យុទ្ធនាការ “អំណានក្នុងសន្តិភាព” ស្វែងរកការបរិច្ចាគសៀវភៅ តម្កល់នៅក្នុងបណ្ដាល័យតេជោសន្តិភាព

មន្ត្រីជាន់ខ្ពស់ក្រសួងធម្មការ និងសាសនា បានបង្កើតយុទ្ធនាការ “អំណានក្នុងសន្តិភាព” ដើម្បីស្វែងរកការបរិច្ចាគសៀវភៅចំនួន ៩,០០០ក្បាល សម្រាប់តម្កល់នៅក្នុងបណ្ដាល័យតេជោសន្តិភាព នៃពុទ្ធិកសាកលវិទ្យាល័យ ព្រះសីហមុនីរាជា។

លោកបណ្ឌិត ងួន ស្ដេចភក្ដី រដ្ឋលេខាធិការក្រសួងធម្មការ និងសាសនា និងជាទីប្រឹក្សាផ្ទាល់​របស់សម្ដេចតេជោ ហ៊ុន សែន បានមានប្រសាសន៍ប្រាប់កម្ពុជាថ្មី នៅថ្ងៃទី ២៧ ខែមិថុនានេះថា ការបង្កើតយុទ្ធនាការ “អំណានក្នុងសន្តិភាព” ដែលចង់ឲ្យ​មានការរួមគ្នាបរិច្ចោគសៀវភៅចំនួន ៩,០០០ក្បាលនេះ ធ្វើឡើងក្នុងគោលបំណងដូចជា៖ បំផុសគំនិត​សមណនិស្សិត និស្សិតឲ្យស្រឡាញ់ការសិក្សារៀនសូត្រ, បំផុសគំនិតសមណនិស្សិត និងនិស្សិតឲ្យចេះស្រឡាញ់គតិបណ្ឌិត គឺវប្បធម៌​សន្តិភាព, បំផុសគំនិតសមណនិស្សិត និងនិស្សិតឲ្យចេះគាំទ្រស្នាដៃនិពន្ធ, បំផុសគំនិតសមណនិស្សិត និងនិស្សិតឲ្យចេះប្រឡងប្រជែងចំណេះដឹង និងបំផុសគំនិតសមណនិស្សិត និងនិស្សិតឲ្យចេះគោរពស្រឡាញ់គ្នា ប្រកបដោយទឹក មេត្តា សតិ និងបញ្ញា ដើម្បីរួមគ្នាអភិវឌ្ឍប្រទេសជាតិ សាសនា ព្រះមហាក្សត្រ។

លោកបណ្ឌិត ងួន ស្ដេចភក្ដី មានប្រសាសន៍បន្តថា ពាក្យ “អំណានក្នុងសន្តិភាព” ត្រូវបានបំផុសគំនិតដល់សមណ​និស្សិត និស្សិត ដែលកំពុងរស់នៅយ៉ាងសុខសាន្ត ក្នុងព្រះរាជាណាចក្រកម្ពុជាប្រកបដោយសន្តិភាព និងស្ថិរភាព។ អំណាន គឺជា​កត្តាចលករជំរុញដល់ការផ្លាស់ប្តូរសេដ្ឋកិច្ច និងសង្គមនៅក្នុងប្រទេស ហើយអំណាន ក៏ជាធាតុស្នូល​នៃការនាំមកនូវ​ពុទ្ធិ​ចំណេះដឹងខ្ពង់ខ្ពស់ និងសីលធម៌ល្អ គេចផុតអំពើបាប ភាពអវិជ្ជា ហើយនាំមនុស្សឲ្យស្គាល់នូវតម្លៃគុណជាតិ (សីលធម៌ គុណធម៌ សុជីវធម៌) និងសាមគ្គីជាតិ។

លោកបន្តទៀតថា ប្រជាជាតិខ្មែរ ត្រូវចេះអាន ត្រូវចេះគិត និងត្រូវចេះពិចារណា ដើម្បីសុខុមាល​ភាពការអប់រំជាតិ​របស់​យើង​ទទួលបានប្រសិទ្ធភាពខ្ពស់។ សមដូចពាក្យខ្មែរពោលថា “អានច្រើនកើនប្រាជ្ញា”។ ដើម្បី​អានច្រើន រៀនសូត្រ ទៅ​បាន​ទាល់តែប្រទេសយើងមានសន្តិភាព។ ដូច្នេះបង្ហាញឲ្យឃើញថា ប្រទេសជាតិមានសន្តិភាព មានការអប់រំ មាន​ការ​រៀនសូត្រ ត្រូវមានអំណាន៖ អំណាន ជាមូលដ្ឋានគ្រឹះនៃចំណេះដឹងគ្មានដែនកំណត់។ អំណាន ជាមូលដ្ឋានគ្រឹះ​នៃ​វប្បធម៌​សន្តិភាព។ អំណាន ជាមូលដ្ឋានគ្រឹះនៃសីលធម៌សង្គមជាតិ។

បើតាមលោកបណ្ឌិត ងួន ស្ដេចភក្ដី មកដល់ពេលនេះ ការចូលរួមបរិច្ចាគសៀវភៅពីសប្បុរសជនចំនួនច្រើនក្បាល និងស្វាគមន៍ការចូលរួមបរិច្ចោគពីសប្បុរសជនបន្ថែមទៀត សម្រាប់ដាក់តម្កល់នៅក្នុងបណ្ណាល័យ “តេជោសន្តិភាព”៕

អត្ថបទ ៖ សួស សិត