សាធារណជនប្រតិកម្មនឹងរូបព្រះភក្រ្តបដិមាព្រះពុទ្ធអង្គ ខុសនឹងរចនាប័ទ្ម

មហាជនជាច្រើន បានប្រតិកម្មនឹងរូបបដិមាព្រះពុទ្ធអង្គ ដែលសាងសង់ឡើងមានទម្រង់ព្រះភក្ត្រ ខុសនឹងរចនាប័ទ្ម ព្រះពុទ្ធបដិមា ហើយបានសំណូមពរដល់អាជ្ញាធរ និងអ្នកមានបច្ចេកទេស ជួយកែកុនផង ព្រោះនេះជាមុខមាត់របស់តំបន់ស្រុក និង​ប្រទេសជាតិ។

ផេកហ្វេសប៊ុកឈ្មោះ បុរាណាចារ្យ កាលពីថ្ងៃទី២៥ មិថុនា ២០២៣ បានផុសនូវរូបភាពមួយសន្លឹក និងភ្ជាប់ជាមួយខ្លឹមសារថា “ឃើញមាន មហាជន​ប្រតិកម្មច្រើន ឆ្លៀតឱកាសនេះអេតមីន សូមសំណូមពរ ដល់អ្នកមានសទ្ធា អាជ្ញាធរ និងអ្នកមានបច្ចេកទេស ជួយមេត្តាជួយសង្គ្រោះកែកុនផង ព្រោះបដិមាទំហំបែបនេះ ជាមុខមាត់នៃតំបន់ ភូមិស្រុកខេត្តរបស់លោកអ្នក និង ស្របតាមអនុសាសន៍នាយករដ្ឋមន្ត្រី នៃយើង ដែលបានថ្លែងទាក់ទងនឹងរចនាប័ទ្ម ព្រះពុទ្ធបដិមាកាលពីខែមុន។”

ជុំវិញរឿងរ៉ាវនេះ មានមតិខ្លះ បានចោទជាសំណួរថា​ តើការសាងសង់រូបបដិមាខាងលើឡើង មានបានឆ្លងកាត់អាជ្ញាធរ​ណាខ្លះដែរទេ? និងខ្លះ បានសម្តែងការមិនពេញចិត្តខ្លាំង រហូតស្នើឱ្យមានការវាយចោលទៀតផង។

ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែ​ន ជារឿយៗតែងតែណែនាំឱ្យស្ថាប័នពាក់ព័ន្ធ​យកចិត្តទុកដាក់លើ​ការ​​សាង​សង់​​រូបសំណាក ឬបដិមាព្រះពុទ្ធ ឱ្យបានត្រឹមត្រូវទៅតាមរចនាប័ទ្មខ្មែរ។ សម្តេចថា បើការកសាងនោះមិនត្រូវតាមក្បួនខ្នាត ហើយមានភាពមិនត្រឹមត្រូវ ពេលដែលអភិសេធដាក់ឱ្យប្រើប្រាស់រួចហើយគឺគ្មានអ្នកណាហ៊ានវ៉ៃចោលនោះទេ គេខ្លាចមានបញ្ហាគ្រោះថ្នាក់តាមអបិយជំនឿ។ អីចឹងទេរបស់នោះត្រូវបន្សល់ទុករាប់រយឆ្នាំទៅខាងមុខទៀតដែល នាំទៅ​ឱ្យ​ក្មេងជំនាន់ក្រោយអាចយល់ខុសពីទម្រង់ខ្មែរពិតប្រាកដ៏យ៉ាងណា។

គួរបញ្ចាក់ថា សំណង់រូបបដិមា ដែលកំពុងរងការរិះគន់នេះ ជាសំណង់ស្ថាបនាឡើងក្នុង វត្តវាល ទឹកដីនៃខេត្តពោធិ៍សាត់៕