សម្ដេចតេជោ ហ៊ុន សែន បន្តលើកឡើងឲ្យកម្មករត្រូវហ៊ានចង្អុលមុខអ្នកណាក៏ដោយ ដែលបំផ្លាញឆ្នាំងបាយរបស់ខ្លួន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្តលើកឡើងឲ្យកម្មករ-កម្មការនី ចង្អុលមុខអ្នកណា ដែលបំផ្លាញឆ្នាំងបាយកម្មករ ព្រោះបើរោងចក្រត្រូវបិទ អ្នកដែលរងគ្រោះមុនគេ គឺក្រុមកម្មករ។

ការលើកឡើងរបស់សម្ដេចតេជោ ហ៊ុន សែន ធ្វើឡើងក្នុងជួបសំណេះសំណាលជាមួយកម្មករ-និយោជិត នៅក្រុងច្បារមន និងស្រុកសំរោងទង ខេត្តកំពង់​ស្ពឺ នាព្រឹកថ្ងៃទី ២៧ ខែមិថុនា ឆ្នាំ ២០​២៣។

សម្ដេចតេជោ ហ៊ុន សែន បានថ្លែងថា បើរោងចក្រត្រូវបិទ អ្នកដែលរងគ្រោះមុនគេ គឺក្រុមកម្មករ។ ដូច្នេះត្រូវហ៊ានចង្អុលមុខអ្នកណា ដែលបំផ្លាញឆ្នាំងបាយកម្មករ។

សម្ដេចតេជោ ហ៊ុន សែន ថ្លែងបែបនេះថា «ហើយក្មួយៗត្រូវចាំណា៎ បើរោងចក្រត្រូវបិទអ្នកដែលស្លាប់មុនគេ អ្នកដែលអត់មុនគេគឺកម្មករ ពួកថៅកែគាត់ខាតហើយ ប៉ុន្តែគាត់នៅមានទ្រព្យសម្បត្តិផ្ទះសម្បែង​គាត់ក្នុងប្រទេស ឬក្រៅប្រទេស ក៏ប៉ុន្តែយើង ១ខែ ២០០ដុល្លារយ៉ាងហោច ត្រូវបាត់បង់ៗ ចឹងត្រូវហ៊ានចង្អុលមុខអ្នកណាក៏ដោយ ដែលបំផ្លាញឆ្នាំងបាយកម្មករត្រូវហ៊ានចង្អុលមុខៗ»។

សម្ដេចតេជោ ហ៊ុន សែន លើកឡើងថា អតីតនាយករដ្ឋមន្ត្រីថៃ គឺលោក ថាក់ស៊ីន និងលោកស្រី យីងឡាក់ ត្រូវគេធ្វើរដ្ឋប្រហារទម្លាក់ចេញពីតំណែង តែលោក ថាក់ស៊ីន និងលោកស្រី យីងឡាក់ មិនដែលអំពាវនាវឲ្យបរទេសកាត់ជំនួយពីប្រទេសថៃ ឬឈប់ទិញទំនិញពីប្រទេសថៃនោះទេ។

ផ្ទុយពីអ្នកនយោបាយនៅថៃ គឺអ្នកនយោបាយប្រឆាំងនៅកម្ពុជា មិនដែលគិតអំពីបញ្ហាប្រទេសជាតិ ឬកម្មករ-កម្មការនីឡើយ ដោយតែងតែអំពាវនាវដល់បរទេសឈប់ផ្ដល់ជំនួយ ឬឈប់ទិញទំនិញពីកម្ពុជា ជាដើម៕