន៍ (KAPE-VSO) ព្រមទាំងអ្នកពាក់ព័ន្ធទាំងអស់ដែលបានសហការអនុវត្តគម្រោង និងរៀបចំឱ្យមានវគ្គបណ្ដុះបណ្ដាលដ៏មានសារៈសំខាន់នេះ៕

អត្ថបទ៖ សំអឿន