ក្រសួងសាធារណការចាត់ទុកផ្លូវជាតិលេខ៤៨ ជាសរសៃឈាមសេដ្ឋកិច្ចដ៏មានសក្តានុពលរបស់កម្ពុជា

ក្រសួងសាធារណការ និងដឹកជញ្ជួនបានចាត់ទុកផ្លូវជាតិលេខ៤៨ដែលតភ្ជាប់ទៅខេត្តពោធិ៍សាត់ ខេត្តបាត់ដំបង
និងខេត្តប៉ៃលិន មកខេត្តកោះកុង ដែលគ្រោងនឹងសាងសង់រួចរាល់នៅពាក់កណ្តាលឆ្នាំ២០២៤ខាងមុខនេះ ជាសរសៃឈាមសេដ្ឋកិច្ចដ៏មានសក្តានុពលរបស់កម្ពុជា។

បើតាមក្រសួងសាធារណការបានឱ្យដឹងថា គម្រោងសាងសង់ផ្លូវជាតិលេខ៤៨មានប្រវែង១៤៨ គីឡូម៉ែត្រចំណុច​ប្រសព្វជាមួយផ្លូវជាតិលេខ៤ និងចំណុចបញ្ចប់នៅក្រុងខេមរភូមិន្ទខេត្តកោះកុង បានបើកការដ្ឋានសាងសង់កាលពីថ្ងៃទី០៣ ខែមករា ឆ្នាំ២០២២ និងបញ្ចប់ការសាងសង់នៅខែមិថុនាឆ្នាំ២០២៤ខាងមុខ មានរយៈពេលសាងសង់៣២ខែក្នុងទំហំទឹកប្រាក់ប្រមាណ៦៥,១៤ លានដុល្លារអាមេរិក ដែលសាងសង់ដោយសម្ព័ន្ធក្រុមហ៊ុនកូរ៉េ ILSUNG & HANIL Joint​ Venture និងត្រួតពិនិត្យបច្ចេកទេសដោយសម្ព័ន្ធក្រុមហ៊ុនទីប្រឹក្សាបច្ចេកទេស KCI & KECC Joint Venture។

ក្រសួងសាធារណការបានបន្តថា គម្រោងនេះ តភ្ជាប់ជាមួយផ្លូវជាតិលេខ១០ និងតភ្ជាប់ទៅខេត្តពោធិ៍សាត់ ខេត្តបាត់ដំបង និងខេត្តប៉ៃលិន មកកាន់តំបន់ឆ្នេរកម្ពុជា ដែលភ្ជាប់ប្រទេសកម្ពុជា ទៅប្រទេសថៃត្រូវបានចាត់ទុកជាសរសៃឈាម​សេដ្ឋកិច្ចដ៏មានសក្តានុពលរបស់កម្ពុជា ក្នុងការជួយសម្រួលដល់ការតភ្ជាប់ទំនាក់ទំនងគមនាគមន៍ និងការធ្វើ​សមាហរណកម្មតភ្ជាប់ផ្ទៃក្នុងប្រទេស ជាពិសេសកំពង់ផែទឹកជ្រៅនៅក្រុងព្រះសីហនុ សំដៅរួមចំណែកក្នុងការជំរុញការដោះដូរពាណិជ្ជកម្ម វិនិយោគនិងការដឹកជញ្ជូនដំណាំកសិផល និងកសិឧស្សាហកម្មឱ្យកាន់តែមានប្រសិទ្ធភាពខ្ពស់ ឆាប់រហ័ស និងចំណាយតិច ហើយក៏ជាផ្នែកមួយនៃផ្លូវអាស៊ានហាយវ៉េ១២៣ (ASEAN Highway 123) និងជារបៀងមាត់សមុទ្រខាងត្បូងរបស់មហាអនុតំបន់មេគង្គ GMS (R10)ផងដែរ។

បន្ថែមពីលើនេះ ផ្លូវនេះនឹងជួយជំរុញបន្ថែមសក្តានុពលតំបន់ទេសចរណ៍នៅក្នុងខេត្តកោះកុង ក៏ដូចជាតំបន់ទេសចរណ៍គិរីសាគរដែលជាគោលដៅទេសចរណ៍ដ៏សំខាន់មួយនៅភាគនិរតីកម្ពុជា និងជំរុញការអភិវឌ្ឍសេដ្ឋកិច្ចក្នុងតំបន់ជាប់ព្រំប្រទល់ជាមួយប្រទេសជិតខាង និងរំពឹងថា នឹងរួមចំណែកក្នុងការទាក់ទាញវិនិយោគិននិងជំរុញការនាំចេញនៅតំបន់សេដ្ឋកិច្ចពិសេសចំនួន៤ដែលស្ថិតនៅតាមបណ្តោយផ្លូវនេះ រួមមាន៖ តំបន់សេដ្ឋកិច្ចពិសេសកោះកុង តំបន់សេដ្ឋកិច្ចពិសេស ស៊ួយ ឆេង តំបន់សេដ្ឋកិច្ចពិសេសគិរីសាគរកោះកុង និងតំបន់សេដ្ឋកិច្ចពិសេសរតនា៕

អត្ថបទ៖ សំអឿន