សម្ដេចតេជោ ហ៊ុន សែន ៖ កន្លែងធ្វើការល្អគឺជារឿងប្រសើរមួយ តែអ្វីដែលប្រសើរជាងទៀតគឺប្រសិទ្ធភាពការងារ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ការបង្កើតឲ្យមានការកន្លែងធ្វើការងារល្អគឺជារឿងល្អប្រសើរមួយ តែអ្វីដែលល្អប្រសើរជាងនេះទៅទៀតនោះ គឺប្រសិទ្ធភាពការងារ។ ការលើកឡើងរបស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ “អគារសាលាយុត្ដិធម្ម” របស់ក្រសួងយុត្តិធម៌ នៅព្រឹកថ្ងៃទី ២៦ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន​ ថ្លែងបែបនេះថា «តែអ្វីដែលខ្ញុំសុំផ្ដាំផ្ញើ យើងបានធ្វើកន្លែងនេះ ដោយមានការជួយជ្រោមជ្រែងពីសំណាក់រាជរដ្ឋាភិបាល ដើម្បីបង្កើតឲ្យមានកន្លែងធ្វើការ កន្លែងធ្វើការល្អគឺប្រសើរណាស់ទៅហើយ ប៉ុន្តែប្រសើរជាងទៀតគឺប្រសិទ្ធភាព សុំចាំអាកន្លែងហ្នឹង កុំមានកន្លែងធ្វើការល្អ ប៉ុន្តែប្រសិទ្ធភាពទាប អត់ទេ សូមពិនិត្យមើលណាយុទ្ធសាស្រ្ដចតុកោណ មានពាក្យមួយឃ្លាគឺប្រសិទ្ធភាព»។

សម្ដេចតេជោ ហ៊ុន សែន លើកឡើងថា ទោះបីជាមានកន្លែងធ្វើការល្អប៉ុនណា ស្រួលប៉ុនណាក៏ដោយ តែបើប្រសិទ្ធភាពការងារគ្មានទេ គឺវាមិនអាចទៅរួចទេ។ សម្ដេចតេជោ ហ៊ុន សែន លើកឡើងទៀតថា «ខ្ញុំសុំស្នើនៅកន្លែងនេះ ការកសាងឲ្យមានអគារ ឲ្យមានទីកន្លែងធ្វើការវាជាការលំបាកមួយ ក៏ប៉ុន្តែបញ្ហាធានាឲ្យនិរន្តភាព​ម្យ៉ាង និងធានាឲ្យមានប្រសិទ្ធភាពម្យ៉ាង គឺជារឿងចាំបាច់ៗ»៕